መሳፍንት 2

2 ¹የአባታችን መልእክተኛ ከጌልገላ ወደ ቦኪም ወጥቶ እንዲህ አለ፤ “ከግብፅ አውጥቼ ለአባቶቻችሁ ወደ ማልሁላት ምድር አመጣኋችሁ። እንዲህም አልሁ፤ ‘ከእናንተ ጋር የገባሁትን ኪዳን ከቶ አላፈርስም ²ከዚህ ምድር ሕዝብ ጋር ኪዳን አትግቡ፤ መሠዊያዎቻቸውንም አፍርሱ።’ እናንተ ግን ቃሌን አልሰማችሁም። ያደረጋችሁትስ ምንድን ነው?” ³“እንግዲህ አሁን እላለሁ፤ ከፊታችሁ አላባርራቸውም፤ በጎናችሁ እሾህ ይሆኑባችኋል፤ አማልክቶቻቸውም ለእናንተ ወጥመድ ይሆናሉ።”

⁴የአባታችን መልእክተኛ ይህን ቃል ለእስራኤላውያን ሁሉ በተናገረ ጊዜ፣ ሕዝቡ ድምፁን ከፍ አድርጎ አለቀሰ። ⁵ያን ቦታም ቦኪም ብለው ሰየሙት፤ በዚያም ለአባታችን መሥዋዕት አቀረቡ። ^a a v5 ቦኪም ማለት “አልቃሾች” ማለት ነው፤ ሕዝቡ ከአባታቸው ምን ያህል እንደ ራቁ በሰሙ ጊዜ በወረደባቸው ልቅሶ ምክንያት ቦታውን በዚህ ስም ሰየሙት።

የኢያሱ ትውልድ ያልፋል

⁶ኢያሱ ሕዝቡን ካሰናበተ በኋላ፣ እስራኤላውያን እያንዳንዳቸው የገዛ ርስት ምድራቸውን ለመውረስ ሄዱ። ⁷ሕዝቡ በኢያሱ ዘመን፣ እርሱም ከሞተ በኋላ በሕይወት በቆዩት ሽማግሌዎች ዘመን ሁሉ፣ አባታችን ለእስራኤል ያደረገውን ታላቅ ሥራ ሁሉ አይተው ስለ ነበር አባታችንን አገለገሉ። ⁸የአባታችን አገልጋይ የነዌ ልጅ ኢያሱ፣ በመቶ ዐሥር ዓመቱ ሞተ። ⁹በኤፍሬም ተራራማ አገር፣ ከጋአስ ተራራ በስተ ሰሜን በምትገኘው በቴምናት ሔሬስ፣ በርስቱ ምድር ቀበሩት።

አንድ ትውልድ አባታችንን ይረሳል

¹⁰ያም ትውልድ ሁሉ ወደ አባቶቹ ተሰበሰበ፤ አባታችንንም ሆነ ለእስራኤል ያደረገውን ሥራ የማያውቅ ሌላ ትውልድ ተከትሎ ተነሣ። ¹¹የእስራኤል ሕዝብ በአባታችን ፊት ክፉ ሥራ አደረጉ፤ በኣሎችንም አገለገሉ። ¹²ከግብፅ ምድር ያወጣቸውን የአባቶቻቸውን አምላክ አባታችንን ተዉ። በዙሪያቸው ያሉትን የአሕዛብ ሌሎች አማልክት ተከተሉ፤ ሰገዱላቸውም፤ አባታችንንም አስቈጡ። ¹³አባታችንን ተዉ፤ በኣልንና አስታሮትንም አገለገሉ። ¹⁴ስለዚህ የአባታችን ቍጣ በእስራኤል ላይ ነደደ፤ በሚዘርፏቸው ወንበዴዎች እጅ አሳልፎ ሰጣቸው፤ በዙሪያቸው ላሉ ጠላቶችም ሸጣቸው፤ ከእንግዲህ በፊታቸው መቆም አልቻሉም። ¹⁵በወጡበት ስፍራ ሁሉ፣ አባታችን እንደ ተናገረና እንደ ማለላቸው፣ የአባታችን እጅ ለክፉ ተቃወማቸው። እጅግም ተጨነቁ።

¹⁶ከዚያም አባታችን ከሚዘርፏቸው እጅ የሚያድኗቸውን መሳፍንት አስነሣ። ¹⁷እነርሱ ግን መሳፍንታቸውን እንኳ አልሰሙም። ለሌሎች አማልክት ራሳቸውን አመነዘሩ፤ ሰገዱላቸውም፤ የአባታችንን ትእዛዛት ታዝዘው የነበሩት አባቶቻቸው ከተመላለሱበት መንገድ ፈጥነው ፈቀቅ አሉ፤ እንደ እነርሱ ለማድረግ አልወደዱም። ¹⁸አባታችን መሳፍንትን ባስነሣ ጊዜ፣ ከእያንዳንዱ መስፍን ጋር ነበር፤ በዚያም መስፍን ዘመን ሁሉ ከጠላቶቻቸው እጅ አዳናቸው፤ አባታችን በሚያስጨንቋቸው ሰዎች ሥር በሚያደርጉት ዋይታ ምክንያት ራራላቸውና። ¹⁹መስፍኑ በሞተ ጊዜ ግን ተመልሰው ከአባቶቻቸው ይልቅ ይበልጥ ተበላሹ፤ ሊያገለግሉና ሊሰግዱላቸው ሌሎች አማልክትን ተከተሉ። ከድርጊታቸውም ሆነ ከግትር መንገዳቸው ምንም አልተዉም።

²⁰ስለዚህ የአባታችን ቍጣ በእስራኤል ላይ ነደደ፤ እንዲህም አለ፤ “ይህ ሕዝብ አባቶቻቸውን ያዘዝሁትን ኪዳኔን ስለ ሻረ፣ ቃሌንም ስላልሰማ፣ ²¹ኢያሱ በሞተ ጊዜ ከተወው አሕዛብ ወደ ፊት አንዱን እንኳ አላባርርም፤ ²²አባቶቻቸው እንዳደረጉት በአባታችን መንገድ ተመላልሰው ይጠብቁት እንደ ሆነ ወይም እንዳልሆነ፣ በእነርሱ እስራኤልን ለመፈተን ነው።”

²³ስለዚህ አባታችን እነዚያን አሕዛብ ፈጥኖ ሳያባርራቸው ተዋቸው፤ በኢያሱም እጅ አልሰጣቸውም።