Boueibü Hangangbü Bokima
Seneibü Bou hangangbüei Bokim to Israel kaodak kabü mütshuong yoa sangmaia kibü shanga khulimbo ngaikei, hoba haoen haapbei. Joshua kibü jaishou shuong haikei, hoba seneibü Bou akümbou che longkei. Ho laieibü phet hai yeikei: Bou maan apbü, shaibou shuongei longbü, üeisana matjembü che langbü, kho phaia shian sühbü leilubü.
2 1Bou hangangbüei Gilgal ka Bokim to angkei hoba laukei, “Ngei kan Ijep kaodak ka kaneibü bousi shuong to theyolanyoan kibü kaodak to leian longkei. Ngei laukei, ‘Ngei kan yoa ngeibü theyolanyobü ladangkei aleilulabü. 2Kanei ho kaodak kabü mütshuong to theyolanyobü akümjan; haoeneibü lemshang netla yeiko jangnyinkujan.’ Lausikei kanei kü ngüha alekei. Kanei ai kümbei? 3Hibü tou ngei lauda, ngei kan thedanga haoen shian asattilabü; haoen kaneibü jiphei la sang tegü kilabü, hoba haoeneibü mühghaü shuong kan shanga sung che kilabü.”
4Ladang Bou hangangbüei habü ngüh Israelbü shuong pendou to lenkei, mütshuongei ngüh longko haapbei. 5Hoba haoenei kho kaoen Bokim nyenkukei, hoba khünei haoenei Bou la lembü kukei. a a v5 Bokim nyen kho “haapbü shuong” dogo lauda. Mütshuongei haoeneibü Bou ka aichek lamkhümbü dogo ditjinei, haapbü longkei; khoei haoenei kho kaoen la Bokim nyenkukei.
Joshuaeibü Meten Apbei
6Ladang Joshuaei mütshuong ngaitikei, Israelbü shuong mütpem weko jembü phetphan kaodak lela haukei. 7Mütshuongei Joshua kibü jihsiphaia hoba hao phaia langbü jaishou shuong kibü jihsiphaia Bou khangenkei; hoba Bouei Israel shanga yaangbü kümsilei kümkei pendou haoenei ngeankei. 8Naneibü shou, Bou khangenbou Joshua po saongaoto an kian haikei. 9Gaash shongh chaaenei Efraim shongh kaodaka kibü haoeibü phetphan leilang Timnat Heres haoenei hao khünkei.
Meten Cheei Bou Maan Apbei
10Kho meten pendouje haoeneibü pisibousi shuong yoa yoshaikei, hoba haoen phaia lubü meten che loenkei, aoei Bou ayingsi haoei Israel shanga kümbü kümsilei angekei. 11Israelbü shuongei Bou thedanga ai amai kho kümbei, hoba Baal shuong khangenkei. 12Haoenei Bou, haoeneibü pisibousi shuongeibü Mühghaü, aoei haoen Ijep kaodak ka leian longbou, inletkei; hoba haoenei kaijembo kibü mütshuongeibü lubü mühghaü shuong phai sembei, haoen to khüpetkei, hoba Bou maangpoktikei. 13Haoenei Bou inletkei, hoba Baal si Ashtarot khangenkei. 14Hibü Bou Israel khulimbo khauangkei, hoba haoei haoen sangshibü shuong ik to kukei, aoei haoen shikei; hoba kaijembo kibü dangbou shuong to haoen yaakkukei, hibü haoenei touje haoeneibü dangbou thedanga pi athükkei. 15Haoenei jiji to meimeijung haulaje, Bou ik kho amaibü shanga haoen khulimbo kikei, haoei haoen to laukei hoba theyolanyoan kibü tegü. Haoen aeibou khonsaka kikei.
16Kheijinei Bouei matjembü shuong langngaitikei, aoei haoen haoeneibü sangshibü shuong ikmang ka khümenkei. 17Lausikei haoenei haoeneibü matjembü shuong to kei ngüh aditen. Haoenei lubü mühghaü shuong phai pejapelako satkei, hoba haoen to khüpetkei; haoeneibü bousi shuong, aoei Bou ngühkhüm jungeibou kikei, haoen paibü lam ka haoenei tongde sepeian apbei; haoenei kho tegü akümen. 18Ladang seneibü Bouei matjembü shuong yeitikei, matjembü lulu yoa hao yoan kikei, hoba kho matjembüeibü jihsiphai pendoua haoeneibü dangbou shuong ik ka haoen khümenkei; aishanga haoeneibü khonkutibü phanga haoen wiyobü shanga seneibü Bouei onouko dambei. 19Lausikei ladang matjembü haikei, haoen sepeinyu ngaian haoeneibü bousi shuong tokei aei asaopoko yeikei, hoba lubü mühghaü shuong phaito paian haoen khangenkei hoba haoen thedanga khüpetkei. Haoen haoeneibü kümsilei ayingsi maangkaangbü lam che ongkei aineikei.
20Kheijinei seneibü Bou Israel khulimbo khauangkei, hoba haoei laukei, “Aishanga habü phangei ngei haoeneibü bousi shuong la sakkubü kü theyolanyobü leilukei, hoba kü ngüha alekei, 21touje Joshua haian phaia apyobü phang che ongkei ngei shian asattilabü, 22haoeneibü bousi shuong jungeibü tegü seneibü Bou lam haoen jungeida si ajungeida dogo ngela, haoen danko Israel takteila shanga.”
23Kheijinei seneibü Bouei habü phangshuong tongde shian asattiko apyokei, hoba haoen Joshua ik to khümbo aku.
