Israel Takteila Apyobü Phangshuong

Israel jungeilabü ayingsi ajungeilabü dogo takteila shanga phangshuong kaodak ka apyokei. Ladang Israelei haoeneibü Bou amakei, Kushan-Rishathaimei Othniel langbü sühko po set songdakkei. Latetche, mae ik asepeibou Ehudei haoeibü mae you to in che huankei, haoeibü nitbü shemjanga Choba Eglon haitikei, hoba chemtan khühkukei.

Chapter 3.

Kanan wapyo aikei angebü Israelbü pendou takteila shanga, seneibü Bouei apyobü phangshuong kho ho ki. (Shaang wapyo angebü Israelbü meten meten shuong la wapyo ditletla shanga ong, haoei ho kümbei.) Phangshuong kho ho ki: Filistiabü songdakbü müt ngao, Kananbü pendou, Sidonbü, hoba Baal-hermon Shongh ka Lebo Hamath sühko Lebanon shongha kibü Hivbü. Habü phangshuongei Mosa danko haoeneibü pisibousi shuong la kubü seneibü Bou sakkubü ngüh haoenei jungeilabü ayingsi ajungeilabü dogo ngela shanga Israel takteilabü. Kheijinei Israelbü shuong Kananbü, Hitbü, Amorbü, Perizbü, Hivbü, hoba Jebusbü yoa kikei. Hobaje haoenei habü phangshuongeibü nouyangshou shuong lekei, hoba jembü nouyangshou shuong phangshuongeibü bousu shousi shuong la kukei, hoba haoeneibü mühghaü shuong khangenkei.

Bouei Khümenbou Othniel Phokuda

Israel shousi shuongei seneibü Bou thedanga ai amai kho kümbei, hoba haoeneibü Bou maan apbei, hoba Baal shuong hoba Ashera shuong khangenkei. Kheijinei seneibü Bou Israel khulimbo khau angkei, hoba haoei haoen Aram-naharaim Choba Kushan-Rishathaim ik to yaakkei, hoba Israelei hao po set khangenkei. Ladang Israel shousi shuongei seneibü Bou to ngekkei, haoei haoen shanga khümenbou che, Kalebeibü na Kenazeibü shou Othniel phokukei, hoba haoei haoen khümenkei. Seneibü Bou Soushou hao thüka loukei, hoba haoei Israel matjembei. Haoei wapyola haukei, hoba seneibü Bouei Aram Choba Kushan-Rishathaim hao ik to khümbo kukei, hoba haoeibü ikei Kushan-Rishathaim thüka thükkei. Kheijinei Kenazeibü shou Othniel haibü asühshongko, kaodak kho po saonyi hakso kikei.

Bouei Khümenbou Ehud Phokuda

Israelbü shuongei nyibou seneibü Bou thedanga ai amai kho kümbei, hoba haoenei ho amai kho kümbü aishanga, seneibü Bouei Moab Choba Eglon la Israel khulimbo hau kukei. Hobaje Eglon Ammonbü hoba Amalekbü yoshaitikei, hoba hauan Israel thükkei, hoba haoenei Woklong Sangnyu lekei. Hobaje Israelbü shuongei Moab Choba Eglon po anthükset khangenkei. Hobaje Israelbü shuongei nyibou seneibü Bou to ngekkei, hoba haoei haoen shanga khümenbou la, mae ik akhangenbü Benjaminbü Geraeibü shou Ehud phokukei. Hobaje haoenei hao danko Moab Choba Eglon jungto khüm hautikei. Hobaje Ehudei hao lolo shanga hakhin nyi kibü in che kümbei, kho süng ikmaang anthükset bang kikei, hoba kho haoeibü neisimei makan, mae youshi thüka shoukei. Haoei Moab Choba Eglon la khüm sungbakei, hoba Eglon kho aeibou netbü müt che kikei. Ladang Ehudei khüm küman yeikei, haoei kho künbü mütshuong ngaitikei. Lausikei haoei Gilgal napheinei kibü heangsho ka sepeian ngaikei, hoba laukei, “O Choba, ngo ka la huphangshoua ngüh che kia.” Hobaje Chobaei laukei, “Sangsembo kishi!” hoba hao khangenbü shuong pendouei hao apyokei.

Ehudei hao jungto loukei, hao jembü yemphanga popchem mütpemei ong setan kiteikei. Hobaje Ehudei laukei, “Ngo ka la Mühghaü ka ngüh che kia.” Hobaje Chobaei jembü setshang ka loenkei. Hobaje Ehudei jembü nanei ik shingkei, haoeibü mae youshi ka in sungkei, hoba kho Eglon shimung to shiettikei. In jem phainei in khu kho atkei, hoba haabüei in jem küplepbei. Aishanga Ehudei in kho haoeibü shimung ka asungen, haoeibü oksi senmang lotkei. Hobaje Ehudei chemso to longkei, hoba popchem koukap shuong hao phainei khinngailangkei.

Haoei apyoan phaia, hao khangenbü shuongei popchem koukap khinngailangan hapbei, hoba laukei, “Hao yemphanga popchem jembü denche shanga kia.” Haoenei chüheinyu alonglabü shongko chüheikei, lausikei haoei touje popchem koukap aip. Kheijinei haoenei koukhin leian koukap ipbei, hoba haoeneibü bunyubou chemshona tuongan haian hapbei.

Haoen delajinei Ehud satenkei. Haoei heangsho danjung haukei, hoba Seira to satenkei. Haoei loukei, Efraim shongha teklaang metkei, hoba Israelbü shuong hao yoa shongh ka yanan loukei, Ehud haoen thedanga leibou kiteikei. Haoei haoen to laukei, “Seneibü Bouei kaneibü dangbou Moab kaneibü ik to khümbo kua, khoei kü phai semashi.” Hobaje haoen hao phainei yanan haukei, hoba Moab khulimbo Jordan dei khatshang kaian sungkei, hoba aokei danjung haula aphokutei. Kho chaloua haoenei Moabbü hajar an abou haitikei, pendou laakbü hoba hau kibü müt kikei; müt che ongkei asatentei. Kheijinei kho chaloua Moab Israelbü ik shimunga letikei, hoba kaonyek po saolei haksokei.

Hao phainei Anateibü shou Shamgar masu shibü kaang cheei Filistiabü müt saongao lak haitikei; haoeikei Israel khümenkei.