Wungva̱-Wungvā 4

4 ¹Ehud thikahaiwui thili, Israelwui mibingna ithumwui Avāwui mangāli makaphā saluishithaowa. ²Chiwui vang eina ithumwui Avāna athumli Canaanwui awunga Jabinwui pāngli yorsanga, ana Hazorli munga. Awui raimi kathāna Harosheth-ha-goiimli somkapam Siserana. ³Chieina Israelwui mibingna ithumwui Avāli ngakaowa, kaja Siserana mari siguigari shākha leisai kala zingkum maga̱ athumli rekhareklak eina sāsai. ⁴Chitharan Lappidothwui preiva̱, marān sha̱nao Deborahna Israelli bichar sāsai. ⁵Ana Ramah eina Bethelwui ngachaili, Ephraimwui kaphungramli khalei Deborahwui khaneirong azingli pamki, kala Israelwui mibingna bichar sākhavai awui ngalemli vāchinga. ⁶Ana Naphtalili khalei Kedeshwui eina Abino-amwui naomayara Barakli hokhuida ali hānga, "Israelwui Vare, ithumwui Avāna nali kasoi maningmala: Vālu, Tabor Kaphungli zatta, Naphtali eina Zebulunwui eina mi thingtharā thānphunglu. ⁷Jabinwui raimi kathāna Siserali, awui siguigari eina raimibing ngasoda, Kishon kongli nali samphang khavai ina ngakhunda, ali nawui pāngli horsangmira."

⁸Barakna ali hānga, "Nana ili ngasoda vāakha, ina vāra; kha nana ili ngasoda mavāakha, ina mavāmara."

⁹"Ina kachangkhata nali ngasoda vāra," da ana hānga, "kha nana vā kaji shongfali na masot masamphangmara, kaja ithumwui Avāna Siserali sha̱nao akhawui pāngli horsangmira." Chieina Deborahna ngakarthuida Barakli ngasoda Kedeshli vai. ¹⁰Barakna Zebulun eina Naphtalili Kedeshli hokhui; mi thingtharāna awui khanukshong eina kānvai, kala Deborahna ali ngasoda vai. ¹¹Moseswui awova̱ Hobabwui naomayarabingwui akha Kenwui Heberna Kennaobingwui eina ngatei ngasakhailaga, Kedeshwui rāki Za-anannimwui shirimthing vāshungda awui kachonshim khaningkai. ¹²Abino-amwui naomayara Barak Tabor Kaphungli kāhaira kaji Siserali kahāng eina, ¹³Siserana awui mari siguigari shākha saikora kala awui raimi saikorali Harosheth-ha-goiimwui eina Kishon kong tāshungda hokhui.

¹⁴Deborahna Barakli hānga, "Ngakarthuilu! Aja ithumwui Avāna Siserali nawui pāngli horsangmira. Ithumwui Avāna nawui rida vāsai maningmala?" Chieina Barakna mi thingtharā awui khanukshong eina Tabor Kaphungwui eina tukvāhaowa. ¹⁵Kala ithumwui Avāna Barakwui mangāli Siserali, awui siguigari saikora kala awui raimi saikorali raighai eina yui; Siserana awui siguigari horhailaga phei eina yāmhaowa. ¹⁶Barakna siguigari eina raimibingli Harosheth-ha-goiim tāshungda kharomvai, kala Siserawui raimi katonga raighai eina thihaowa; mi akha eina tangda mashokmana.

¹⁷Chitharan Siserana Kenwui Heberwui preiva̱ Jaelwui kachonshimli phei eina yāmvai, kaja Hazorwui awunga Jabin eina Heberwui shimkhurna chingri eina pamsai. ¹⁸Jaelna Siserali samphang khavai shokta hānga, "Zanglu, ishāmei, iwuili zanglu; mangacheealu." Chieina ana awui kachonshimli zanga, kala ana kachon akha eina rommihaowa.

¹⁹Ana hānga, "Ili tara̱ kateokha khamimanglu; ina ra̱changnā." Ana seina̱wui sāhuikhong akha shoyanga ali shimana, kala ali rommiluishita.

²⁰Ana awuili hānga, "Kachonshimwui khāmongpheili nganinglu. Kachikathā akhana rāda, 'Hili mi akha leila?' da ngahānakha, 'Maleimana' da hānglu."

²¹Kha Heberwui preiva̱ Jaelna kachonshimwui thingshun akha kala yāmkarnao akha khuilaga, kasaikha awui ngalemli vākida, ana piphup vānhaida leilakha, thingshun chi awui najeeli hokthāngda ngaleili pharsangmiserhaowa. Chieina ana thihaowa. ²²Yanglu, Barakna Siserali kharomda rārā tharan, Jaelna ali samphang khavai shokta hānga, "Rālu, kala nana phāda khalei mi chi ina nali chitheira." Chieina ana awuili ngasoda zanga, kala yanglu, awui najeeli thingshun hokthāngda Sisera thihaisai. ²³Chithang ithumwui Avāna Canaanwui awunga Jabinli Israelwui mibingwui mangāli yuihaowa. ²⁴Athumna ali masāshimānranglakha eina tangda Israelwui mibingwui pāng chi Canaanwui awunga Jabinwuitungli ritmei ritmeida munghaowa.