ኣቦ ንዲቦራን ባርቅን የተንስእ

እቲ ዕስራ ዓመት ኣብ ትሕቲ ትሽዓተ ሚእቲ ሰረገላታት ሓፂን ሲሳራ፥ ዲቦራ ኣብ ትሕቲ ተምራ ፈሪዳ ንባርቅ ምስ ፀውዐት ተወድአ። ንሱ ንሳ እንተ ኸደት ጥራሕ ክኸይድ እዩ፥ ስለዙይ እቲ ኽብሪ ናብ ሰበይቲ ሓለፈ። ኣቦና ነተን ሰረገላታት በተነን፥ ያዔል ከዓ ሽኻ ድንኳን ኣብ ርእሲ እቲ ዝሃድም ዝነበረ ሲሳራ ሰንጠቐቶ።

ምዕራፍ 4።

ናዖድ ምስ ሞተ፥ ደቂ እስራኤል መሊሶም ኣብ ቅድሚ ኣቦና ክፉእ ገበሩ። ኣቦና ድማ ናብ ኢድ ኢያቢስ ንጉስ ከነዓን፥ እቲ ኣብ ሓፆር ዝነገሰ፥ ሸጦም። ሓለቓ ሰራዊቱ ኸዓ ሲሳራ ነበረ፤ ንሱ ድማ ኣብ ሓሮሸት ሃጎይም ይነብር ነበረ። ሽዑ ደቂ እስራኤል ናብ ኣቦና ኣእወዩ፤ ሲሳራ ትሽዓተ ሚእቲ ሰረገላታት ሓፂን ነበሮ እሞ፥ ንዕስራ ዓመት ድማ ኣጨኒቑ ይገፍዖም ነበረ። ዲቦራ ዝተብሃለት ነብይት፥ ሰበይቲ ላጲዶት፥ በቲ ጊዜ እቲ ንእስራኤል ትፈርዶም ነበረት። ንሳ ኣብ ኰረብታ ኤፍሬም ኣብ መንጎ ራማን ቤቴልን ኣብ ትሕቲ ተምሪ ዲቦራ ትቕመጥ ነበረት፤ ኣብኡ ድማ ደቂ እስራኤል ንፍርዲ ናብኣ ይድይቡ ነበሩ። ንሳ ድማ ንባርቅ ወዲ ኣቢኒኤም ካብ ቃዴስ ናይ ንፍታሌም ልኢኻ ፀውዐቶ፤ ከምዙይ ድማ በለቶ፦ “ኣቦና፥ ኣምላኽ እስራኤል፥ ከምዙይ ኢሉዶ ኣይኣዘዘካን፦ ‘ናብ እምባ ታቦር ኪድ ገስግስ፤ ካብ ንፍታሌምን ዛብሎንን ዓሰርተ ሽሕ ሰባት ከዓ ምሳኻ ውሰድ። ኣነ ድማ ንሲሳራ ሓለቓ ሰራዊት ኢያቢስ፥ ምስ ሰረገላታቱን ሰራዊቱን፥ ናብ ፈለግ ቂሶን ናባኻ ክስሕቦ፥ ኣብ ኢድካውን ከሕልፎ እየ’።”

ባርቅ ድማ “ንስኺ ምሳይ እንተ ኸድኪ፥ ክኸይድ እየ፤ ንስኺ ምሳይ እንተ ዘይከድኪ ግና፥ ኣይከይድን እየ” በላ።

ንሳ ድማ “ብርግፅ ምሳኻ ክኸይድ እየ፤ ኣቦና ግና ንሲሳራ ናብ ኢድ ሰበይቲ ኣሕሊፉ ክህቦ እዩ እሞ፥ በዛ እትኸዳ መንገዲ ኽብሪ ኣይክትረክብን ኢኻ” በለቶ። ዲቦራ ኸዓ ተሲኣ ምስ ባርቅ ናብ ቃዴስ ከደት። ባርቅ ድማ ንዛብሎንን ንንፍታሌምን ናብ ቃዴስ ፀውዐ፤ ዓሰርተ ሽሕ ሰባት ድማ ደድሕሪኡ ደየቡ፤ ዲቦራ ኸዓ ምስኡ ከደት። ሔቤር ቄናዊ ድማ ካብ ደቂ ሖባብ ሓሙ ሙሴ ሓደ እዩ ነይሩ፤ ንሱ ኸዓ ካብ ቄናውያን ተፈልዩ፥ ድንኳኑ ኽሳዕ እታ ኣብ ፀዕነኒም ዘላ ኦም ኣብ ጥቓ ቃዴስ ተኸለ። ባርቅ ወዲ ኣቢኒኤም ናብ እምባ ታቦር ደዪቡ ኸም ዘሎ ንሲሳራ ምስ ነገርዎ፥ ሲሳራ ድማ ንዅሎም ሰረገላታቱ፥ ትሽዓተ ሚእቲ ሰረገላታት ሓፂን፥ ከምኡውን ንዅሉ ሰራዊቱ፥ ካብ ሓሮሸት ሃጎይም ናብ ፈለግ ቂሶን ፀውዐ።

ዲቦራ ድማ ንባርቅ “ተንስእ! ኣቦና ሎሚ ንሲሳራ ኣብ ኢድካ ኣሕሊፉ ይህበካ ኣሎ። ኣቦና ቀቅድሜኻዶ ኣይወፀን?” በለቶ። ስለዙይ ባርቅ ካብ እምባ ታቦር ወረደ፤ ዓሰርተ ሽሕ ሰባት ከዓ ደድሕሪኡ ወረዱ። ኣቦና ድማ ንሲሳራን ንዅሎም ሰረገላታቱን ንዅሉ ሰራዊቱን፥ ኣብ ቅድሚ ባርቅ ብሰይፊ ሃወኾም፤ ሲሳራ ኸዓ ካብ ሰረገላኡ ወሪዱ ብእግሩ ሃደመ። ባርቅ ድማ ነቶም ሰረገላታትን ሰራዊትን ክሳዕ ሓሮሸት ሃጎይም ሰዓቦም፤ ኵሉ ሰራዊት ሲሳራ ኸዓ ብሰይፊ ወደቐ፤ ሓደ ሰብ እኳ ኣይተረፈን።

ሲሳራ ግና ናብ ድንኳን ኢያዔል፥ ሰበይቲ ሔቤር እቲ ቄናዊ፥ ብእግሩ ሃደመ፤ ኢያቢስ ንጉስ ሓፆር ምስ ቤት ሔቤር ሰላም ነበሮም እሞ። ኢያዔል ድማ ንሲሳራ ክትቅበሎ ወፂኣ “ኦ ጐይታይ፥ ናባይ እቶ፥ እቶ፤ ኣይትፍራሕ” በለቶ። ንሱ ኸዓ ናብ ድንኳና ኣተወ፤ ንሳ ድማ ብኣጎዛ ኸደነቶ።

ንሱ ድማ “በጃኺ ሒደት ማይ ሃብኒ፤ ፀሚአ ኣለኹ” በላ። ንሳ ኸዓ ሓርቢ ፀባ ኸፊታ ኣስተየቶ፤ መሊሳውን ከደነቶ።

ንሱ ድማ “ኣብ ኣፍ ደገ ድንኳን ደው በሊ። ሓደ ሰብ መፂኡ ‘ኣብዙይ ሰብኣይ ኣሎዶ?’ ኢሉ እንተ ሓተተኪ፥ ‘የለን’ በሊ” በላ።

ኢያዔል ሰበይቲ ሔቤር ግና ሽኻል ድንኳን ምስ መዶሻ ወሲዳ፥ ቀስ ኢላ ናብኡ ቐሪባ፥ ንሱ ደኺሙ ኣፅቂጡ ደቂሱ እንተሎ፥ ነቲ ሽኻል ኣብ ጕንዲ እዝኑ ሰኺዓ ክሳዕ መሬት ኣእተወቶ፤ ንሱ ድማ ሞተ። ሽዑ ባርቅ ንሲሳራ እናሰጎጎ መፀ፤ ኢያዔል ከዓ ክትቅበሎ ወፂኣ “ነዓ፥ ነቲ እትደልዮ ሰብኣይ ከርእየካ እየ” በለቶ። ንሱ ድማ ምስኣ ኣተወ፤ እንሆ ኸዓ ሲሳራ ሽኻል ኣብ ጕንዲ እዝኑ ተሰዅዑ ምዉት ወዲቑ ነበረ። በታ መዓልቲ እቲኣ ኣቦና ንኢያቢስ ንጉስ ከነዓን ኣብ ቅድሚ ደቂ እስራኤል ኣዋረዶ። ኢድ ደቂ እስራኤል ድማ ኣብ ልዕሊ ኢያቢስ ንጉስ ከነዓን እናበርተዐት ከደት፤ ክሳዕ ዘጥፍእዎ ድማ በርትዐት።