Nna Anyị Welite Debọra na Barak

Afọ iri abụọ nʼokpuru narị ụgbọ agha igwe itoolu nke Sisera kwụsịrị mgbe Debọra, onye na-ekpe ikpe nʼokpuru nkwụ ya, kpọrọ Barak. Ọ ga-aga naanị ma Debọra soro ya, ya mere, otuto ahụ ga-adịrị nwanyị. Nna anyị chụsasịrị ụgbọ agha ndị ahụ, Jael wee kpọgide ntụtụ ụlọ ikwu nʼekwe isi Sisera mgbe ọ na-agbapụ.

Isi 4.

Mgbe Ehud nwụsịrị, ụmụ Izrel mekwara ihe ọjọọ ọzọ nʼanya Nna anyị. Ya mere, Nna anyị rere ha nʼaka Jabịn eze Kenan, onye na-achị na Hazọ. Ọchịagha ndị agha ya bụ Sisera, onye bi na Haroshet-Hagoyim. Mgbe ahụ, ụmụ Izrel tikuru Nna anyị mkpu, nʼihi na Sisera nwere narị ụgbọ agha igwe itoolu, megbuokwa ha nke ukwuu afọ iri abụọ. Nʼoge ahụ, Debọra, bụ onye amụma nwanyị, nwunye Lapidot, nọ na-ekpe Izrel ikpe. Ọ na-anọdụ ala nʼokpuru Nkwụ Debọra, nke dị nʼetiti Rema na Betel nʼala ugwu ugwu Ifrem, ụmụ Izrel na-abịakwute ya maka ikpe. O ziri ozi kpọọ Barak nwa Abinoam site na Kedesh nke Naftalaị, gwa ya sị, “Ọ bụ na Nna anyị, bụ Chineke Izrel, enyeghị gị iwu, sị: Gaa, zọọ ije gaa nʼUgwu Tebọ, kpọrọ puku mmadụ iri site na Naftalaị na Zebulun soro gị. Aga m adọpụta Sisera, bụ ọchịagha ndị agha Jabịn, ka ọ bịakwute gị nʼosimiri Kaishọn, ya na ụgbọ agha ya na ndị agha ya, ma were ya nyefee gị nʼaka.”

Barak sịrị ya, “Ọ bụrụ na ị ga-eso m gaa, aga m aga; ma ọ bụrụ na ị gaghị eso m gaa, agaghị m aga.”

“Aga m eso gị gaa nʼezie,” ka ọ sịrị, “ma ị gaghị enweta otuto ọbụla nʼụzọ ị na-aga, nʼihi na Nna anyị ga-enyefe Sisera nʼaka nwanyị.” Ya mere, Debọra biliri soro Barak gaa Kedesh. Barak kpọkọtara Zebulun na Naftalaị na Kedesh; puku mmadụ iri soro ya rigoo, Debọra sokwaara ya gaa. Heba onye Ken, bụ otu nʼime ụmụ Hobab, bụ ọgọ Mosis nwoke, ekewapụla onwe ya site nʼebe ndị Ken nọ, maa ụlọikwuu ya ruo nʼosisi ook dị na Zaananim, nke dị nso Kedesh. Mgbe ha gwara Sisera na Barak nwa Abinoam arigoola nʼUgwu Tebọ, Sisera kpọkọtara ụgbọ agha ya niile—narị ụgbọ agha igwe itoolu—na ndị agha ya niile, site na Haroshet-Hagoyim ruo nʼosimiri Kaishọn.

Debọra sịrị Barak, “Bilie! Taa ka Nna anyị na-enyefe Sisera nʼaka gị. Ọ bụ na Nna anyị apụghị buru gị ụzọ?” Ya mere, Barak si nʼUgwu Tebọ gbadaa, puku mmadụ iri soro ya nʼazụ. Nna anyị tikpọrọ Sisera, na ụgbọ agha ya niile na ndị agha ya niile, site na mma agha nʼihu Barak; Sisera hapụrụ ụgbọ agha ya gbapụ ọsọ nʼụkwụ. Barak chụrụ ụgbọ agha na ndị agha ruo Haroshet-Hagoyim, ndị agha Sisera niile wee daa site na mma agha; o nweghị otu onye fọdụrụ ndụ.

Ma Sisera gbapụrụ ọsọ nʼụkwụ gbaga nʼụlọikwuu Jael, bụ nwunye Heba onye Ken, nʼihi na udo dị nʼetiti Jabịn eze Hazọ na ụlọ Heba. Jael pụrụ izute Sisera, sị, “Bata, onyenwe m, bata nʼebe m nọ; atụla egwu.” Ya mere, ọ batara nʼụlọikwuu ya, o wee jiri akwa kpuchie ya.

Ọ sịrị, “Biko nye m ntakịrị mmiri; akpịrị na-akpọ m nkụ.” O meghere karama akpụkpọ mmiri ara ehi, nye ya ka ọ ṅụọ, kpuchiekwa ya ọzọ.

Ọ sịrị ya, “Guzo nʼọnụ ụzọ ụlọikwuu ahụ. Ọ bụrụ na mmadụ bịa jụọ, ‘Ọ nwere nwoke nọ nʼebe a?’ sị, ‘Mba.’”

Ma Jael, bụ nwunye Heba, weere ǹtu ụlọikwuu na hama, jiri nwayọọ bịakwute ya, kụnye ǹtu ahụ gafee nʼakụkụ isi ya ruo nʼala, ebe ọ na-ehi ụra nke ukwuu nʼihi ike ọgwụgwụ. Ọ wee nwụọ. Nʼoge ahụ, Barak bịara na-achụ Sisera, Jael wee pụọ izute ya. “Bịa,” ka o kwuru, “ka m gosi gị nwoke ahụ ị na-achọ.” O soro ya baa, lee Sisera ka ọ tọgbọ nʼala nwụrụ anwụ, ǹtu ụlọikwuu ahụ gafere nʼakụkụ isi ya. Nʼụbọchị ahụ, Nna anyị wedara Jabịn eze Kenan nʼala nʼihu ụmụ Izrel. Aka ụmụ Izrel na-adịwanye ike megide Jabịn eze Kenan, ruo mgbe ha lara ya nʼiyi.