John 5

5 ¹Chiwui thili Jihudiwui phanit akha leisai, kala Jishuva Jerusalemli kāhaowa. ²Jerusalemli yao ngavei ngalemli, khaluiphinhai shimpho phangā khalei ra̱khong akha leisai, chi Aramaic tuili Bethesda hoi. ^a a v2 Bethesda kakhalatna 'lukhamashan shim' jina — Jishuna raimi kasā apam chiwui vang khamashung kahai aming akhana. ³Hibingli kazāda kachungkha, mik khangapeo, phei katek kala sheikasha̱bing pida lei. ^b b v3 Khare kapi kahai lairikbingli hili verse 4 maleimana; khaleilaga kapibingna hi chungmihaira: "Kaja atam kaikhali kazingrao akhana ra̱khongli katāda tara̱ thuingasaka; tara̱ thuingasakwui thili kharethang zangkazang mi chi, awui kazā khipākhala chiwui eina raimira." ⁵Apam chili zingkum thumrāda chishat kazā kahai mi akha leisai.

⁶Jishuna ana chili pida lei chi theilaga, sāngnā leihaira kaji theida ali hānga, "Na raikhavai ningngaila?"

⁷Kazāda china ali ngahānkai, "Amei, tara̱ thuingasaka tharan ili ra̱khongli khuizang khavai mi maleimana; ina kazatlakha, mi khangatei akhana kharethang zanghaowa."

⁸Jishuna ali hānga, "Ngakarthuilu, nawui pet khuiphungda zatulu."

⁹Chichangli mipa chi raihaowa, kala awui pet ngava̱khuiphungda zata. Chithang chi Sabbathna.

¹⁰Chieina Jihudibingna raimi kahai mipali hānga, "Hi Sabbathna; nana nawui pet phungkhavai mayāmana."

¹¹Ana athumli ngahānkai, "Ili raimi kahai mipa china ili hānga, 'Nawui pet khuiphungda zatulu.'"

¹²Athumna ali ngahāna, "Nali 'Khuiphungda zatulu' da kahāng mipa chi khipākhala?"

¹³Kha raimi kahai mipa china a khipākhala kaji matheimana, kaja Jishuva apam chili khalei yaruiwui ngachaili ngara̱thuihaowa.

¹⁴Khaleilaga Jishuna ali khorumshimli samphanglaga hānga, "Na ara raimihaira. Latluida morei masāmialu, mha nali khichānkha zakshimeikhar chi mashokpaishina."

¹⁵Mipa china vālaga, ali raimi kahai chi Jishuna kajina da Jihudibingli hānga.

Athumna Jishuli Ngarar

¹⁶Chieina Jihudibingna Jishuli rekharek sai, khiwui vangkhala kaja ana Sabbaththang hibing sāsai.

¹⁷Kha Jishuna athumli ngahānkai, "Iwui Avāna aja eina tangda otsakchinga, kala Ila otsakna."

¹⁸Chieina Jihudibingna ali shaothat khavai chungmeida phai: ana Sabbath kaikahai maningla, ithumwui Avāli akhalattawui Avā da hoi, kala akhalatta ali ngaraikachā sai. ^c c v18 Jihudiwui akhavābingna Jishuwui tui chi khamayā thāda shai: ana ithumwui Avāli akhalattawui Avā da hoi tharan, ana ithumwui Avā eina a ngaraikachā jida hānga kajina. Chapter hiwui kateibing chi Jishuna chi kahāng chi nganingda hāngkhalatta kaji china.

¹⁹Chieina Jishuna athumli hānga, "Kachangkhat eina ina nathumli kahāngna, Anaomayarana a khalattawui sāshap eina khiotkha masārarmara, kha Avāna ot kasā ana theikahai chi maningla masāmana. Avāna khi sāra kaji Anaomayarana tākam eina sāra.

²⁰"Kaja Avāna Anaomayarali leishiya kala ana ot sākahai saikora chi alila theingasaka; hibing hi eina reikhamei ot ali theingasakra, chieina nathum matakhakhaira. ²¹Kaja Avāna kathili ringngasak kala kharing mila thāda, Anaomayaranala a ningkachāng mili kharing mira. ²²Kaja Avāna khipālikha bichar masāmana, kha bichar saikora Anaomayarali horsangmihaira, ²³chieina mi saikorana Avāli khayāshi thāda Anaomayaralila khayāshira; Anaomayarali makhayāshia china ali kashirāta Avālila makhayāshina.

²⁴Kachangkhat eina ina nathumli kahāngna, kachikathāna iwui tui shālaga ili kashirāta chili shitkasanga china katang makhavai kharing lei, kala bicharli mavāmara, kaja ana kathiwui eina kharingli kanshokmihaira. ²⁵Kachangkhat eina ina nathumli kahāngna, pung akha rāra, kala ara rāhaira, chi pung chili kathebingna ithumwui Avāwui Naomayarawui akhon shāra, kala kashābingna ringra. ²⁶Kaja Avāna a khalattawuitungli kharing lei thāda, Anaomayaralila a khalattawuitungli kharing leikhavai mihaira. ²⁷Kala ana alila bichar sākhavai pangshap mihaira, kaja a miwui Naomayarana. ²⁸Hi eina mamatakhakhaialu, kaja pung akha rārali, chi pung chili chikhurli khalei saikorana awui akhon shāra, ²⁹kala kaphā ot kasābing chi kharingawui ringkhaluili, makaphā kasābing chi bicharwui ringkhaluili shokra. ³⁰I khalattawui sāshap eina khiotkha masārarmara. Ina kashā thāda bichar sāna; iwui bichar khamashungana, kaja I khalattawui ningkachāng maphāmana, kha ili kashirāta chiwui ningkachāng phāda lei.

Anaomayarawui shākhibing

³¹"I khalattawui shākhi milala, iwui shākhi hi kānkhanā maleimana. ³²Iwui vang shākhi mi khangatei akha lei, kala iwui vang awui shākhi hi khamashungna da ina thei. ³³Nathumna Johnli paomebing chihovā, kala ana khamashung chili shākhi mihaira. ³⁴Ina miwui shākhi khuisanga da maningmana, kha nathum kahui samphangpai khavai ina hibing hi hāngna. ³⁵John hi sharkāda kahora thaomei akhana, kala nathum atam kasha̱khawui vang awui kahorli ringphā khavai ningngaihaowa. ³⁶Kha ina Johnwui eina reikhameiya shākhi lei: iwui Avāna ili sākup khavai mikahai, ina ara kasāsā otbing china iwui Avāna ili kashirāta kaji shākhina. ³⁷Kala ili kashirāta iwui Avā a khalattana iwui vang shākhi mihaira. Nathumna awui khon mashārang, awui azakkhala matheiranga, ³⁸kala nathumli awui tui ngasoda maleimana, kaja ana kashirāta chili nathumna mashitsangmana.

³⁹Nathumna Kathara Lairikli katang makhavai kharing lei da phaninglaga chi phā; kha chibing khalattana iwui vang shākhi mi, ⁴⁰kha kharing samphang khavai nathumna iwuili rāda makhuimana. ⁴¹Ina mibingwui eina tekhamatei makhuimana, ⁴²kha ina nathumli theiya: nathumwui wuklungli ithumwui Avāwui leikashi maleimana. ⁴³Ina iwui Avāwui ming eina rāhaira, kha nathumna ili makhuisangmana; kalikha khangatei akha awui khalattawui ming eina raakha, ali nathumna khuisangra. ⁴⁴Nathumna akha eina akhawui eina tekhamatei khuisangda, kala Vare akhamāngwui eina tekhamatei chi maphāmana, kathada nathumna shitsangrakhala?

⁴⁵Ina nathumli iwui Avāwui mangāli khayon phenra da mathaalu. Nathumna ali chihāna kahai Moses china, nathumli khayon phena. ⁴⁶Kaja kalikha nathumna Mosesli shitsangakha, ili shitsangda kajina, khikhalajila ana iwui vang kapihaira. ⁴⁷Kha kalikha nathumna awui kapikahaibing mashitsangakha, kathada nathumna iwui tui shitsangrakhala?"