John 4

4 ¹Chieina Jishuna Johnli reikhameiya sākhangatha̱ sāda ra̱hikmi kaji Phariseebingna shāhaira da theilaga, ²(thoukai ra̱hikmikasāpā hi Jishu akhalatta maningla, kha awui sākhangatha̱bingna ra̱hikmi), ³ana Judeawui eina thuihailaga Galileeli latunga. ⁴Kala ana Samariali kānda vāphalungra. ⁵Chieina ana Jacobna awui naomayara Josephli mikahai lui nganaili khalei Samariawui Sychar kaho keinung akhali rai. ⁶Jacobwui ra̱khong hi apamli leisai. Jishuna kha̱ram vaiwui vang khananglākhaida ra̱khong pheili apamzanga. Chi ngashun katā atamlina. ^a a v6 Ngathorwui eina mashingda, pung katharuk chi ngashun katā eina.

⁷Samariawui preiva̱ akhana tara̱ sokkhavai rai. Jishuna ali hānga, "Ili khamimanglu."

⁸(Kaja awui sākhangatha̱bingna kashakazā lokhavai keinungli taihaira.).

⁹Samarianao preiva̱ china hānga, "Na Jihudinaona; khisāda nana I Samarianao preiva̱ akhali khamang khavai kahāngkhala?" (Jihudibingna Samarianaobingli mangasomana.).

¹⁰Jishuna ali ngahānkai, "Nana ithumwui Avāwui lemmet, kala 'Ili khamimanglu' da nali kahāngapā hi khipākhala kaji theisi kaje, nana ali poli, kala ana nali kharinga tara̱ misi."

¹¹Preiva̱ china ali hānga, "Amei, nana tara̱ sokkhavai khikha maleithu, kala ra̱khong hi kathukna. Chithākha na kharinga tara̱ hi kachiwui eina samphangrakhala? ¹²Ithumli ra̱khong mikahai, a khalattala awui naomayarabingla awui sha̱keila chiwui eina kamanga, ithumwui avā Jacobli na reimeila?"

¹³Jishuna ali hānga, "Tara̱ hi manga mi kachiva̱ latluida ra̱changra, ¹⁴kha ina ali mikahai tara̱ manga mi chi katang mara̱changlakmara; chi tara̱ chi awui alungli katang makhavai kharingvāk okshoka tara̱wui ura̱ok akha onra."

¹⁵Preiva̱ china ali hānga, "Amei, tara̱ hi ili khamilu, ina ra̱changhaipaishina, kala hishong tara̱ sokkhavai rāhaipaishina."

¹⁶Jishuna ali hānga, "Vāda nagahara holu, kala hishong latunglu."

¹⁷Preiva̱ china ngahānkai, "Igahara maleimana." Jishuna ali hānga, "Nagahara maleimana da nana kahāng hi mashunga.

¹⁸Kaja nana gahara phangā leihairasai, kala ara nawui ngasoda leiakha mipa hi nawui gahara maningmana. Chi nana khamashung hānghaira."

¹⁹Preiva̱ china ali hānga, "Amei, na marān akhana da ina theihaira. ²⁰Ithumwui avā ngarāna kaphung hili khoruma, kha nana Jerusalemli mibingna khorumphalungra da hānga."

²¹Jishuna ali hānga, "Sha̱nao, ili shitsanglu; atam akha kharāla, chitharan nathumna kaphung hilila Jerusalemlila Avāli makhorumluimara. ²²Nathumna matheiakha chi khoruma; ithumna theiakha chi khoruma, kaja huikhami hi Jihudibingwui eina kharāna. ²³Kha atam kharāla, kala ara leihaira, chitharan khamashung khokharumbingna Avāli manglā kala khamashung eina khorumra, kaja Avāna hikathā khokharumbing phāda lei. ²⁴Avā hi manglāna, kala ali khokharumabingna manglā kala khamashung eina khorumphalungra." ^b b v24 Apong hi katonga eina Jishuna Avāli khorumwui pongli tamchithei; ashiya manglā kahai chi, khamashung khokharumabing kaphā Avā chi ngasoda akhāna.

²⁵Preiva̱ china ali hānga, "Messiah, Khrista da hora chi, rārāli kaji ina thei. Ana rārā tharan, ithumli ot saikora hāngmira."

²⁶Jishuna ali hānga, "Nali khamatui chi ilaka."

²⁷Chitharan awui sākhangatha̱bing latunghaowa, ana sha̱nao akhali chān ngazek chi theilaga matakhakhai. Chithālala khipānakha "Khi ngasakngaikhala?" lah "Khisāda ali chān ngazekkhala?" da mahāngmana. ²⁸Chieina preiva̱ china awui tara̱ham chi horhailaga keinungli latunghaowa, kala mibingli hānga, ²⁹"Ralu, ina sākahai saikora ili hāngkhame mi akhali yanglu. Hi Khrista maningkhala?" ³⁰Athumna keinung chi horhaida awuili rāsai.

³¹Chitharan sākhangatha̱bingna ali kasatsanga, "Ojā, phazākhuifalu."

³²Kha ana athumli hānga, "Ili shaikhavai kashakazā akha lei, chi nathumna matheimana."

³³Chieina sākhangatha̱bingna akha eina akha hāngngaroka, "Khipānakha ali shaikhavai khikha khuirāhairala?"

³⁴Jishuna athumli hānga, "Iwui kashakazā hi, ili kashirāta chiwui kaphaning sākhavai kala awui ot sākuphaikhavaina. ³⁵Nathumna, 'Kachāng mati leisālala, chieina māhā rāra' da mahāngmala? Yanglu, ina nathumli kahāngna: nathumwui mik khāngkāda luibing yanglu; māhā hāt khavai kachar ngasākhairasai. ³⁶Arui mā kahātana ngalang samphanga kala katang makhavai kharing khavai athei kazipkhui, chieina lingkasanga eina mā kahāta ngasoda mathānphalungra. ³⁷Kaja hili chānjam tui hi khamashunga: 'Akhana lingsanga kala khangatei akhana hātkhui.' ³⁸Nathumna ot masākapai chi hātkhui khavai ina nathumli chihovai. Kateibingna ot sai, kala nathumna athumwui otli zanghaira."

Samariawui Mibingna Shitsanga

³⁹Keinung chiwui Samaria mi kachungkhana 'Ina sākahai saikora ana ili unghānga' da sha̱nao china shākhi kasā chiwui vang eina ali shitsanga. ⁴⁰Samaria mibingna awuili rākashung tharan, athumli ngasopamsai khavai poi; kala ana zimiksho khanithang apamsanga. ⁴¹Kala awui tui chiwui vang eina mi kachungkhana shitsangluihaowa. ⁴²Athumna sha̱nao chili hānga, "Ithum shitsangkahai hi nana kahāng chiwui vang eina longa maningmana, kha ithumna kachichā eina shāhaira, kala mi hi kachangkhat eina okathuiwui Huikhame china da ithumna thei."

Galileeli Latunga

⁴³Zimiksho khanithangwui thili ana apam chiwui eina Galileevāk vāhaowa. ⁴⁴(Kaja Jishu khalattana marān khipālikha khalattaramli khamayā maleimana da shākhi mihaira.). ⁴⁵Ana Galileeli vākashung tharan, Galileenaobing ali mathānthathup samngaroka, kaja phanit atamli Jerusalemli ana sākahai saikora athumna theihairasai; athumla phanitli vāhairasai. ⁴⁶Ana tara̱ drakhāra̱li sākahai apam, Galileeli khalei Canali vāluishita. Awungawui akhoka akhawui naomayara Capernaumli kazāhaowa. ⁴⁷Jishu Judeawui eina Galileeli rākahai kaji kashā tharan, ana awuili vāda, awui naomayara thiki jihairasai chi tungda raimi khavai poi.

⁴⁸Chieina Jishuna ali hānga, "Nathumna machutkhui kala matakhak kahai ot matheiakha, nathum mashitsangluimara."

⁴⁹Awungawui akhoka china ali hānga, "Amei, inao mathiranglakha tungralu."

⁵⁰Jishuna ali hānga, "Vālu; nawui naomayara ringra." Mipa china Jishuna ali hāngkahai chi shitsangda vāhaowa.

⁵¹Ana tungda leilakha, awui raobingna ali samphanga, kala awui naoshinao ringda lei kaji ali unghānga. ⁵²Chieina ana kachi pungli araichaohaokhala da athumli ngahāna, kala athumna hānga, "Ayā pung kashineli kakharur chi ali raihaowa."

⁵³Chieina avāva̱na hi chi Jishuna ali "Nanaomayara ringra" da kahāng pung chichang kaji theihaowa. Chieina a kala ashi shimkhur katonga saikorana shitsanga.

⁵⁴Hi chi Jishuna Judeawui eina Galileeli latunglaga sākahai matakhak kahai kakhanena.