Jalan Ngaliwatan Samaria

Capé di sumur Yakub, Yesus ménta nginum ka hiji awéwé Samaria, nyebutkeun bebeneran ngeunaan lima salakina, sarta nawarkeun cai anu jadi cinyusu di jero dirina. Rama milarian jalma-jalma anu nyembah dina roh jeung bebeneran. Sakabéh kotana percaya; budak anu rék maot hirup deui.

Pasal 4.

Waktu Yesus uninga yen urang Parisi geus ngadenge yen Anjeunna leuwih loba nyieun jeung ngabaptis murid batan Yahya, (sanajan sabenerna lain Yesus ku anjeun anu ngabaptis, tapi murid-murid-Na), Anjeunna angkat ti Yudea, tuluy mulih deui ka Galilea. Jeung Anjeunna kudu ngaliwatan wewengkon Samaria. Tuluy Anjeunna dugi ka hiji kota di Samaria anu ngaranna Sikar, deukeut kebon anu ku Yakub geus dibikeun ka Yusup putrana. Di dinya aya sumur Yakub. Yesus anu geus cape ku lampah, calik di sisi sumur—kira-kira tengah poe. ^a

Aya hiji awewe Samaria datang rek nyiuk cai. Saur Yesus ka manehna, “Bere Kami cai inum.”

(Sabab murid-murid-Na keur arindit ka jero kota meuli kadaharan.)

Ceuk awewe Samaria tea, “Anjeun teh urang Yahudi, naha bet menta cai inum ka abdi, awewe Samaria?” (Da urang Yahudi mah teu campur gaul jeung urang Samaria.)

Waler Yesus, “Lamun maneh nyaho kana paparin ti Rama urang, jeung saha ieu anu menta, ‘Bere Kami cai inum,’ tangtu maneh anu rek menta ka Anjeunna, sarta maneh bakal dibere cai hirup ku Anjeunna.”

Ceuk awewe tea, “Juragan, Juragan teu gaduh pakakas pikeun nyiuk, sumurna ge jero. Ti mana atuh Juragan kagungan cai hirup teh? Naha Juragan teh langkung ageung ti batan karuhun abdi sadaya, Yakub, anu maparin ieu sumur ka abdi sadaya, anu nginum tina ieu sumur, kitu deui putra-putrana jeung sato ingon-ingonna?”

Waler Yesus, “Sing saha bae anu nginum cai ieu, bakal halabhab deui, tapi sing saha anu nginum cai paparin Kami, moal halabhab-halabhab deui salalanggengna; cai eta teh di jero dirina bakal jadi hiji sumber cai anu ngaburial maju kana hirup langgeng.”

Ceuk awewe tea, “Juragan, mugi abdi dipaparin cai eta, supados abdi henteu halabhab deui sareng teu kedah deui ka dieu nyiuk cai.”

Saur Yesus, “Jung, geuwat calukan salaki maneh, tuluy ka dieu deui.”

Walon awewe tea, “Abdi teu gaduh salaki.” Saur Yesus, “Bener omongan maneh yen maneh euweuh salaki.

Sabab maneh geus lima kali boga salaki, jeung lalaki anu ayeuna aya di maneh teh lain salaki maneh. Omongan maneh teh enya.”

Ceuk awewe tea, “Juragan, ras ka abdi yen Juragan teh hiji nabi. Karuhun abdi sadaya ngabakti di ieu gunung, namung Juragan nyarios yen di Yerusalem tempatna jalma kudu ngabakti.”

Saur Yesus, “Nyai, percaya ka Kami: bakal datang waktuna maneh ngabakti ka Rama teh lain di ieu gunung, lain oge di Yerusalem. Maraneh ngabakti ka anu teu dipikanyaho ku maraneh; ari kami mah ngabakti ka anu geus dipikanyaho—sabab kasalametan teh asalna ti urang Yahudi. Tapi bakal datang waktuna, malah ayeuna oge geus datang, nya eta jalma-jalma anu ngabakti saenyana bakal ngabakti ka Rama dina roh jeung kayaktian—sabab Rama teh milari jalma-jalma anu ngabakti sakitu. Rama teh Roh, sarta sing saha anu ngabakti ka Mantenna kudu ngabakti dina roh jeung kayaktian.” ^b

Ceuk awewe tea, “Abdi terang yen Mesias—anu disebut Kristus—bakal sumping. Dina sumping-Na, Anjeunna bakal nerangkeun sagala perkara ka abdi sadaya.”

Saur Yesus, “Nya Kami anu dimaksud teh—anu keur nyarita jeung maneh ayeuna.”

Harita keneh murid-murid-Na baralik, kacida hemengeunana nenjo Anjeunna keur nyarita jeung awewe. Tapi taya saurang ge anu wani nanya, “Milari naon?” atawa, “Ku naon nyarios sareng manehna?” Tuluy awewe tea ninggalkeun kendina, balik deui ka kota, pok ngomong ka jalma-jalma, “Hayu urang nenjo hiji jalma anu geus nyaritakeun sagala kalakuan kuring ka kuring. Naha bisa jadi Anjeunna teh Kristus?” Jalma-jalma tuluy kalaluar ti kota, datang ka Anjeunna.

Samemeh kitu, murid-murid-Na ngadesek, “Rabi, mangga tuang.”

Tapi waler Anjeunna, “Kami mah boga kadaharan anu teu kanyahoan ku maraneh.”

Murid-murid tuluy silih tanya, “Naha aya anu geus mawakeun tuangeun ka Anjeunna?”

Saur Yesus, “Kadaharan Kami teh nya eta ngalampahkeun pangersa Anu ngutus Kami jeung ngarengsekeun pagawean-Na. Lain maraneh sok ngomong, ‘Opat bulan deui, kakara datang usum panen’? Tengetkeun, ceuk Kami ka maraneh: tanggahkeun maraneh, tenjo kebon-kebon—geus bodas sadia dipanen. Anu ngala geus narima buruhan, ngumpulkeun buah pikeun hirup langgeng, supaya anu melak jeung anu ngala bisa babarengan suka bungah. Sabab di dieu nyata benerna paribasa: ‘Anu saurang melak, anu saurang deui ngala.’ Kami geus ngutus maraneh pikeun ngala tina anu lain hasil gawe maraneh. Batur anu digarawe, ari maraneh ngilu ngasaan hasil gawena.”

Urang Samaria Palercaya

Loba urang Samaria ti kota eta anu palercaya ka Anjeunna, ku lantaran paniten awewe tea: “Anjeunna geus nyaritakeun sagala kalakuan kuring ka kuring.” Sanggeus urang Samaria daratang ka Anjeunna, maranehna menta supaya Anjeunna kersa mondok di maranehna; tuluy Anjeunna mondok dua poe di dinya. Jeung beuki loba deui anu palercaya ku lantaran pangandika-Na. Ceuk maranehna ka awewe tea, “Ayeuna mah percaya kami teh lain ku lantaran omongan maneh—da kami geus ngadenge sorangan, jeung kami nyaho yen Anjeunna teh saenyana Jurusalamet jagat.”

Mulih ka Galilea

Sanggeus dua poe, Anjeunna angkat ti dinya ka Galilea. (Sabab Yesus ku anjeun geus nyaksian yen hiji nabi teh teu diajenan di lemah caina sorangan.) Waktu Anjeunna sumping ka Galilea, urang Galilea narima kalawan bungah, sabab geus narenjo sagala anu dipidamel ku Anjeunna di Yerusalem waktu pesta—da maranehna oge milu ka pesta tea. Anjeunna sumping deui ka Kana di Galilea, tempat Anjeunna geus ngarobah cai jadi anggur. Harita aya hiji gegeden raja anu boga anak lalaki gering di Kapernaum. Sanggeus ngadenge yen Yesus geus sumping ti Yudea ka Galilea, manehna nepangan Anjeunna, menta kalawan nyuhunkeun pisan supaya Anjeunna kersa lungsur nyageurkeun anakna anu geus rek maot.

Saur Yesus ka manehna, “Lamun maraneh teu narenjo tanda-tanda jeung mujijat, moal-moal percaya.”

Unjuk gegeden tea, “Juragan, mugi lungsur samemeh pun anak maot.”

Saur Yesus, “Jung balik; anak maneh bakal hirup.” Eta jalma percaya kana saur Yesus tea, tuluy indit.

Sabot keur di jalan mudun, bujang-bujangna mapagkeun, ngabejaan yen anakna hirup. Tuluy manehna nanya iraha mimiti cageurna, tembal maranehna, “Kamari jam katujuh muriangna leungit.”

Ti dinya eta bapa nyaho yen harita pisan waktuna Yesus nyarios, “Anak maneh bakal hirup.” Tuluy manehna saeusi imahna kabeh palercaya.

Ieu teh tanda mujijat anu kadua anu dipidamel ku Yesus sanggeus Anjeunna sumping ti Yudea ka Galilea.