John 6

Chapter 6.

6 ¹Chiwui thili Jishuna Tiberias shamadru kaho Galilee shamadru chi kānkai. ²Mi kachungkhana awui thi shura, kaja ana kakazānaobingli sāhai machut chi athumna thei. ³Jishuna kaphungli kāda, awui sākhangatha̱bingli ngasoda apam chili pama. ⁴Chitharan Jihudiwui phanit, Makānkhami Phanit chi nganailakhairasai.

⁵Munlak eina Jishuna mi kachungkha awuili rākharā chi theilaga, Philipli hānga, "Mi hibingna zākhavai khamui ithumna khaikho eina valokhuikhala?"

⁶Philipli chāng tamkhavai ana hi hānga, kaja ana khi sarakhala kaji ana khalatta theisera.

⁷Philipna ali ngahānkai, "Lupā shākha khaniwui khamuina mi kachiva̱na kateokha samphang khavai mashālakmana." ^a a v7 Lupā akha chi thangkachiwui ngalang shakha sai; lupā shākha khani chi kachāng hangtthangwui samkaphang shakha sai.

⁸Awui sākhangatha̱bing ngachaili akha, Simon Peterwui agato Andrewna, ali hānga, ⁹"Hili yaonao akhawui pāngli yaoyi khamui phangā kala khai khani lei. Kha mi hiyakhawui vang hi khikha maningkhala?"

¹⁰Jishuna hānga, "Mibingli pamngasaklu." Apam chili khawo tarākha phorsai, chieina mi mashing thing phangā shakha pama.

¹¹Chieina Jishuna khamui chi khuilaga ningkashi seihā sai, kala pamda leiping chili ngayarmi; chithada khai chila athumna ningkachāng khavāt thada ngayarmi.

¹²Athum penlakhaowa eina, ana awui sākhangatha̱bingli hānga, "Katai kaham chi kazipkhuilu, khikha mashimān jina."

¹³Chieina mibingna shai kahaiwui thili, yaoyi khamui phangāwui katai chi athumna kazipkhui, kala luk tharāda khani pemngasaka. ¹⁴Chieina mibingna ana sāhai machut chi theilaga, athumna hānga, "Hi okathuili rāki Marān chi mashungsera!" ¹⁵Athumna rāda ali tukkhuilaga awunga sākhui khavai khangai chi theilaga, Jishuna latluida kaphungli akhalatta zatthuihaowa.

Sur Kakhaningli

¹⁶Ngazin eina awui sākhangatha̱bing shamadruli tāhaowa, ¹⁷marikhongli kātonglaga shamadru kānkāda Capernaumli vai. Chitharan tangkhamang leihaira, kala Jishuna athumwuili marāsamphangrangsai. ¹⁸Masi panglaka phanda shamadru chi ngasungphoka. ¹⁹Athumna mile kathum ka mati khananglāk eina huihaiwui thili, Jishuna tara̱tungli zatta marikhongvāk nganaira kaji athumna thei, kala ngacheehaowa.

²⁰Kha Jishuna athumli hānga, "Ilaka; mangacheealu."

²¹Chieina athum ali marikhongli khuiung khavai ringphāhaowa, kala hengsāda marikhong chi athumna vāki kaji ngayipheili vashoka.

²²Akhama kathā, ngayi vāklaida katai yarui china apam chili marikhong akhamāng leisai kaji, kala Jishuna awui sākhangatha̱bingli ngasoda chili makātongmana kaji, kha awui sākhangatha̱bing china athum khalatta vaihaowa kaji thei. ²³Marikhong khangateibing china Tiberias eina, Prohona ningkashi mi kahaiwui thili athumna khamui shaipam nganaili rai. ²⁴Chieina yarui china apam chili Jishu eina awui sākhangatha̱bing maleimana kaji theilaga, athum marikhongbingli kātonglaga Jishuli phākhui khavai Capernaumli vai. ²⁵Ngayi vāklaida ali samphangda, athumna hānga, "Ojā, na kachi tharan hili rāhaokhala?"

²⁶Jishuna athumli ngahānkai, "Kachangkhat eina ina nathumli kahāngna, nathumna ili phai kaji machutbing theikahaiwui vangmāng maningmana, kha khamui shaida ningyāng ungkahaiwui vangna. ²⁷Kashimān kahai kashakazāwui vang ot masaalu, kha katang makhavai kharingli tāshunga nganing kashakazāwui vang ot sālu; chi miwui Naomayarana nathumli mira. Kaja ithumwui Avāna ali mahor namhaira."

²⁸Chieina athumna ali hānga, "Ithumwui Avāwui ot sākhui khavai ithumna khi sarakhala?"

²⁹Jishuna athumli ngahānkai, "Ana kashirāta chili nathumna shitkasang hi ithumwui Avāwui ot china."

³⁰Chieina athumna ali hānga, "Ithumna theida nali shitkasang khavai, nana khi machut chithei mira? Nana khi ot sāra? ³¹Ithumwui avā ngarāna lamhāngli manna shai, hithada kapihaida lei: 'Ana athumli shaikhavai kazingram eina khamui mizai.'"

³²Jishuna athumli hānga, "Kachangkhat eina ina nathumli kahāngna, Mosesna nathumli kazingram eina khamui chi mimana, iwui Avāna nathumli kazingram eina akachanga khamui mira. ³³Kaja ithumwui Avāwui khamui chi kazingram eina katā kala okathuili kharing khami chilaka."

³⁴Chieina athumna ali hānga, "Proho, khamui hi ithumli atam kachida khamilu."

³⁵Jishuna athumli hānga, "I kharingwui khamuina. Ili kharā mi kachiva̱ kathaila mathaimara; ili shitkasanga mi kachiva̱ ra̱kachangla mara̱changmara. ³⁶Kha ina nathumli hāngkahai thāda, nathumna ili theihaira, laga aruila mashitsangmana. ³⁷Avāna ili mikahai saikora iwuili rāra, kala iwuili kharā mi chili ina makashamshokmira. ³⁸Kaja ina i khalattawui ning sākhavai maningla, ili kashirāta chiwui ning sākhavai kazingramwui eina katāhaira. ³⁹Hi ili kashirāta chiwui ning china; chiya, ana ili mikahai saikora ngachaili, ina akhala mashimānngasakmira, kha athum saikorali khangachang zimiksholi ringkhaluingasakra. ⁴⁰Kaja hi iwui Avāwui ning china; chiya, Anaomayarali yangda ali shitkasanga mi kachiva̱na katang makhavai kharing samphangra, kala khangachang zimiksholi ina ali ringkhaluingasakra."

⁴¹Chieina Jihudibingna awui pongli matuisera, kaja ana, "I kazingramwui eina katāhai khamuina" da hānga.

⁴²Athumna hānga, "Hi Josephwui naomayara Jishu, awui avā eina ava̱ ithumna kathei chi maningmala? Kathada ara ana, 'I kazingramwui eina katāhaira' da hāngpairakhala?"

⁴³Jishuna athumli ngahānkai, "Nathum khalatta ngachaili matui chi thāhaolu.

⁴⁴"Ili kashirāta iwui Avāna ali mathānakha, khipākha iwuili marāpaimana, kala ina ali khangachang zimiksholi ringkhaluingasakra. ^b b v44 Jishuli kharā kaji hi ithumwui Avāwui eina thuina — ana awui naongarāli hamsangngasak khavai pangshap eina maningla, phai khavai leikashi eina Anaomayarawui pongli thānya. ⁴⁵Marānbingwui lairikli hithada kapihaida lei: 'Kala athum saikorali ithumwui Avāna tamchitheira.' Avāwui eina shāda tamkhuihaira mi kachiva̱ iwuili rāra. ⁴⁶Awui eina kharā chi maningla, khipākha Avāli matheimana; ana china Avāli theihaira. ⁴⁷Kachangkhat eina ina nathumli kahāngna, shitkasanga mi chi katang makhavai kharing lei. ⁴⁸I kharingwui khamuina. ⁴⁹Nathumwui avā ngarāna lamhāngli manna zai, chithālala athum thihaowa. ⁵⁰Hi kazingramwui eina katāhai khamui china, chi eina mi kachiva̱na chi zāda mathimara. ⁵¹I kazingramwui eina katāhai kharinga khamuina. Hi khamui kazāpa chi mashimānla ringhaora. Okathuiwui kharingwui vang ina mikhavai khamui chi iwui phasāna."

⁵²Chieina Jihudibingna, "Mipā hina kathada awui asā ithumli zākhavai mihairakhala?" da athum akha eina akha malungvātsir eina ngazek ngaroka.

⁵³Jishuna athumli hānga, "Kachangkhat eina ina nathumli kahāngna, nathumna miwui Naomayarawui asā mazāakha kala awui ashee mamangakha, nathumwui lungli kharing maleimana. ⁵⁴Iwui asā zā kala iwui ashee manga mi chi katang makhavai kharing lei, kala khanaowa zimiksholi ina ali raisakra. ⁵⁵Kaja iwui asā chi khamashunga kashakazāna, kala iwui ashee chi khamashunga mangkhavai china. ⁵⁶Iwui asā zā kala iwui ashee manga mi chi iwui lungli ngasāchinga, kala I awui lungli lei. ⁵⁷Kharinga Avāna ili chihovāda kala I Avāwui vang ringa thāda, ili zā mi chila iwui vang ringra. ⁵⁸Hi kazingramwui eina katunga khamui china. Hi navā ngarāna zālaga aruila thipai khamui thāda maningmana. Khamui hi zā mi chi mashimānla ringra."

⁵⁹Jishuna Capernaumwui synagogueli tamchitheida leilakha tui hibing hānga. ⁶⁰Chi kashā eina awui sākhangatha̱bing kachungkhana hānga, "Hi tamkachithei khamarar china. Khipāna chi khuisangra?"

Mi Kachungkha Ngalanhao Tharan

⁶¹Awui sākhangatha̱bingna chiwui pongli ngurngur matuiya kaji theihaoda Jishuna athumli hānga, "Hi eina nathumli malungmavāt ngasakla?

⁶²"Chithākha nathumna miwui Naomayara ana rimeikapta leikasā apamli kakā theiakha khida sarakhala? ⁶³Manglāna kharing mi; asāna khikha maphāsermana. Ina nathumli hāngkahai tui china manglā kala kharing china. ⁶⁴Kha nathumwui ngachaili kaikhana mashitsangmana." Kaja Jishuna haokaphokwui eina thuilaga khipāna mashitkasangkhala kala khipāna ali yansaira̱khala kaji thei. ⁶⁵Kala ana hānga, "Chiwui vang eina ina nathumli hānghaira: Avāna ali pangsang mangasakakha, khipānakha iwuili marārarmara."

⁶⁶Chithang eina thuilaga awui sākhangatha̱bing kachungkhana ngalanhaowa kala ali ngasoda mazatluithuwa.

⁶⁷Chieina Jishuna tharāda khani chili hānga, "Nathumla vākhavai sangaila?"

⁶⁸Simon Peterna ali ngahānkai, "Proho, ithumna khipāli varakhala? Nana katang makhavai kharingwui tui lei. ⁶⁹Ithumna na ithumwui Avāwui Tharkhamathengpā china da shitsanga kala thei."

⁷⁰Jishuna athumli ngahānkai, "Ina nathum tharāda khani chili kapangkhui maningmala? Chithālala nathumwui ngachaili mi akha chi chipeena."

⁷¹Ana Simon Iscariotwui naomayara Judas, tharāda khaniwui ngachaili akha, ali yorzāki kaje chi kahāngna.