John 7

7 ¹Hiwui thili, Jishuna Galilee ngaleili zatvai; ana Judeali vāki chi maphāla, kaja apam chili Jihudiwui akhavābingna ali shaothat khavai atam kachā yangda leisai. ²Kha Jihudiwui Chumpha̱ Phanit chi nganaihairasai. ^a a v2 Chumpha̱ Phanit hi shar atamwui shinithang phanit akhana; chitharan Israelna lamhāngli ringlakhawui zingkumbing phaningungda rāmrahli apamsai. ³Awui achinangarāna ali hānga, "Hi eina zatlaga Judeali vālu, chithākha nawui sākhangatha̱bingla nana kasā ot chi theira. ⁴Phonglāk eina theikhui khangaipā khipānakha kachichāwui ot chi mathumhaimana. Hikathā ot hi na saakha, nakhalattali okathuili chitheilu." ⁵Kaja awui achinangarāna tangdala ali mashitsangmana.

⁶Chieina Jishuna athumli hānga, "I atam marārangsai, kha nathumwui vang atam kachiva̱ phālakhaira.

⁷"Okathuina nathumli maningkachairarmana, kha ili ningkachai, kaja awui ot china makhayāna da ina shākhi mina. ⁸Nathum khalattana phanitli kālu; ina hi phanitli makāmana, kaja I atam kupda marārangsai."

⁹Hi hānglaga, ana Galileeli apama. ¹⁰Awui achināngarā phanitli kākahaiwui thili anala phonglāk eina maningla ngathumda kāhaowa.

¹¹Chieina Jihudiwui akhavābingna phanitli ali phāda leisai, kala "A kachili leikhala?" da ngahāna. ¹²Awui maramli, mi kachungkhawui ngachaili kapumkaseo kachungkha ngayaovai. Kaikhana hānga, "Ana kaphaana," kala khangatei kaikhana hānga, "Maningmana, ana yaruili thānkhangui ngasāra." ¹³Chithālala Jihudiwui akhavābingli khangacheewui vang, khipānakha awui maramli phonglāk eina mahāngmana. ¹⁴Phanit alungli, Jishuna khorumshimli kāhaowa kala tamchitheiphoka.

¹⁵Jihudiwui akhavābing matakhakhaowa, kala ngahāna, "Hi kasā mipa lairik mashurla, kathada hiyākha theirakhala?"

¹⁶Jishuna athumli ngahānkai, "I tamkachithei hi iwui maningla, ili kashirāta chiwui eina kharāna. ¹⁷Ithumwui Avāwui ningyāng sāki kaje china, I tamkachithei hi iwui Avāwui eina kharākhala, kala ina I khalattana hāngkhala kaji theira. ¹⁸Khipānakha khalatta eina hāngakha china khalattawui masot phāda, kha ali kashirāta chiwui masot kaphā a china khamashungana, kala awui lungli mikhanam khikha maleimana. ¹⁹Mosesna nathumli ain khamikahai maningmala? Chithālala nathumwui ngachaili khipānakha ain mamayonmana. Khisāda nathumna ili shaothat khavai phaikhala?"

²⁰Yaruina ngahānkai, "Nali kameo zanga! Khipāna nali shaothat khavai phaikhala?"

²¹Jishuna ngahānkai, "Ina otsak akha sāna, kala nathum saikora matakhakhaira.

²²"Mosesna nathumli ahui rimshok mihaira. Chi Moseswui eina maningla, kha avā ngarābingwui eina kharāna. Kala nathumna Sabbaththang mi akhali ahui rimshokmi. ²³Mi akhana Sabbaththang ahui rimshokakha, Moseswui ain masākakhaipaishina da, chithākha khisāda Sabbaththang mi akha katongali raimikahaiwui vang nathumna ili malungvāthaokhala? ²⁴Shingam eina bichar masā ngaroklu, kha khamashung khangarong eina bichar sālu."

A Kachi Eina Kharā Khala?

²⁵Chieina Jerusalemwui mi kaikhana hānga, "Hi kasā mipā athumna shaothat khavai phaibing chi maningmala? ²⁶Chithālala ana phonglāk eina hānga, kala athumna ali khikha mahāngmana. Hi chi Khrista kajina da khamungabingna kachangkhat theihairala? ²⁷Kha mipā hi kachi eina kharā kaji ithumna thei. Kha Khrista kharā tharan, a kachi eina kharā kaji khipānakha matheimara."

²⁸Chieina Jishuna khorumshimli tamchitheida leilakha, panglāk eina vaoda hānga, "Nathumna ili thei, kala I kachi eina rākhala kajila theihaira. Chithālala ina khalatta eina marāmana; ili kashirāta chi khamashungna, kala nathumna ali matheimana. ²⁹Ina ali thei, kaja ina awui eina kharāna, kala ana ili shirāta."

³⁰Chieina athumna ali tukkhui khavai akhashida salui, kha khipānakha ali mangasāza̱mana, kaja awui atam marārangsai. ³¹Kha yaruiwui ngachaili mi kachungkhana ali shitsangda hānga, "Khrista kharā tharan, mipā hina sākahaiwui lāngda machut kachungkha sārala?" ³²Phariseebingna yaruina awui pongli hithāda kapupta matui kaji shāhaowa, chieina pāngmon akhokabing eina Phariseebingna ali tukkhui khavai khorumshimwui khamayonbing chihovā.

³³Chieina Jishuna hānga, "Ina nathumwuili kasha̱kha leifara, chiwui thili ina ili kashirāta chiwuili vāra. ³⁴Nathumna ili phaira, kha ili maphāmara; kala ina leipam chili nathum marāshaprara."

³⁵Chieina Jihudiwui kathānabingna akha eina akha ngahān ngaroka, "A kali vāki khavai phaninghaira, ithumna ali maphāpairakhala? A Greekbingwui ngachaili kashamvāser kahai ithumwui mibingli vālaga Greekbinglila tamchithei khavai phaninghaira? ³⁶Awui kakhalat khikhala: 'Nathumna ili phāra, kha ili masamphangmara,' kala 'I leipamli nathum marāpaimara'?"

³⁷Phanitwui khanao hakmeikap zimiksholi, Jishuna nganingda panglāk eina vaoda hānga, "Ra̱kachanga mi china iwuili rāda mangkhuiranu. ³⁸Ili shitkasanga mi kachiva̱, kathara tuina hāngkahai thada, awui wuklungwui eina kharinga tara̱ kongbing longra."

³⁹Jishuna hi, ali shitkasangbingna samphangki Manglā Katharawui pongli hānga; Manglā chi mamirangsai, kaja Jishu tekhamatei matheingasakrangsai.

⁴⁰Hi tui shālaga, yaruiwui ngachaili kaikhana hānga, "Hi shokta marānna." ⁴¹Khangatei kaikhana hānga, "Hi Khristana." Kha khangatei kaikhana ngahāna, "Khrista Galileewui eina kathada rāpairakhala? ⁴²Kathara tuina, Khrista Davidwui naotunwui eina kala David kha̱ Bethlehemwui eina rāra da mahāngmarala?" ⁴³Chieina Jishuwui vang eina yarui ngakaikhangarok shokhaowa. ⁴⁴Athumwui ngachaili kaikhana ali tukkhui khavai ngaiya, kha khipānakha ali pāng masomana.

⁴⁵Chieina khorumshimwui khamayonbing chi pāngmon akhokabing eina Phariseebingwuili latunga, kala athumna ngahāna, "Khisāda nathumna ali makhuirāmakhala?"

⁴⁶Khamayonbingna ngahānkai, "Mipa hi kahāng thada khipānakha katharanla mahānghaimana."

⁴⁷"Nathumla chipat ngasakhaira?" da Phariseebingna ngahānkai. ⁴⁸"Kathānabing lah Phariseebingwui ngachaili khipānakha ali shitsanghaira? ⁴⁹Kha ain makathei yarui hi khonkashiwui azingli lei."

⁵⁰Jishuli rida rasamkaphanga, kala athumwui ngachaili akha kasā Nicodemusna athumli hānga, ⁵¹"Ithumwui ainna, mi akhali rida mangashāda, kala ana khi sākhala matheilala eina tangda, khayon mirala?"

⁵²Athumna ngahānkai, "Nala Galilee kha̱wui chila? Phālaga yanglu: Galileewui eina marān akhala mashokmara."

⁵³Chieina athum saikora kachichā shimli ungserhaowa. ^b b v53 Kashok hi Johnwui sākhare kapi kahai lairikbing alungli maleimana, kala thili kapi kahaibingna hi apam khangatei kachungkhali sāhaira. Hili, khare kachāng eina thuikharā kasa̱ ungshungpam chili, ara kapi kahai Bible kachungkhawui thāda kapihaira.