ዮሐንስ 7

7 ¹ከዚህ በኋላ ኢየሱስ በገሊላ ይመላለስ ነበር፤ በይሁዳ ያሉት የአይሁድ መሪዎች ሊገድሉት መንገድ ይፈልጉ ስለ ነበር ወደዚያ መሄድ አልፈለገም። ²የአይሁድ የዳስ በዓል ግን ቀርቦ ነበር። ^a a v2 የዳስ በዓል እስራኤል በምድረ በዳ ያሳለፈውን ዘመን እያሰበ በጊዜያዊ ዳሶች ውስጥ ይኖርበት የነበረ፣ በበልግ ወቅት ለአንድ ሳምንት የሚከበር በዓል ነበር። ³ወንድሞቹም እንዲህ አሉት፤ “ከዚህ ተነሥተህ ወደ ይሁዳ ሂድ፤ ደቀ መዛሙርትህ ደግሞ የምታደርጋቸውን ሥራዎች ያዩ ዘንድ፤ ⁴በግልጥ መታወቅን የሚሻ ማንም ሰው የሚያደርገውን ነገር አይሰውርም። እነዚህን ነገሮች የምታደርግ ከሆነ፣ ራስህን ለዓለም ግለጥ።” ⁵ወንድሞቹ እንኳ በእርሱ አያምኑም ነበርና።

⁶ኢየሱስም እንዲህ አላቸው፤ “የእኔ ጊዜ ገና አልደረሰም፤ ለእናንተ ግን ማናቸውም ጊዜ የተመቸ ነው።

⁷“ዓለም እናንተን ሊጠላ አይችልም፤ እኔን ግን ይጠላኛል፤ ሥራዎቹ ክፉ እንደ ሆኑ እኔ እመሰክርበታለሁና። ⁸እናንተ ራሳችሁ ወደ በዓሉ ውጡ፤ የእኔ ጊዜ ገና ፍጹም ስላልደረሰ፣ እኔ ወደዚህ በዓል አልወጣም።”

⁹ይህን ተናግሮ በገሊላ ቀረ። ¹⁰ወንድሞቹ ወደ በዓሉ ከወጡ በኋላ፣ እርሱ ደግሞ በግልጥ ሳይሆን በስውር ወጣ።

¹¹የአይሁድ መሪዎችም በበዓሉ ላይ ይፈልጉት ነበር፤ “እርሱ የት ነው?” እያሉም ይጠይቁ ነበር። ¹²ስለ እርሱም በሕዝቡ መካከል ብዙ ማጕረምረም ተሰራጨ፤ አንዳንዶች፣ “መልካም ሰው ነው” አሉ፤ ሌሎች ግን፣ “አይደለም፤ ሕዝቡን ያስታል” አሉ። ¹³ነገር ግን ከአይሁድ መሪዎች ፍርሃት የተነሣ ማንም ስለ እርሱ በግልጥ አልተናገረም። ¹⁴በበዓሉ እኩሌታ ገደማ፣ ኢየሱስ ወደ ቤተ መቅደስ ወጥቶ ማስተማር ጀመረ።

¹⁵የአይሁድ መሪዎችም ተደንቀው፣ “ይህ ሰው ሳይማር እንዲህ ብዙ እንዴት ያውቃል?” ብለው ጠየቁ።

¹⁶ኢየሱስም መልሶ እንዲህ አላቸው፤ “ትምህርቴ የእኔ አይደለም፤ ከላከኝ ነው እንጂ። ¹⁷የአባታችንን ፈቃድ ለማድረግ የሚሻ ማንም ሰው፣ ትምህርቴ ከአባቴ እንደ ሆነ ወይም እኔ ከራሴ እንደምናገር ያውቃል። ¹⁸ከራሱ የሚናገር የራሱን ክብር ይሻል፤ የላከውን ክብር የሚሻ ግን እውነተኛ ነው፤ በእርሱም ሐሰት የለም። ¹⁹ሙሴ ሕግን አልሰጣችሁም? ነገር ግን ከእናንተ አንዳችሁ እንኳ ሕጉን አትጠብቁም። ስለ ምን ልትገድሉኝ ትፈልጋላችሁ?”

²⁰ሕዝቡም መልሶ፣ “አንተ ጋኔን አለብህ! ሊገድልህ የሚፈልግ ማን ነው?” አለ።

²¹ኢየሱስም መልሶ፣ “አንድ ሥራ ሠራሁ፤ ሁላችሁም ተደነቃችሁ።

²²“ሙሴ ግዝረትን ሰጣችሁ፤ ከሙሴ ሳይሆን ከአባቶች ነው እንጂ፤ በሰንበትም ሰውን ትገርዛላችሁ። ²³የሙሴ ሕግ እንዳይጣስ ሰው በሰንበት የሚገረዝ ከሆነ፣ በሰንበት ሰውን ሁለንተናውን ጤናማ ስላደረግሁ በእኔ ስለ ምን ትቈጣላችሁ? ²⁴በመልክ መፍረድን ተዉ፤ በቅን ፍርድ ፍረዱ እንጂ።”

እርሱ ከወዴት ነው?

²⁵በዚህ ጊዜ ከኢየሩሳሌም ሰዎች አንዳንዶቹ እንዲህ አሉ፤ “ሊገድሉት የሚፈልጉት ሰው ይህ አይደለምን? ²⁶እነሆ ግን በግልጥ ይናገራል፤ ምንም አይሉትም። አለቆቹ ይህ በርግጥ ክርስቶስ መሆኑን አውቀዋል ይሆንን? ²⁷ነገር ግን ይህ ሰው ከወዴት እንደ ሆነ እናውቃለን። ክርስቶስ በሚመጣ ጊዜ ግን ከወዴት እንደ ሆነ ማንም አያውቅም።”

²⁸ኢየሱስም በቤተ መቅደስ እያስተማረ ድምፁን ከፍ አድርጎ እንዲህ አለ፤ “እኔን ታውቃላችሁ፤ ከወዴት እንደ ሆንሁም ታውቃላችሁ። ነገር ግን ከራሴ አልመጣሁም፤ የላከኝ እውነተኛ ነው፤ እናንተም አታውቁትም። ²⁹እኔ ግን ከእርሱ ዘንድ ስለ ሆንሁ፣ እርሱም ስለ ላከኝ፣ አውቀዋለሁ።”

³⁰ስለዚህ ሊይዙት ፈለጉ፤ ነገር ግን ጊዜው ገና ስላልደረሰ ማንም አልነካውም። ³¹ከሕዝቡ ግን ብዙዎች በእርሱ አመኑ፤ “ክርስቶስ በሚመጣ ጊዜ፣ ይህ ሰው ካደረጋቸው ይልቅ ብዙ ተአምራት ያደርግ ይሆንን?” አሉ። ³²ፈሪሳውያን ሕዝቡ ስለ እርሱ እነዚህን ነገሮች ሲያጕረመርም ሰሙ፤ ስለዚህ የካህናት አለቆችና ፈሪሳውያን ሊይዙት የቤተ መቅደስ ጠባቂዎችን ላኩ።

³³ኢየሱስም እንዲህ አለ፤ “ገና ጥቂት ጊዜ ከእናንተ ጋራ እኖራለሁ፤ ከዚያም ወደ ላከኝ እሄዳለሁ። ³⁴ትፈልጉኛላችሁ አታገኙኝም፤ እኔ ወዳለሁበትም ልትመጡ አትችሉም።”

³⁵የአይሁድ መሪዎችም እርስ በርሳቸው እንዲህ ተባባሉ፤ “የማናገኘው ዘንድ ወዴት ሊሄድ አስቧል? በግሪኮች መካከል ተበትነው ወዳሉ ወገኖቻችን ሄዶ ግሪኮችን ሊያስተምር አስቧልን? ³⁶‘ትፈልጉኛላችሁ አታገኙኝም’ እንዲሁም ‘እኔ ወዳለሁበት ልትመጡ አትችሉም’ ያለው ምን ማለቱ ነው?”

³⁷በበዓሉ የመጨረሻ ታላቅ ቀን፣ ኢየሱስ ቆሞ ጮኾ እንዲህ አለ፤ “ማንም የተጠማ ቢኖር ወደ እኔ መጥቶ ይጠጣ። ³⁸መጽሐፍ እንደ ተናገረ፣ በእኔ የሚያምን ሰው፣ ከልቡ የሕይወት ውሃ ወንዞች ይፈስሳሉ።”

³⁹ይህን ያለው በእርሱ የሚያምኑ ሊቀበሉት ስላላቸው ስለ መንፈስ ቅዱስ ነበር፤ ኢየሱስ ገና ስላልከበረ፣ መንፈስ ገና አልተሰጠም ነበርና።

⁴⁰ከሕዝቡም አንዳንዶች እነዚህን ቃሎች በሰሙ ጊዜ፣ “ይህ በርግጥ ነቢዩ ነው” አሉ። ⁴¹ሌሎች፣ “ይህ ክርስቶስ ነው” አሉ። ሌሎች ግን፣ “ክርስቶስ ከገሊላ እንዴት ሊመጣ ይችላል? ⁴²መጽሐፍ ክርስቶስ ከዳዊት ዘር፣ ከዳዊትም መንደር ከቤተ ልሔም እንዲመጣ አይልምን?” አሉ። ⁴³ስለዚህ በሕዝቡ መካከል ስለ እርሱ መከፋፈል ሆነ። ⁴⁴ከእነርሱም አንዳንዶች ሊይዙት ፈለጉ፤ ነገር ግን ማንም እጁን አልጫነበትም።

⁴⁵የቤተ መቅደሱም ጠባቂዎች ወደ ካህናት አለቆችና ወደ ፈሪሳውያን ተመለሱ፤ እነርሱም፣ “ስለ ምን አላመጣችሁትም?” አሏቸው።

⁴⁶ጠባቂዎቹም መልሰው፣ “እንደዚህ ሰው ማንም ተናግሮ አያውቅም” አሉ።

⁴⁷ፈሪሳውያንም መልሰው፣ “እናንተም ተታልላችኋልን?” አሉ። ⁴⁸“ከአለቆች ወይም ከፈሪሳውያን በእርሱ ያመነ አለን? ⁴⁹ነገር ግን ሕግን የማያውቅ ይህ ሕዝብ የተረገመ ነው።”

⁵⁰ቀድሞ ወደ ኢየሱስ መጥቶ የነበረውና ከእነርሱም አንዱ የሆነው ኒቆዲሞስ፣ እንዲህ ብሎ ጠየቃቸው፤ ⁵¹“ሕጋችን ሰውን አስቀድሞ ሳይሰማውና የሚያደርገውን ሳያውቅ ይፈርድበታልን?”

⁵²እነርሱም መልሰው፣ “አንተ ደግሞ ከገሊላ ነህን? መርምር እይ፤ ከገሊላ ነቢይ አይነሣም” አሉት።

⁵³ከዚያም ሁሉም ወደየቤታቸው ሄዱ። ^b b v53 ይህ ታሪክ በጥንታዊዎቹ የዮሐንስ ቅጆች ውስጥ የለም፤ በኋለኞቹ ቅጆችም በተለያዩ ስፍራዎች ተቀምጦ ይገኛል። እዚህ የታተመው እንደ አብዛኞቹ ዘመናዊ መጻሕፍት ቅዱሳት፣ ትውፊቱ በተረጋጋበት ስፍራ ነው።