ዮሐንስ 6

ምዕራፍ 6።

6 ¹ከዚህ በኋላ ኢየሱስ የጥብርያዶስ ባሕር ተብሎ ወደሚጠራው የገሊላ ባሕር ማዶ ተሻገረ። ²በበሽተኞች ላይ ያደረጋቸውን ምልክቶች ስላዩ ብዙ ሕዝብ ተከተሉት። ³ኢየሱስም ወደ ተራራው ወጥቶ ከደቀ መዛሙርቱ ጋር በዚያ ተቀመጠ። ⁴የአይሁድ በዓል የሆነው ፋሲካም ቀርቦ ነበር።

⁵ኢየሱስም ቀና ብሎ ብዙ ሕዝብ ወደ እርሱ ሲመጣ አየና ፊልጶስን፣ “እነዚህ ሰዎች የሚበሉትን እንጀራ ከወዴት እንገዛለን?” አለው።

⁶ራሱ ሊያደርግ ያለውን አስቀድሞ ያውቅ ነበርና ይህን ያለው ፊልጶስን ሊፈትነው ነበር።

⁷ፊልጶስም መልሶ፣ “እያንዳንዳቸው ትንሽ ትንሽ እንኳ እንዲያገኙ የሁለት መቶ ቀን ደመወዝ የሚያወጣ እንጀራ አይበቃቸውም” አለው። ^a a v7 አንድ ዲናር የአንድ ቀን ደመወዝ ያህል ነበር፤ ሁለት መቶ ዲናር ደግሞ የስምንት ወር ያህል ደመወዝ ነበር።

⁸ከደቀ መዛሙርቱም አንዱ የስምዖን ጴጥሮስ ወንድም እንድርያስ እንዲህ አለው፤ ⁹“አምስት የገብስ እንጀራና ሁለት ዓሣ ያለው አንድ ብላቴና በዚህ አለ፤ ነገር ግን ይህ ለእነዚህ ሁሉ ምን ይሆናል?”

¹⁰ኢየሱስም፣ “ሰዎቹን አስቀምጧቸው” አለ። በዚያም ብዙ ሣር ነበረ፤ ስለዚህ አምስት ሺህ ያህል ሰዎች ተቀመጡ።

¹¹ከዚያም ኢየሱስ እንጀራውን አንሥቶ አመሰገነ፤ ለተቀመጡትም አከፋፈለ፤ እንዲሁም ከዓሣው እንደ ፈለጉት ያህል ሰጣቸው።

¹²ከጠገቡም በኋላ ደቀ መዛሙርቱን፣ “አንዳች እንዳይጠፋ የተረፈውን ቍርስራሽ ሰብስቡ” አላቸው።

¹³ስለዚህ ሰዎቹ ከበሉ በኋላ ከአምስቱ የገብስ እንጀራ የተረፈውን ቍርስራሽ ሰበሰቡ፤ ዐሥራ ሁለት መሶብም ሞሉ። ¹⁴ሰዎቹም ያደረገውን ምልክት ባዩ ጊዜ፣ “ይህ በእውነት ወደ ዓለም የሚመጣው ነቢይ ነው!” አሉ። ¹⁵ኢየሱስም መጥተው ሊይዙትና ሊያነግሡት እንዳሰቡ ዐውቆ ዳግመኛ ብቻውን ወደ ተራራ ፈቀቅ አለ።

ወደ ማዕበሉ መካከል

¹⁶በመሸም ጊዜ ደቀ መዛሙርቱ ወደ ባሕሩ ወረዱ፤ ¹⁷ወደ ታንኳም ገብተው ባሕሩን ተሻግረው ወደ ቅፍርናሆም አመሩ። አስቀድሞም ጨልሞ ነበር፤ ኢየሱስም ገና ወደ እነርሱ አልመጣም ነበር። ¹⁸ኀይለኛ ነፋስም ይነፍስ ነበር፤ ባሕሩም ተናወጠ። ¹⁹ሦስት ወይም አራት ማይል ያህል ከቀዘፉ በኋላ ኢየሱስ በውሃው ላይ እየተራመደ ወደ ታንኳዪቱ ሲቀርብ አዩና ፈሩ።

²⁰እርሱ ግን፣ “እኔ ነኝ፤ አትፍሩ” አላቸው።

²¹ስለዚህ ወደ ታንኳዪቱ ሊያስገቡት ተደሰቱ፤ ታንኳዪቱም ወዲያውኑ ወደሚሄዱበት ዳርቻ ደረሰች።

²²በማግስቱ በባሕሩ ማዶ ቀርቶ የነበረው ሕዝብ በዚያ ከአንዲት ታንኳ በቀር ሌላ አለመኖሩን፣ ኢየሱስም ከደቀ መዛሙርቱ ጋር በታንኳዪቱ አለመሳፈሩን፣ ነገር ግን ደቀ መዛሙርቱ ብቻቸውን መሄዳቸውን አየ። ²³ጌታ ካመሰገነ በኋላ እንጀራ ወደ በሉበት ስፍራ አቅራቢያ ከጥብርያዶስ ሌሎች ታንኳዎች መጡ። ²⁴ስለዚህ ሕዝቡ ኢየሱስም ሆነ ደቀ መዛሙርቱ በዚያ አለመኖራቸውን ባየ ጊዜ፣ ወደ ታንኳዎች ገብተው ኢየሱስን ለመፈለግ ወደ ቅፍርናሆም ሄዱ። ²⁵በባሕሩም ማዶ ባገኙት ጊዜ፣ “ረቢ፣ ወደዚህ መቼ መጣህ?” አሉት።

²⁶ኢየሱስም መልሶ፣ “እውነት እውነት እላችኋለሁ፤ የምትፈልጉኝ ምልክቶችን ስላያችሁ ሳይሆን እንጀራውን በልታችሁ ስለ ጠገባችሁ ነው። ²⁷ለሚጠፋ ምግብ ሳይሆን ለዘላለም ሕይወት ለሚኖር ምግብ ሥሩ፤ ይህንም የሰው ልጅ ይሰጣችኋል። አባታችን ማኅተሙን ያተመበት እርሱ ነውና።”

²⁸ከዚያም እርሱን፣ “የአባታችንን ሥራ ለመሥራት ምን እናድርግ?” አሉት።

²⁹ኢየሱስም መልሶ፣ “የአባታችን ሥራ ይህ ነው፤ በላከው ሰው እንድታምኑ ነው” አላቸው።

³⁰ስለዚህ እርሱን እንዲህ አሉት፤ “ታዲያ አይተን እንድናምንህ ምን ምልክት ታሳያለህ? ምን ሥራ ትሠራለህ? ³¹አባቶቻችን ‘ከሰማይ እንጀራ እንዲበሉ ሰጣቸው’ ተብሎ እንደ ተጻፈ፣ በምድረ በዳ መና በሉ።”

³²ኢየሱስም፣ “እውነት እውነት እላችኋለሁ፤ ከሰማይ የሆነውን እንጀራ የሰጣችሁ ሙሴ አይደለም፤ ከሰማይ የሆነውን እውነተኛ እንጀራ የሚሰጣችሁ አባቴ ነው። ³³የአባታችን እንጀራ ከሰማይ የሚወርደውና ለዓለም ሕይወትን የሚሰጠው እርሱ ነውና።”

³⁴ስለዚህ እርሱን፣ “ጌታ ሆይ፣ ይህን እንጀራ ዘወትር ስጠን” አሉት።

³⁵ኢየሱስም፣ “የሕይወት እንጀራ እኔ ነኝ። ወደ እኔ የሚመጣ ከቶ አይራብም፤ በእኔ የሚያምን ከቶ አይጠማም። ³⁶ነገር ግን እንደ ነገርኋችሁ፣ አይታችሁኛል፤ ይሁን እንጂ አታምኑም። ³⁷አብ የሚሰጠኝ ሁሉ ወደ እኔ ይመጣል፤ ወደ እኔም የሚመጣውን ከቶ አላወጣውም። ³⁸የራሴን ፈቃድ ለማድረግ ሳይሆን የላከኝን ፈቃድ ለማድረግ ከሰማይ ወርጃለሁና። ³⁹የላከኝም ፈቃድ ይህ ነው፤ ከሰጠኝ ሁሉ አንዱን እንኳ ሳላጠፋ በመጨረሻው ቀን እንዳስነሣው ነው። ⁴⁰የአባቴ ፈቃድ ይህ ነውና፤ ወደ ወልድ የሚመለከትና በእርሱ የሚያምን ሁሉ የዘላለም ሕይወት እንዲኖረው ነው፤ እኔም በመጨረሻው ቀን አስነሣዋለሁ።”

⁴¹ስለዚህ አይሁድ፣ “ከሰማይ የወረደ እንጀራ እኔ ነኝ” ስላለ ስለ እርሱ አጕረመረሙ።

⁴²እነርሱም፣ “ይህ አባቱንና እናቱን የምናውቀው የዮሴፍ ልጅ ኢየሱስ አይደለምን? ታዲያ አሁን፣ ‘ከሰማይ ወርጃለሁ’ እንዴት ሊል ይችላል?” አሉ።

⁴³ኢየሱስም መልሶ፣ “እርስ በርሳችሁ ማጕረምረማችሁን ተዉ።

⁴⁴“የላከኝ አብ ካልሳበው በቀር ማንም ወደ እኔ ሊመጣ አይችልም፤ እኔም በመጨረሻው ቀን አስነሣዋለሁ። ^b b v44 ወደ ኢየሱስ መምጣት የአባታችን አነሣሽነት ነው፤ እርሱ ልጆቹን ወደ ወልድ የሚስበው በሚያስገድድ ኀይል ሳይሆን በሚከታተል ፍቅር ነው። ⁴⁵በነቢያት መጽሐፍ፣ ‘ሁሉም ከአባታችን ይማራሉ’ ተብሎ ተጽፏል። ከአብ የሰማና የተማረ ሁሉ ወደ እኔ ይመጣል። ⁴⁶ከአብ ዘንድ ከመጣው በቀር አብን ያየ ማንም የለም፤ እርሱ አብን አይቷል። ⁴⁷እውነት እውነት እላችኋለሁ፤ የሚያምን የዘላለም ሕይወት አለው። ⁴⁸የሕይወት እንጀራ እኔ ነኝ። ⁴⁹አባቶቻችሁ በምድረ በዳ መና በሉ፤ ነገር ግን ሞቱ። ⁵⁰ሰው ከእርሱ በልቶ እንዳይሞት ከሰማይ የሚወርደው እንጀራ ይህ ነው። ⁵¹ከሰማይ የወረደ ሕያው እንጀራ እኔ ነኝ። ይህን እንጀራ የሚበላ ለዘላለም ይኖራል። የምሰጠውም እንጀራ ለዓለም ሕይወት የምሰጠው ሥጋዬ ነው።”

⁵²ከዚያም አይሁድ፣ “ይህ ሰው ሥጋውን ልንበላ እንዴት ሊሰጠን ይችላል?” እያሉ እርስ በርሳቸው አጥብቀው ተከራከሩ።

⁵³ኢየሱስም፣ “እውነት እውነት እላችኋለሁ፤ የሰው ልጅን ሥጋ ካልበላችሁ ደሙንም ካልጠጣችሁ በራሳችሁ ሕይወት የላችሁም። ⁵⁴ሥጋዬን የሚበላ ደሜንም የሚጠጣ የዘላለም ሕይወት አለው፤ እኔም በመጨረሻው ቀን አስነሣዋለሁ። ⁵⁵ሥጋዬ እውነተኛ ምግብ፣ ደሜም እውነተኛ መጠጥ ነውና። ⁵⁶ሥጋዬን የሚበላ ደሜንም የሚጠጣ በእኔ ይኖራል፤ እኔም በእርሱ እኖራለሁ። ⁵⁷ሕያው አብ እንደ ላከኝ እኔም ስለ አብ ሕያው እንደ ሆንሁ፣ እንዲሁ እኔን የሚበላ ስለ እኔ ሕያው ይሆናል። ⁵⁸ከሰማይ የወረደ እንጀራ ይህ ነው። አባቶቻችሁ እንደ በሉትና እንደ ሞቱት እንጀራ አይደለም። ይህን እንጀራ የሚበላ ለዘላለም ይኖራል።”

⁵⁹ይህንም በቅፍርናሆም ምኵራብ ሲያስተምር ተናገረ። ⁶⁰ከደቀ መዛሙርቱም ብዙዎቹ ይህን በሰሙ ጊዜ፣ “ይህ የሚከብድ ትምህርት ነው፤ ሊቀበለው ማን ይችላል?” አሉ።

ብዙዎች ወደ ኋላ ሲመለሱ

⁶¹ኢየሱስም ደቀ መዛሙርቱ ስለዚህ ነገር እንደሚያጕረመርሙ ዐውቆ እንዲህ አላቸው፤ “ይህ ያሰናክላችኋልን?

⁶²“ታዲያ የሰው ልጅ ቀድሞ ወደ ነበረበት ሲወጣ ብታዩ እንዴት ይሆናል? ⁶³ሕይወትን የሚሰጥ መንፈስ ነው፤ ሥጋ ለምንም አይጠቅምም። የነገርኋችሁ ቃሎች መንፈስና ሕይወት ናቸው። ⁶⁴ነገር ግን ከእናንተ የማያምኑ አሉ።” ኢየሱስ ከጥንቱ የማያምኑ እነማን እንደ ሆኑ፣ አሳልፎ የሚሰጠውም ማን እንደ ሆነ ያውቅ ነበርና። ⁶⁵ደግሞም፣ “አብ ካልሰጠው በቀር ማንም ወደ እኔ ሊመጣ አይችልም ያልኋችሁ ስለዚህ ነው” አለ።

⁶⁶ከዚያን ጊዜ ጀምሮ ከደቀ መዛሙርቱ ብዙዎቹ ወደ ኋላ ተመለሱ፤ ከዚያ ወዲያም ከእርሱ ጋር አልተመላለሱም።

⁶⁷ስለዚህ ኢየሱስ ዐሥራ ሁለቱን፣ “እናንተም ደግሞ ልትሄዱ ትፈልጋላችሁን?” አላቸው።

⁶⁸ስምዖን ጴጥሮስም መልሶ፣ “ጌታ ሆይ፣ ወደ ማን እንሄዳለን? አንተ የዘላለም ሕይወት ቃል አለህ። ⁶⁹አንተ የአባታችን ቅዱሱ እንደ ሆንህ እኛ አምነናል፤ ዐውቀናልም።”

⁷⁰ኢየሱስም መልሶ፣ “እናንተን ዐሥራ ሁለታችሁን የመረጥኋችሁ እኔ አይደለሁምን? ነገር ግን ከእናንተ አንዱ ሰይጣን ነው” አላቸው።

⁷¹ይህንም ያለው ከዐሥራ ሁለቱ አንዱ የነበረውን፣ አሳልፎ ሊሰጠው ያለውን የስምዖን አስቆሮቱን ልጅ ይሁዳን ነበር።