Tangwa Dyandi Khaniku Dyedi Kwisa
Kuna mukinzi wa bizika, Yesu wisi longa ha mesu, wisi zimbula ni longi ka lwandi ku, kaasi lwa Tata wandi, mu tangwa bapfumu bisi sanda nzila ya kumuhonda amana mulumba-lumba wisi tendana kuna katuka. Wisi bokila bana ba phwila bakwisa nwa. Kaasi batsinzidi bavutuka konda yandi.
7 1Kunima dya mamana, Yesu wákangadila mu Ngadidi. Kázolaku kwenda ku Yuteya, mukuma bapfumu ba Bayuta kuna bakala sanda tangwa dya kumuhondisa. 2Kaasi mukinzi wa Bayuta, mukinzi wa bizika, wákala bela-bela. a a v2 Mukinzi wa Binzu-nzu wákala mukinzi wa lumingu lumosi, muna bisi Kiseledi bázinga mu binzu bya ntangwa, mu kuyubuka bilumbu bina bakála mu nganga. 3Baphangi bandi bámuzimbwala: «Katuka vava, wenda ku Yuteya, hanga balonguki baku bafwani phi mona mambu mana wisi hanga. 4Ka mutu ku wuna wisi sanda kumonika ha mesu ma batu kasweka mambu mana kasi hanga. Yuka ni ngeyi wisi hanga mamana, dimonikisa ngeyi meni kwena batu ba tsi.» 5Mukuma, ata baphangi bandi phi bákwikilaku mwena yandi.
6Buna Yesu wábazimbwala: «Tangwa dyama khaniku kedi kwisa, kaasi kwena benu tangwa dyosu dyenina dya mboti.
7«Batu ba tsi balendaku lumenga, kaasi bisi mbenga meni, mukuma yisi thila kimbangi ni mambu mana bisi hanga menina mambi. 8Benu meni tombukenu ku mukinzi; meni yitombukaku ku mukinzi wawu, mukuma tangwa dyama khaniku kedi lunga.»
9Kunima dya kuzimbula bwabuna, wásala mu Ngadidi. 10Kunima dya baphangi bandi kutombuka ku mukinzi, yandi phi wátombuka, ka mu kitengeni ku, kaasi mu kitsweki.
11Buna bapfumu ba Bayuta bakala musanda ku mukinzi, bakala zimbula: «Yandi kenina kweti?» 12Nyengalakana wa lawu kikuma kyandi wákala ha kati dya mulumba-lumba wa batu: bakwawu bakala zimbula: «Yandi wenina wa mboti», bakwawu phi: «Nkatu, wisi totisa batu.» 13Kaasi ka mutu ku wázonza kikuma kyandi mu kitengeni, mukuma bweya bwa bapfumu ba Bayuta. 14Muna kati dya mukinzi, Yesu wátombuka mu nzu ya Nzambi amana wáyandika longa.
15Bapfumu ba Bayuta báyituka, bazimbula: «Khi phila mutu wuna wisi zaya mambu ma lawu, konda kulonguka?»
16Yesu wábavutwala: «Malongi mama ka mama ku, kaasi mátuka kwena wuna wáthuma meni. 17Wosu wuna wisi zola hanga luzolu lwa Tata wetu, kazaya ni malongi mama mátuka kwena Tata wama holo meni yízonza mu luzolu lwama meni. 18Wuna wisi zonza mu luzolu lwandi meni, wisi sanda khembu lwa yandi meni; kaasi wuna wisi sanda khembu lwa wuna wámutuma, yandi wenina wa kyedika, amana konda luvunu mwena yandi. 19Keti Moyize kaluphekaku mitsiku? Kaasi ka mutu ku ha kati dya benu wisi lunda mitsiku. Kikuma kya biki luzodini kuhondisa meni?»
20Mulumba-lumba wa batu wávutula: «Ngeyi wenina yi kitembu kya mbi! Nani wisi zola kuhondisa ngeyi?»
21Yesu wábavutwala: «Yáhanga mudimu wumosi, amana benu boosu luyituki.
22«Moyize wáluheka mutsiku wa kuyótisa—ka kwena Moyize ku, kaasi kwena batata bakhulu—amana lwisi yotisa mutu mu kilumbu kya sabata. 23Yuka ni bamuyotisa mutu mu kilumbu kya sabata hanga mitsiku mya Moyize mizimaku, kikuma kya biki luyukidi khabu kwena meni mukuma yábelula mutu wa lutu lwosu mu kilumbu kya sabata? 24Lufundisaku batu mu mana mamonika ku mesu, kaasi fundisenu mu masonga.»
Yandi Wátuka Kweti?
25Buna ndambu ya bisi Yelusalemi bazimbula: «Keti mutu wawu ku wuna bazodini kuhondisa? 26Kaasi tala, yandi wisi zonza mu kitengeni, amana keti bazimbulaku kima kwena yandi. Keti bapfumu bázaya kyedika ni yandi kenina Kidisitu? 27Kaasi betu tuzayi kuna mutu wawu katuka. Kaasi tangwa Kidisitu kakwisa, ka mutu ku kazaya kuna katuka ku.»
28Buna Yesu, bwana kakala longa mu nzu ya Nzambi, wábokila mu ndinga ya ngolu: «Benu luzayi meni, amana luzayi kuna yituka. Kaasi yikwisaku mu luzolu lwama meni; wuna wáthuma meni wenina wa kyedika, amana benu lumuzayiku. 29Meni yimuzayi, mukuma yituka kwena yandi, amana yandi wáthuma meni.»
30Buna básanda kumukwata, kaasi ka mutu ku wámusimba, mukuma tangwa dyandi khaniku kedi kwisa. 31Kaasi batu balawu ha kati dya mulumba-lumba bákwikila mwena yandi, bazimbula: «Tangwa Kidisitu kakwisa, keti kahanga bidimbu bya biphadi bilutini bina mutu wuna wáhanga?» 32Bafwadisi báyuka mulumba-lumba wa batu bakala nyengalakana mamana kikuma kyandi; buna bambuta ba banganga Nzambi yi Bafwadisi bátuma batsinzidi ba nzu ya Nzambi mu kumukwata.
33Buna Yesu wuzimbudi: «Kedi tangwa fyoti yenina hakimosi yi benu, amana yekina kwenda kwena wuna wáthuma meni. 34Kalusanda meni amana kalumbwana ku; kuna meni yenina lulendaku kwisa.»
35Buna bapfumu ba Bayuta báhyula bawu yi bawu: «Kweti kazodini kwenda hanga betu katumbwana ku? Keti kazodini kwenda kwena batu betu bana bámwangana ha kati dya Bangeleki amana kalonga Bangeleki? 36Biki disongidila dya ndinga yandi: “Kalusanda meni amana kalumbwana ku,” amana “Kuna meni yenina lulendaku kwisa”?»
37Mu kilumbu kya tsuka kineni kya mukinzi, Yesu wátelama amana wábokila: «Yuka ni mutu kenina yi kihwinya, kakwisa kwena meni amana kanwa. 38Wuna wisi kwikila mwena meni, bwabu masonuku mázimbula, minkoko mya mamba ma luzingu mikatuka mu mbundu yandi.»
39Wázonza bwabuna kikuma kya Kitembu Kyatoma, kina bana bakwikila mwena yandi bakála tambula; mukuma Kitembu khaniku kedi phekwa, kikuma Yesu khaniku kedi kembeswa.
40Buna báyuka mambu mamana, bakwawu ba mulumba-lumba bazimbula: «Mu kyedika ni yandi kenina Mbikudi.» 41Bahika bazimbudi: «Yandi wenina Kidisitu.» Kaasi bakwawu bahyudi: «Khi phila, Kidisitu kalenda tuka ku Ngadidi? 42Aketi Masonuku mazimbudi ni Kidisitu katúka mu butuka dya Tavidi, yi ku Betelemi, hata dya Tavidi?» 43Buna dingumba dyádikabisa kikuma kya yandi. 44Bahika ha kati dya bawu bazodi bamukwata, kaasi ka mutu ku wátula koku ha thandu yandi.
45Buna batsinzidi ba nzu ya Nzambi bávutuka kwena bambuta ba banganga Nzambi yi Bafwadisi, bana bábahyula: «Kikuma kya biki lwámunataku?»
46Batsinzidi bavutudini: «Ata mutu wázonza hanga mutu yandu wisi zonza.»
47Bafwadisi bavutudini: «Benu phi lwáhunakana? 48Keti mutu mosi ha kati dya bapfumu holoni ha kati dya Bafwadisi wákwikila mwena yandi? 49Kaasi dingumba dyadi, bana bakondi zaya mutsiku, benina ba kusinga.»
50Nikodemi, wuna wenda mumona Yesu ku luyandiku, wukala mosi ha kati dya bawu, wábahyula: 51«Keti mutsiku wetu wisi fundisa mutu, konda kumuyuka ku theti yi konda kuzaya mana kisi hanga?»
52Bavutudini: «Keti ngeyi phi wenina mwisi Ngadidi? Sanda amana tala: ata mbikudi wulubukaku ku Ngadidi.»
53Amana boosu bávutuka ku nzu za bawu. b b v53 Musamu wawu wukondi mu mikanda mya theti mya Yowani, amana mikanda mya kunima misi wusya mu bihinzu biswaswani bilawu. Wusonama hawu, kuna mukuku wusyama, hanga bwenina muna Mabibila malawu ma buthwena.
