Hebrewnao 9

9 ¹Ara khare tuingashit chinala khorumwui vang shiyanbing kala okathuiwui katharapam leisai. ²Khare kachonshim akha sākhuihaira; chiwui lungli thaomeishong, table, kala ngasokhamiwui khamui leisai; chi Kathara Pam da hora. ³Kakhane chonrān khanuklila kachonshim akha leisai, chi Tharmathengmeikap kaje kā da hora. ⁴Chiwui lungli sinā nganamkaphā hanphut kala sinā eina katonga rommihai tuingashit oko leisai; oko chiwui lungli manna kaphei sinā ham akha, Aaronwui khāmshui phankhalangda chi, kala tuingashit lungphekbing leisai. ⁵Chiwuitungli tekhamateiwui Cherubimna lukhamashan pamkhong chi rommithaowa. Hibingwui pong ara ithumna hāngser shaprarmana.

⁶Otbing chithāda sakāmi kahaida, pāngmonbingna khare kachonshimli thangkachida zangda athumwui kathara otram ngatha̱ra. ⁷Pāngmon khareimāngna kumkhali kathā shida atam kachida ashee khuida kakhane kachonshimli zanga; chi ana khalattawui vang kala mibingwui khangui moreiwui vang chigatra. ^a a v7 Pāngmon kharei kumkhali thangkathā zimiksho maningla—Pheomi Zimiksho—mibing kala Varewui ngachaili mashung ngasak khavai alungkayāngli zangkahai. ⁸Hi eina Manglā Katharana, khare kachonshim aruila nganinga tharan, kathara pambingli kazang shongfa chi maphongmirangsai da chitheimi. ⁹Hi ara atamwui vang machut akhana. Hi khangarān athishurda, khorum kasābingwui mashun-makhui chi kāshung ngasak makhuirā lemmet kala pha̱kaphayā chigatna, ¹⁰kha chiya kashakazā, kamang, kala khangatatei kazip-ngasa̱bingwui pongmāngna. Chiya midhar sākhui atam eina tangda khuihai phasāwui shiyanbingna.

Khrista, Reikhameiya Pāngmon Kharei

¹¹Kha Khrista chi reikhameia kala hakkasang kachonshim mangā eina kharā kahai kaphā otbingwui pāngmon kharei sāda kharāhaira. Kachonshim chi pāng eina masākahai, kala okathuiwui sākahaiwui maningmana. ¹²Ana meshee kala seinaowui ashee eina maningla, khalattawui ashee eina, katharapamli thangkathā katong khavai zanglaga, katang makhavai ngatangkhami samphanga. ¹³Kaja mukvāshee kala meshee, kala makathar mibingli kasirror kahai seilānao riktā kahaiwui hotlāna, phasā tharngasakwui vang kathar ngasakakha, ¹⁴katang makhavai Manglā mangā eina achuk kapeia khalattali ithumwui Avāli chigat kahai Khristawui asheena kayākha hakmahāda kharinga Avāli otram ngatha̱ khavai, ithumwui mashun-makhui chi thikahai otsakwui eina tharmirakhala? ^b b v14 Khristawui pheomi ot hi mi kathum saikorawui otna—Jishuna khalattali chigat, ithumwui Avāna kachigat chi phā, kala katang makhavai Manglāna kachigat chi otkān ngasaka. Kraskhungna Avā chi Anaomayarali ngakaishi maningmana, kha ithumwui Avā, Anaomayara, kala Manglā Kathara ithumwui ngatangkhamiwui vang ngaraichāda ot kasāna. ¹⁵Maram hiwui vang ana kadhara tuingashit chiwui tuisak sāmena: khare tuingashit azingli khalei khayonkhamāngwui eina mibingli ngatangkhui khavai kathi akha shokkahaina, chieina hokakhui kahaibingna ngashit kahai katang makhavai shimlui samphangra. ¹⁶Kaja hāngthi kahai akha leiakha, chi sākahai mi chiwui kathi chi sāshitsang phalungra. ^c c v16 Tui khat eina 'kadhara' kala 'khalattawui mikhavai lairik' khani chi khamina; senkam 16–17li kapisa mina lairikwui apong chi khuiya—lairik chi kasāa mi thihai tharan maningla otkān leira. ¹⁷Kaja hāngthi kahai chi mi akha thihaiakha akachang leira, kaja chi sākahai mi kharing tharan chi pangshap maleimana. ¹⁸Chiwui vang eina khare tuingashit ashee maleila masāhaimana. ¹⁹Mosesna ainwui ningkhami saikora mi saikorali hānghailaga, ana seinao kala mewui ashee chi, tara̱ kala hungshi kahai sahā kala maharnā eina ngasoda khuilaga, lairik akhalui khalatta kala mi saikora khani chi yikra, ²⁰hānga, "Hi ithumwui Avāna nathumli kaso kahai tuingashitwui asheena."

²¹Chithada sāda ana kachonshim kala otram ngatha̱ khavai khorkhong saikora ashee eina yikra. ²²Kachangkha, ainna ot saikora khathā ashee eina tharngasaka; kala ashee tāngasak maleila morei pheomi maleimana.

²³Chiwui vang eina, kazingramwui otbingwui aka̱lā chi hibing eina tharngasak khavai kapangkasang; kha kazingramwui otbing khalatta chi hibingli lāngmeida pha̱kaphayā eina tharngasakra. ²⁴Kaja akachang chiwui aka̱lā, mipāng eina sākahai katharapambingli Khristana mazangmana; kha ithumwui vang ara ithumwui Avāwui mangāli phongshok khavai kazingram khalatta chili zanga. ²⁵Pāngmon kharei china kum kachida akhalattawui maningla ashee eina katharapamli kazang thada, akhalatta kachungkhashida pha̱phayā khavai maningmana. ²⁶Chi maningakha, okathui masāranglakhawui eina Khristana kachungkha shida chotchāng phungphalungra jisi. Kha ana atam saikorawui ungshungli, akhalatta pha̱phayā eina morei shimān ngasak khavai, pha̱kha kashi rākahaina. ²⁷Kala mibingna pha̱kha kashi thira, kala chiwui thili bichar rāra da kapangkahai thada, ²⁸chithada sāda Khristana, kachungkhawui morei phung khavai pha̱kha kashi pha̱mihailaga, moreiwui vang maningla ali khangaraibingli huikhami khuirā khavai kakhane sāda rāluira.