ሐዋርያት ሥራ 17

17 ¹አምፊፖሊስንና አጶሎንያን አልፈው ወደ ተሰሎንቄ መጡ፤ በዚያም የአይሁድ ምኵራብ ነበረ። ²ጳውሎስም እንደ ልማዱ ወደ እነርሱ ገብቶ ለሦስት ሰንበት ከመጻሕፍት እያስረዳ ተነጋገራቸው። ³ክርስቶስ መከራ መቀበልና ከሙታን መነሣት እንደሚገባው መጻሕፍትን እየከፈተ እያብራራ፣ “የማውጅላችሁ ይህ ኢየሱስ እርሱ ክርስቶስ ነው” አላቸው። ⁴ከእነርሱም አንዳንዶቹ ተረድተው ከጳውሎስና ከሲላስ ጋር ተባበሩ፤ ፈሪሃ እግዚአብሔር ያላቸው እጅግ ብዙ ግሪካውያንና ብዙ የተከበሩ ሴቶችም እንዲሁ አደረጉ። ⁵አይሁድ ግን ቀንተው ከገበያ ክፉ ሰዎችን ሰብስበው ሕዝብ አደራጁ፤ ከተማይቱንም ወደ ሁከት ከተቱ። ወደ ሕዝቡ ሊያወጧቸውም ፈልገው የኢያሶንን ቤት ወረሩ። ⁶ባላገኟቸውም ጊዜ ኢያሶንንና አንዳንድ ወንድሞችን ወደ ከተማዪቱ ሹማምንት እየጎተቱ፣ “ዓለምን ያተራመሱ እነዚህ ሰዎች ወደዚህም መጥተዋል፤ ⁷ኢያሶን ተቀብሏቸዋል። ሌላ ንጉሥ ይኸውም ኢየሱስ አለ እያሉ ሁሉም የቄሣርን ድንጋጌዎች ይቃወማሉ። ⁸ይህንም የሰሙትን ሕዝብና የከተማዪቱን ባለ ሥልጣኖች አወኩ።” ⁹ከኢያሶንና ከሌሎቹም ዋስ ተቀብለው ለቀቋቸው።

የቤርያ ሰዎች መጻሕፍትን ይመረምራሉ

¹⁰ወንድሞችም ወዲያውኑ ጳውሎስንና ሲላስን በሌሊት ወደ ቤርያ ሰደዷቸው፤ በደረሱም ጊዜ ወደ አይሁድ ምኵራብ ገቡ። ¹¹እነዚህ አይሁድ ከተሰሎንቄ ካሉት ይልቅ ልበ ሰፊዎች ነበሩ፤ ቃሉን በጉጉት ተቀበሉ፤ ይህም እውነት መሆኑን ለማየት ዕለት ዕለት መጻሕፍትን መረመሩ። ¹²ስለዚህ ከእነርሱ ብዙዎች፣ ከተከበሩ ግሪካውያን ሴቶችና ወንዶችም ብዙዎች አመኑ። ¹³ከተሰሎንቄ የመጡ አይሁድ ጳውሎስ የአባታችንን ቃል በቤርያም እንደ ሰበከ ባወቁ ጊዜ፣ ወደዚያም መጥተው ሕዝቡን አወኩና አነሳሱ። ¹⁴ወንድሞችም ወዲያውኑ ጳውሎስን ወደ ባሕር ሰደዱት፤ ሲላስና ጢሞቴዎስ ግን በዚያ ቀሩ። ¹⁵ጳውሎስን የሸኙትም ወደ አቴና አደረሱት፤ ሲላስና ጢሞቴዎስም በተቻለ ፍጥነት እንዲከተሉት ትእዛዝ ተቀብለው ተመለሱ።

ጳውሎስ ወደ አቴና ደረሰ

¹⁶ጳውሎስም በአቴና ሲጠብቃቸው፣ ከተማዪቱ በጣዖታት ተሞልታ ባየ ጊዜ መንፈሱ በውስጡ ተበሳጨ። ¹⁷ስለዚህ በምኵራብ ከአይሁድና እግዚአብሔርን ከሚያመልኩት ጋር፣ ዕለት ዕለትም በገበያ ከሚገኘው ሁሉ ጋር ይከራከር ነበር። ¹⁸ከኤጲቆሮስና ከኢስጦኢኮስ ፈላስፎችም አንዳንዶቹ ከእርሱ ጋር ተከራከሩ። አንዳንዶቹ፣ “ይህ ለፍላፊ ምን ሊል ይፈልጋል?” አሉ፤ ሌሎቹ ደግሞ የኢየሱስንና የትንሣኤውን ወንጌል ይሰብክ ስለ ነበር፣ “የባዕድ አማልክትን የሚያስተዋውቅ ይመስላል” አሉ።

¹⁹ይዘውም ወደ አርዮስፋጎስ አመጡት፤ እንዲህ ብለው ጠየቁ፦ “የምታቀርበው ይህ አዲስ ትምህርት ምን እንደ ሆነ ልናውቅ እንችላለን? ^a a v19 አርዮስፋጎስ ወይም “የማርስ ኰረብታ” በአቴና የሚገኝ ዐለታማ ኰረብታ ሲሆን፣ የከተማዪቱ ምክር ቤት አዳዲስ ሐሳቦችንና ትምህርቶችን ለመመዘን በዚያ ይሰበሰብ ነበር። ²⁰ለጆሮአችን እንግዳ ነገር ታሰማለህና ትርጉሙን ማወቅ እንፈልጋለን።” ²¹የአቴና ሰዎች ሁሉና በዚያ የሚኖሩ መጻተኞች አዲስ ነገር ከመናገር ወይም ከመስማት በቀር በሌላ ጊዜያቸውን አያሳልፉም ነበር።

²²ጳውሎስም በአርዮስፋጎስ መካከል ቆሞ እንዲህ አለ፤ “የአቴና ሰዎች ሆይ፣ በሁሉም ነገር እጅግ ሃይማኖተኞች እንደ ሆናችሁ አያለሁ። ²³ዘወር ዘወር እያልሁ የምታመልኳቸውን ነገሮች ስመለከት፣ ‘ለማይታወቅ አምላክ’ ተብሎ የተጻፈበት መሠዊያ አግኝቻለሁና። እናንተ ሳታውቁት የምታመልኩትን እኔ አሁን እነግራችኋለሁ። ²⁴ዓለሙንና በውስጡ ያለውን ሁሉ የፈጠረ አባታችን፣ የሰማይና የምድር ጌታ ስለ ሆነ፣ በእጅ በተሠሩ ቤተ መቅደሶች አይኖርም፤ ^b b v24 ጳውሎስ የአቴናን አረማውያን የሚያመልኩት “የማይታወቅ አምላክ” በእውነት አባታችን፣ ማለትም የሁሉ ነገር ፈጣሪ፣ በማንኛውም ቤተ መቅደስ ሊያዝ የማይችል እንደ ሆነ ይነግራቸዋል። ²⁵አንዳች እንደሚያስፈልገውም በሰው እጅ አይገለገልም፤ እርሱ ራሱ ለሁሉ ሕይወትን፣ እስትንፋስንና ሁሉን ይሰጣል እንጂ። ²⁶የሰውን ዘር ሁሉ ከአንድ ሰው ፈጥሮ በምድር ሁሉ ላይ እንዲኖር አደረገ፤ የተወሰነላቸውን ጊዜያትና የመኖሪያቸውን ዳርቻዎች ወስኖላቸዋል፤ ²⁷ይህም አባታችንን ይፈልጉ ዘንድ፣ ምናልባትም ዳስሰው ያገኙት ዘንድ ነው፤ ከእያንዳንዳችን ግን የራቀ አይደለም፤ ²⁸‘በእርሱ ሕያዋን ነንና፣ እንንቀሳቀሳለን፣ እንኖራለንም’ እንደ ተባለ፤ ከእናንተም ባለ ቅኔዎች አንዳንዶቹ ‘እኛም ዘሮቹ ነን’ ብለዋልና። ²⁹እንግዲህ የአባታችን ልጆች ስለ ሆንን፣ መለኮትን በሰው ጥበብና ሐሳብ እንደ ተቀረጸ ምስል፣ እንደ ወርቅ ወይም እንደ ብር ወይም እንደ ድንጋይ ልንመስለው አይገባንም። ³⁰አባታችን ያለፈውን የድንቁርና ዘመን አላየም እንዳለ ተወው፤ አሁን ግን በየቦታው ያሉ ሰዎች ሁሉ ንስሐ እንዲገቡ ያዛል። ³¹ባዘጋጀው ሰው አማካይነት ዓለምን በጽድቅ የሚፈርድበትን ቀን ወስኗል፤ ከሙታንም በማስነሣቱ ለሁሉ አረጋግጦአል።” ^c c v31 ዓለምን ይፈርድ ዘንድ አባታችን የሾመው ሰው ኢየሱስ ነው፤ አብ ለሁሉ ያረጋገጠውም ኢየሱስን ከሙታን በማስነሣቱ ነው።

³²የሙታንን ትንሣኤ በሰሙ ጊዜ፣ አንዳንዶቹ ዘበቱ፤ ሌሎቹ ግን፣ “ስለዚህ ነገር እንደ ገና እንሰማሃለን” አሉ። ³³ስለዚህ ጳውሎስ ከመካከላቸው ወጣ። ³⁴አንዳንድ ሰዎች ግን ከእርሱ ጋር ተባብረው አመኑ፤ ከእነርሱም የአርዮስፋጎስ ዳኛ የሆነው ድዮናስዮስ፣ ዳማሪስ የተባለች ሴትና ሌሎችም ነበሩ።