Mihangu 17 FHB Father's Heart Bible™

17 ¹Kunima dya kuhita mu Amfipolisi yi Apoloniya, bátula ku Tesalonika, mbanza yina yákala yi nzu ya kimvuka ya Bayuta. ²Pholu, bwosu kyákala kikalulu kyandi, wákota kwena bawu amana wáyambila yi bawu muna Masonuku mu sabata zitatu. ³Wákala zibula yi kutendula Masonuku ni Kidisitu kafweti nyokuka amana kafutumuka ha kati dya bafwa, wuzimbudi: «Yesu yandu yisi lusamwana kenina Kidisitu.» ⁴Ndambu ya bawu bákwikisama amana bákota mu ndonga ya Pholu yi Silasi, hakimosi yi bisi Ngeleti balawu bakwikama yi bakhetu ba luzitu balawu. ⁵Kaasi Bayuta bákala yi kiphala, bákutika batu ba mbi ba hana zandu, báyidika mulumba-lumba wa batu amana banatina mvwalangani ku mbanza. Bálubuka mu nzu ya Yasoni, basanda mu kubalubula kwena kibuka kya batu. ⁶Konda kubamona, bámubulumuna Yasoni yi ndambu ya baphangi kuna thwala ya bapfumu ba mbanza, yi kukalungaka: «Batu baba bana basobidi tsi yosu bakwísa phi haka, ⁷Yasoni wubayambi. Bawu boosu bisi lewula mitsiku mya Kayesa, mu kuzimbula ni kinga kyahika kyenina, disongidila Yesu. ⁸Amana bálundika kibuka kya batu yi bapfumu ba mbanza bana báyuka mambu mama.» ⁹Amana bwosu bábonga mbongu ya ndandu kwena Yasoni yi bana bahika, hanga bábalubula.

Bisi Bele basi sanda Masonuku

¹⁰Baphangi, buna-buna, báthuma Pholu yi Silasi phipha-phipha yikuna Bele; ha bátula, bénda ku nzu ya kimvuka ya Bayuta. ¹¹Bayuta baba bákala yi mbundu yazibuka kuluta bana ba ku Tesalonika, bátambula ndinga ni kyesi kyosu amana bakála longuka Masonuku kosu kilumbu mu kutala yuka ni mambu mama makála ma kyedika. ¹²Buna balawu muna bawu bákwikila, hakimosi yi bakhetu ba luzitu ba Ngeleti balawu yi bayakala. ¹³Tangwa Bayuta ba ku Tesalonika bázaya ni Pholu wásamuna ndinga ya Tata wetu ku Bele phi, bénda phi kwakuna, mu kuvwalangasa yi kulundika bibuka bya batu. ¹⁴Buna-buna, baphangi báthuma Pholu kuna mayanga, kaasi Silasi yi Thimoti básala kwakuna. ¹⁵Batu bana básindikila Pholu bámunata ku Ateni, hanga bávutuka yi muswa kwena Silasi yi Thimoti ndangu bakwisa bela-bela kwena yandi nswalu-nswalu.

Pholu wátula ku Ateni

¹⁶Muna tangwa Pholu kakala hingila bawu ku Ateni, kitembu kyandi kyákala yi khabu mu kati dyandi, bwosu kámona mbanza yákala yi biteki bya lawu. ¹⁷Buna wáyambila muna nzu ya kimvuka yi Bayuta yi batu bana bisi fukamina Nzambi, amana kosu kilumbu kuna zandu yi wosu wuna wakala kwakuna. ¹⁸Ndambu ya batu ba ngangu, bisi Epikuli yi bisi Sitoyike, phi báyambila yi yandi. Ndambu bázimbula: «Biki kazodini kuzimbula mutu yandu wa ndinga zalawu?» Bana bahika bázimbula: «Mbonibwoku kenina samuna banzambi ba banzenza» — mukuma wásamuna Musamu wa Bukheti wa Yesu yi lufutumuku.

¹⁹Bámubonga amana bámunata ku Aleyopangi, mu kuhyula: «Twalenda zaya malongi mama ma pha mana wisi tuheka? ^a a v19 Aleyopangi, ho «Mongu wa Malesi», wákala mongu wa matadi ku Ateni, kuna kibuka kya bambuta ba mbanza kyákala kutakana mu kutala mabanzu yi malongi ma pha. ²⁰Mukuma wisi nata mambu ma kinzenza mu makutu ma betu, buna tuzodini zaya mana mabati songila.» ²¹Buthwena, bisi Ateni boosu yi banzenza bana bazínga kwakuna bakala lutisa tangwa dya bawu ka mu dyambu dyahika ku kaasi mu kuzimbula ho mu kuyuka dyambu dimosi dya pha.

²²Pholu wátelama ha kati dya Aleyopangi amana wuzimbudi: «Benu bisi Ateni, yimweni ni lwenina batu ba bisambu lawu mu mambu moosu. ²³Mukuma, bwosu yihita amana yitala bima byenu bya kinzambi, yiwani mesa ma kimenga mana másonikwa: «Kwena nzambi wakonda zayakana.» Yina lwisi fukamina konda kuzaya, yina yisi lusamwana buthwena. ²⁴Tata wetu, wuna wáhanga tsi yi bina byosu byenamwa, bwosu kenina Pfumu wa zilu yi tsi, kazínganga mu nzu za Nzambi zina zisalwa ni moku, ^b b v24 Pholu wásamuna kwena bisi Ateni ba bapagani ni «nzambi wakonda zayika» wuna bisi fukamina, mu kyedika, kenina Tata wetu — Mvangi wa bima byosu, wuna kafwaniku kutudwa mu nzu ya Nzambi yimosi. ²⁵amana kasadilwaku ni moku ma batu, bwosu ni wena yi mupfunu wa kima — yandi meni wisi hana kwena wosu mutu luzingu, mphemu yi bima byosu. ²⁶Tuka mu mutu mosi, wáyidika makanda moosu ma batu ndangu mazínga hana tsi yosu, mu kuyidika bilumbu bya bawu yi mindilu mya mavula ma bawu, ²⁷ndangu basanda Tata wetu, ngatu bamusimba amana bámumona — kinga kenina konda kala kwaku kyana yi kosu mutu wa betu, ²⁸mukuma «Mu yandi tuzínga, tunikuka amana twenina»; bwosu ndambu ya bayimbidi ba benu meni bazimbudini: «Betu phi twenina bana bandi.» ²⁹Buna, bwosu twenina bana ba Tata wetu, tufwaniku banza ni bunzambi bufwánana yi wolu, ho palata, ho tadi — kifwanisu kina básala batu ni ngangu yi mabanza ma bawu. ³⁰Bilumbu bya kukonda kuzaya, Tata wetu wázimbula, kaasi buthwena wisi tuma batu boosu muma mwosu ni basoba mbundu. ³¹Wáyidika kilumbu kya kusambisa tsi mu masonga, muna mutu wuna kásola — mu kusongila dyawu kwena boosu mu kumufutumuna ha kati dya bafwa.» ^c c v31 Mutu wuna Tata wetu kásola mu kusambisa tsi kenina Yesu; kidimbu kya Tata kwena boosu, kyenina ni wáfutumuna Yesu ha kati dya bafwa.

³²Bwosu báyuka mu kikuma kya lufutumuku lwa bafwa, ndambu básekina; bana bahika bázimbula: «Tukúyuka hika mu dyambu dyadina.» ³³Buna Pholu wábasisa. ³⁴Kaasi ndambu ya batu bákota kwena yandi amana bákwikila, hakimosi yi Diyonisi mwisi Aleyopangi, yi mukhetu mosi khumbu andi Damalisi, yi bana bahika.