使徒行傳 17

17 ¹佢哋經過暗妃波里同亞波羅尼亞之後，就嚟到帖撒羅尼迦，嗰度有一間猶太人嘅會堂。 ²保羅照佢平時嘅習慣入去搵佢哋，一連三個安息日根據聖經同佢哋講道理， ³打開聖經解釋畀佢哋聽，話基督必須受苦，並且要從死人中復活，佢仲話：「我向你哋宣講嘅呢位耶穌，就係基督。」 ⁴佢哋當中有啲人畀佢說服，就歸咗保羅同西拉，仲有一大班虔誠嘅希臘人，同埋唔少有名望嘅婦女都係咁。 ⁵但係啲猶太人心生嫉妒，就喺市集招聚咗一班無賴，糾集成群，將成個城搞到大亂。佢哋衝入耶孫嘅屋企，想搵佢哋出嚟交畀群眾。 ⁶搵佢哋唔到，就拉住耶孫同幾個弟兄去到城裏面嘅官長面前，大嗌話：「呢班搞到普天下天翻地覆嘅人，家陣連呢度都嚟埋， ⁷耶孫竟然接待佢哋。佢哋全部都違抗凱撒嘅法令，話有另一個王，就係耶穌。」 ⁸群眾同埋聽到呢啲說話嘅城裏面官長都畀佢哋煽動起嚟。 ⁹官長向耶孫同其餘嘅人取咗保釋金之後，就放咗佢哋。

庇哩亞人查考聖經

¹⁰弟兄們即刻趁夜晚打發保羅同西拉去庇哩亞，佢哋一到就入咗猶太人嘅會堂。 ¹¹呢度嘅猶太人比帖撒羅尼迦嘅心胸更加開闊，佢哋熱切咁領受道理，日日查考聖經，睇下呢啲事係咪真嘅。 ¹²結果佢哋當中好多人都信咗，仲有唔少有名望嘅希臘婦女同埋男子都係咁。 ¹³當帖撒羅尼迦嘅猶太人知道保羅喺庇哩亞都宣講我哋嘅父嘅道，就又去到嗰度，煽動同攪擾眾人。 ¹⁴弟兄們即刻打發保羅去到海邊，但係西拉同提摩太就留喺嗰度。 ¹⁵護送保羅嘅人帶咗佢去到雅典，然後就返去，仲奉咗保羅嘅命令，叫西拉同提摩太盡快去搵佢。

保羅嚟到雅典

¹⁶保羅喺雅典等佢哋嘅時候，見到成個城都充滿咗偶像，佢個心裏面就好激動。 ¹⁷於是佢喺會堂裏面同啲猶太人同埋敬拜神嘅人辯論，又日日喺市集同任何喺嗰度嘅人辯論。 ¹⁸有啲以彼古羅派同斯多亞派嘅哲學家都同佢辯論。有人話：「呢個講嘢亂嘈嘅人想講乜嘢呀？」又有人話：「佢好似係喺度宣揚外邦嘅神。」因為佢傳講耶穌同復活嘅福音。

¹⁹ 佢哋就帶咗佢去到亞略巴古，問佢：「你所講嘅呢個新教導，我哋可唔可以知道係乜嚟㗎？ ^a a v19 亞略巴古，又叫「戰神山」，係雅典一座石山，城裏面嘅議會喺嗰度聚集，衡量新嘅思想同教導。 ²⁰因為你將啲奇奇怪怪嘅嘢帶入我哋嘅耳仔，所以我哋想知道呢啲係乜嘢意思。」 ²¹原來所有雅典人同埋住喺嗰度嘅外地人，成日淨係花時間講啲新奇嘅嘢或者聽啲新奇嘅嘢。

²²保羅企喺亞略巴古中間，話：「各位雅典人，我睇得出你哋喺各方面都非常之虔誠。 ²³因為我行過嘅時候，仔細睇你哋所拜嘅嘢，發現有一座壇刻住：『獻畀一位未識嘅神』。你哋唔識就去拜嘅呢一位，家陣我就向你哋宣講。 ²⁴ 我哋嘅父創造咗世界同埋當中萬物，佢係天地嘅主宰，唔會住喺人手所造嘅殿宇裏面， ^b b v24 保羅對啲拜偶像嘅雅典人講，佢哋所拜嘅「未識嘅神」，其實就係我哋嘅父——創造萬物嘅主，係任何殿宇都容納唔到嘅。 ²⁵佢亦都唔使人手嚟服侍，好似佢有乜嘢需要噉——佢自己反而將生命、氣息同萬物賜畀萬人。 ²⁶佢從一個人造出人類萬族，叫佢哋住遍全地，又定咗佢哋既定嘅日期同埋家鄉嘅疆界， ²⁷為嘅係要佢哋尋求我哋嘅父，或者可以摸索到佢、揾到佢——雖然佢離我哋每一個都唔遠， ²⁸因為『我哋喺佢裏面生活、行動、存留』；就好似你哋自己有啲詩人所講：『我哋亦都係佢嘅子孫。』 ²⁹所以我哋既然係我哋嘅父嘅兒女，就唔應該以為神性好似金、銀或者石頭——一個靠人手嘅技巧同想像所塑造出嚟嘅像。 ³⁰以往嗰啲愚昧無知嘅日子，我哋嘅父唔追究，但係家陣佢吩咐各處嘅人都要悔改。 ³¹ 因為佢已經定咗一個日子，要藉住佢所立嘅一個人按公義審判天下——佢叫呢個人從死人中復活，就係向萬人證明呢件事。」 ^c c v31 我哋嘅父所立、要審判天下嘅嗰個人就係耶穌；天父向萬人所作嘅證明，就係佢叫耶穌從死人中復活。

³²眾人聽見死人復活嘅事，有啲就譏笑，有啲就話：「呢件事我哋第日再聽你講。」 ³³於是保羅就離開咗佢哋。 ³⁴但係都有幾個人歸咗佢，並且信咗，當中包括亞略巴古嘅議員丟尼修、一個叫大馬哩嘅婦人，同埋其他啲人。