使徒行傳 16

16 ¹保羅去到特庇同路司得。嗰度有個門徒名叫提摩太,佢阿媽係一個信主嘅猶太婦人,不過佢阿爸就係希臘人。 ²路司得同以哥念嘅弟兄都好稱讚佢。 ³保羅想帶佢一齊去,於是就同佢行割禮,因為嗰啲地方嘅猶太人,個個都知佢阿爸係希臘人。 ⁴佢哋經過各城嘅時候,就將耶路撒冷嘅使徒同長老所定嘅規條交畀佢哋遵守。 ⁵於是眾教會喺信仰上得堅固,人數一日一日咁增加。

我哋嘅父呼召佢哋去馬其頓

⁶聖靈既然唔畀佢哋喺亞西亞傳道,佢哋就經過弗呂家同加拉太一帶嘅地方, ⁷去到每西亞邊界,就想入庇推尼去,可是耶穌嘅靈唔准佢哋。 ⁸佢哋就經過每西亞,落到特羅亞。 ⁹夜晚保羅見到一個異象:有一個馬其頓人企喺度懇求佢話:「你過嚟馬其頓幫吓我哋啦。」 ¹⁰保羅見到呢個異象之後,我哋就即刻設法去馬其頓,斷定係我哋嘅父呼召我哋去向佢哋傳福音。

呂底亞喺腓立比敞開佢嘅心

¹¹於是我哋由特羅亞開船,一直去到撒摩特喇,第二日就到尼亞波利, ¹²由嗰度去到腓立比。腓立比係馬其頓嗰一區嘅重要城市,又係羅馬人嘅殖民地。我哋喺嗰度住咗幾日。

¹³到咗安息日,我哋出咗城門去到河邊,估計嗰度有個禱告嘅地方。我哋就坐低,同聚集喺嗰度嘅婦女傾偈。 ¹⁴有一個推雅推喇城嘅婦人,名叫呂底亞,係賣紫色布匹嘅,佢一向敬拜我哋嘅父。佢喺度聽,主就開通佢嘅心,叫佢留心聽保羅所講嘅嘢。 ¹⁵佢同佢一家人受咗洗之後,就懇求我哋話:「你哋若果認定我係忠心事奉主嘅,就請入嚟我屋企住啦。」佢就咁樣挽留咗我哋。

為咗福音而被囚

¹⁶有一次我哋去禱告嘅地方,遇到一個使女,佢俾一個占卜嘅靈附咗身,靠住替人算命,為佢啲主人賺咗好多錢。 ¹⁷佢跟住保羅同我哋,大聲嗌:「呢啲人係至高嘅神嘅僕人,向你哋宣講得救嘅道。」 ¹⁸佢一連幾日都係咁。保羅好唔耐煩,就轉過身對嗰個靈話:「我奉耶穌基督嘅名,吩咐你由佢身上出嚟!」個靈即刻就出咗嚟。

¹⁹使女嘅主人見到搵錢嘅指望冇晒,就捉住保羅同西拉,拉佢哋去到市集,見嗰啲官長, ²⁰帶佢哋去到裁判官面前話:「呢啲人係猶太人,擾亂緊我哋嘅城, ²¹傳一啲我哋羅馬人唔可以接受、又唔可以遵行嘅規矩。」

²²群眾一齊起哄攻擊佢哋,裁判官就吩咐撕爛保羅同西拉嘅衫,落令用棍打佢哋。 ²³重重咁打咗佢哋一餐之後,就將佢哋掉入監,吩咐獄卒睇實佢哋。 ²⁴獄卒接到咁嘅命令,就將佢哋關喺入面嘅內監,用木狗鎖住佢哋對腳。

²⁵大約半夜,保羅同西拉禱告,唱詩歌讚美我哋嘅父,啲囚犯都留心聽住。 ²⁶忽然之間發生猛烈嘅地震,連監獄嘅地基都震動;所有門即刻打開,人人嘅鎖鏈都鬆脫晒。 ²⁷獄卒瞓醒,見到監獄嘅門開晒,以為囚犯已經走甩,就拔出刀想自殺。 ²⁸但係保羅大聲嗌:「唔好傷害自己呀,我哋全部都喺度!」

²⁹獄卒叫人攞燈嚟,衝入去,渾身震震咁跪喺保羅同西拉面前。 ³⁰然後帶佢哋出嚟,話:「先生,我要點做至可以得救呢?」

³¹佢哋話:「當信主耶穌,你同你一家人就必得救。」 ³²佢哋就將主嘅道講畀佢同佢屋企所有人聽。 ³³當晚就喺嗰個時辰,獄卒帶佢哋去,同佢哋洗傷口;跟住佢同佢全家即刻就受咗洗。 ³⁴佢又帶佢哋上到自己屋企,擺嘢畀佢哋食,佢同全家因為信咗我哋嘅父,滿心歡喜。

³⁵到咗天光,裁判官打發差役嚟話:「放咗嗰啲人啦。」

³⁶獄卒就對保羅話:「裁判官已經派人嚟落令放你哋。而家你哋出嚟,平平安安咁去啦。」

³⁷但係保羅對佢哋話:「我哋係羅馬公民,佢哋未經審訊,就當眾打我哋,仲掉我哋入監;而家想暗中打發我哋走?唔得!叫佢哋親自嚟帶我哋出去啦。」

³⁸差役將呢啲話回報畀裁判官,佢哋一聽見話佢哋係羅馬公民,就好驚。 ³⁹於是嚟到向佢哋賠禮,帶佢哋出嚟,又求佢哋離開嗰座城。 ⁴⁰佢哋就出咗監,去到呂底亞屋企,喺嗰度見到眾弟兄,鼓勵咗佢哋一番,然後就走喇。