Timothy tarkhan logot te mili jaise

Amar Pitri pora Macedonia laga ekjon manuh laga darshan pora tarkhan ke matise. Lydia pora tai laga ghor khuli dise; bhabishyot kowa ekjon noukrani laga atma ulai jaise aru tai laga malik khan laga kamai bhi khotom hoise. Mar khai kene sikol te bandhi thaka Paul aru Silas pora adha raat te gana gaise, bhumikompo pora dorja khan khuli jaise, aru jail laga rakhowal baptisma loise.

Adhyay 16.

Paul tu Derbe aru Lystra te jaise. Ta te Timothy koi kene ekjon chella thakise, biswas kora Yehudi mahila ekjon laga putro, kintu tar laga pitri tu Greek manuh thakise. Lystra aru Iconium te thaka bhai khan pora tar ke bhal pora koise. Paul pora tar ke nijor logot te loi jabole mon korise, etu karne tar ke loi kene sunnot kori dise, hei jagah khan te thaka Yehudi khan nimite, kilemane tarkhan sob pora tar laga pitri tu Greek manuh ase koi kene janise. Sheher khan paar kori kene jai thaka somoite, Jerusalem te thaka apostle khan aru dangor manuh khan pora bonai diya niyom khan tarkhan ke mani bole dise. Etu karne girja khan biswas te takot paise aru hodai din te ginti te bari jaise.

Amar Pitri pora tarkhan ke Macedonia te matise

Pobitro Atma pora tarkhan ke Asia te kotha prachar koribole rukhai diya karne, tarkhan Phrygia aru Galatia laga desh paar kori jaise. Mysia te ponchi kene, tarkhan Bithynia te ghusi bole kosis korise, kintu Jisu laga Atma pora tarkhan ke jabole dia nai. Etu karne Mysia paar kori kene, tarkhan Troas te naami jaise. Rati te Paul pora ekta darshan dikhise: Macedonia laga manuh ekjon khara hoi kene tar ke binti kori thakise, “Macedonia te paar hoi ahhi kene amikhan ke modot koribi.” Tai hei darshan dikha pichete, amar Pitri pora amikhan ke tarkhan logot te susamachar kobole matise koi kene bujhise, etu karne amikhan joldi Macedonia te jabole kosis korise.

Lydia pora Philippi te tar laga mon khuli dise

Etu karne amikhan Troas pora jahaaj te uthi kene Samothrace te sidha jaise, aru dusera din te Neapolis te jaise, aru ta pora Philippi te, juntu Macedonia laga hei desh laga ekta dangor sheher ase, ekta Roma laga upnibesh. Amikhan ta te olop din thakise.

Bisram din te amikhan geit laga bahar te nodi ekta usor te jaise, kilemane ta te prathana kora jagah ase koi kene bhabise. Amikhan bohi kene ta te joma hua mahila khan logot te kotha koise. Thyatira sheher pora aha Lydia koi kene ekjon mahila, jun begoni rong kapur bikiri kori thakise aru amar Pitri ke puja korise, hunise. Prabhu pora tar laga mon khuli kene Paul laga kotha khan ke dhyan dibole dise. Jitia tai aru tar laga ghor manuh khan baptizma loise, tai amikhan ke anurodh korise, “Jodi tumikhan moi ke Prabhu te biswasi ase koi kene bhabe, tene hole moi laga ghor te ahhi kene thakibi.” Aru tai amikhan ke mani bole bonaise.

Susamachar nimite bondhi ghor te rakhise

Amikhan prathana kora jagah te jai thaka somoite, bhabisya kobole para atma ekta pora dhora ekjon noukarni suali logot te lok paise; tai bhabisya kowa pora tar malik khan ke bisi labh ani dithise. Tai Paul aru amikhan laga pichete ahhi kene, hala kori koise, “Etu manuh khan Sob pora Untcha Isor laga noukar khan ase, tumikhan ke poritran laga rasta jonai di ase.” Tai bisi din tak eneka korise. Paul tu bisi biya pai kene, ghuri kene hei atma ke koise, “Moi tumi ke Jisu Khrista laga nam te hukum di ase, tai pora bahar ulai jabi.” Aru hei somoite ulai jaise.

Jitia tar malik khan pora tarkhan laga labh laga asha tu khotom hoi jaise koi kene dikhise, tarkhan Paul aru Silas ke dhori kene, bajar te huküm kora manuh khan laga age te tanikena loi jaise. Tarkhan ke niyom kora manuh khan logot te loi kene koise, “Etu manuh khan Yehudi ase, amar sheher ke gondugol kori ase, aru tarkhan eneka niyom khan prachar kori ase juntu amikhan Roma laga manuh khan nimite grohon koribole aru kori bole thik nahoi.”

Bhir khan bhi tarkhan ke mari bole mili jaise, aru niyom kora manuh khan pora Paul aru Silas laga kapur phatai di kene tarkhan ke lathi pora mari bole hukum dise. Tarkhan ke bisi mari diya pichete, tarkhan ke bondhi ghor te hali dise, aru bondhi ghor rokhiya ke tarkhan ke bhal pora rukhibole hukum dise. Eneka hukum pai kene, tai tarkhan ke bhitor laga kamra te bondh kori dise aru tarkhan laga theng khuri laga majote bandhi dise.

Adha rati nisena somoite Paul aru Silas pora prathana korise aru amar Pitri ke geet gai thakise, aru bondhi manuh khan pora tarkhan laga kotha hunise. Achanak pora dangor mati hili kene bondhi ghor laga bhetimul ke hilai dise; hei somoite sob dorja khuli jaise aru sob manuh laga sikris khuli jaise. Bondhi ghor rokhiya tu uthi kene, bondhi ghor laga dorja khan khula dikhise, aru bondhi manuh khan polai jaise koi kene bhabi kene, nijor ke morabole tar talwar ulaise. Kintu Paul pora hala kori koise, “Nijor ke kiba nokoribi, kilemane amikhan sob yate ase!”

Bondhi ghor rokhiya tu puhor mangi kene, bhitor te dour kene ahhise, aru kapi kapi kene Paul aru Silas laga age te girise. Titia tai tarkhan ke bahar te loi ani kene koise, “Dangor manuh khan, poritran pabole moi ki koribo lage?”

Aru tarkhan koise, “Prabhu Jisu ke biswas koribi, titia tumi poritran pabo, tumi aru tumar laga ghor manuh khan.” Aru tarkhan pora Prabhu laga kotha tai aru tar laga ghor te thaka sob manuh ke koise. Rati laga hei somoite, tai tarkhan ke loi kene tarkhan laga ghao khan dhui dise; titia tai aru tar laga ghor manuh khan sob hei somoite baptizma loise. Tai tarkhan ke nijor ghor te loi ani kene, tarkhan age te kha-luwa rakhise, aru amar Pitri ke biswas kora karne tai nijor laga ghor manuh khan logot te bisi khushi hoise.

Kintu jitia phojur hoise, niyom kora manuh khan pora sipahi khan ke pathai kene koise, “Hei manuh khan ke chari dibi.”

Bondhi ghor rokhiya tu Paul ke koise, “Niyom kora manuh khan pora tumikhan ke chari dibole hukum pathaise. Etiya bahar ulai ahhi kene shanti pora jabi.”

Kintu Paul pora tarkhan ke koise, “Amikhan Roma laga manuh hoilebi, kuntu bisar nokori kene, sob manuh laga age te tarkhan amikhan ke marise, aru bondhi ghor te hali dise. Etiya tarkhan amikhan ke chupchap pora pathai dibole mon kori ase? Nahobo! Tarkhan nijor ahhi kene amikhan ke bahar loi jabi.”

Sipahi khan pora etu kotha khan niyom kora manuh khan ke koise, aru tarkhan Roma laga manuh ase koi kene huni kene tarkhan bhoi khaise. Tarkhan ahhi kene, khyama mangise, tarkhan ke bahar loi jaise, aru sheher pora jabole anurodh korise. Etu karne tarkhan bondhi ghor pora ulai kene Lydia laga ghor te jaise. Ta te tarkhan bhai khan ke lok paise, tarkhan ke mon dangor kori dise, aru ta pora jaise.