Pasonir Kormo 17 FHB Father's Heart Bible™

17 ¹Amphipolis aru Apollonia paar kori kene, tarkhan Thessalonica te ahhise, ta te Yehudi khan laga prarthana ghor ekta thakise. ²Paul tu, hodai nisena, tarkhan logot te jaise aru tin-ta Bisram din te Shastro pora tarkhan logot kotha-patise. ³Shastro tu kuli kene aru bujhai dise, Khrista ke dukh pabo lage aru mora pora jinda hobo lage koi kene, aru koise, “Ji Jisu ke moi tumikhan ke prachar kori ase, Tai he Khrista ase.” ⁴Tarkhan majot te kunba khan mani loise aru Paul aru Silas logot milise, aru bisi bhokti thaka Grik manuh khan aru bisi dangor mahila khan bhi logot milise. ⁵Kintu Yehudi khan suku-julia hoise, bazar pora biya manuh khan ke joma korise, bhir ekta bonaise, aru sheher tu ke golmal kori dise. Tarkhan Jason laga ghor te jai kene hamla korise, aru bhir usorte taikhan ke ulai anibole bisarise. ⁶Taikhan ke napai kene, Jason aru kunba bhai khan ke sheher laga adhikari khan usorte tani kene anise, aru hala kori koise, “Prithibi ke ulta-pulta kora eitu manuh khan yate bhi ahhise,” ⁷“Jason pora taikhan ke grohon korise. Taikhan sob pora Caesar laga hukum ke namane, aru dusra raja ekjon ase koi ase—Jisu.” ⁸“Aru taikhan pora eitu kotha khan huna bhir aru sheher laga adhikari khan ke golmal te phelai dise.” ⁹Aru Jason aru baki khan pora jamanot loise pichete, taikhan ke jabole dise.

Berea laga manuh khan Shastro bisari sai

¹⁰Bhai khan pora joldi, rati te Paul aru Silas ke Berea te pathai dise; ta te ponchi kene taikhan Yehudi khan laga prarthana ghor te jaise. ¹¹Eitu Yehudi khan Thessalonica laga khan pora bisi khula-mon thakise, taikhan mon khushi pora kotha tu grohon korise aru eitu kotha khan hosa ase na nai sabole hodai din Shastro bisarise. ¹²Etu nimite taikhan majot te bisi biswas korise, aru bisi mohan Grik mahila aru manuh khan bhi biswas korise. ¹³Jitia Thessalonica pora Yehudi khan Paul pora Berea te bhi amar Pitri laga kotha prachar korise koi kene janise, taikhan bhi ta te jaise, aru bhir khan ke golmal kori kene uksai dise. ¹⁴Bhai khan pora joldi Paul ke samundar phale pathai dise, kintu Silas aru Timothy ta te thakise. ¹⁵Paul ke loi juwa manuh khan tar ke Athens te anise, titia Silas aru Timothy ke joldi tar logot ahhibole hukum di kene jaise.

Paul Athens te ponchise

¹⁶Jitia Paul Athens te taikhan ke rukhi thakise, sheher tu murti pora bhorta thaka dikhi kene, tar bhitor te tar atma khong uthise. ¹⁷Etu nimite tai prarthana ghor te Yehudi khan aru Isor ke puja kora khan logot, aru hodai din bazar te kun ta te thakise taikhan logot kotha-patise. ¹⁸Epicurus aru Stoic gyani manuh khan majot te kunba khan bhi tar logot tark korise. Kunba khan hudise, “Eitu bakbak kora manuh ki kobole bisari ase?” Dusra khan koise, “Tai bidexi devta khan ke prachar kora nisena lage”—kilemane tai Jisu aru punoruthan laga susamachar prachar kori thakise.

¹⁹Taikhan tar ke loi kene Areopagus te anise, aru hudise, “Tumi dikhai thaka eitu notun sikhai tu ki ase, amikhan janibo pare na nai? ^a a v19 Areopagus, nahole “Mars Pahar,” tu Athens te thaka pathor laga pahar ekta thakise, ta te sheher laga sabha khan notun bhabona aru sikhai khan bisar koribole joma hoise. ²⁰Kilemane tumi amikhan laga kan te ascharya kotha khan anise, etu nimite eitu khan laga ortho ki ase amikhan janibole mon ase.” ²¹Etiya Athens laga sob manuh aru ta te thaka bidexi khan notun kiba kotha kobole nahole hunibole he taikhan laga homoi khisalise, dusra eku te nohoi.

²²Paul Areopagus laga majot te khara hoi kene koise, “Athens laga manuh khan, tumikhan sob rokom te bisi dhormik ase koi kene moi dikhi ase. ²³Kilemane moi paar kori kene tumikhan laga pobitro saman khan sai thaka homoi te, bedi ekta te eneka likha moi paise: ‘Ekjon najana devta ke.’ Tumikhan najani kene ji puja kori ase, eitu ke moi etiya tumikhan ke prachar kori ase. ²⁴Amar Pitri, Kun prithibi aru ta te thaka sob jinis bonaise, aru sorgo aru prithibi laga Malik ase, hath pora bona mondir te Tai nathake, ^b b v24 Paul pora Isor-najana Athens manuh khan ke koise, taikhan puja kora “najana devta” tu hosa te amar Pitri ase — sob jinis laga Bonai-wala, Kun ke kun bhi mondir te rakhibo naparibo. ²⁵aru manuh laga hath pora Tar ke sewa nadiye, Tar kiba dorkar thaka nisena nohoi—Tai nijor pora sob manuh ke jivon, saas, aru sob jinis diye. ²⁶Ekjon manuh pora Tai manuh laga sob desh ke pura prithibi te thakibole bonaise, aru taikhan laga thik homoi aru taikhan laga desh laga simana khan niyam kori dise, ²⁷etu nimite taikhan amar Pitri ke bisaribo, aru olop tak Tar ke bisari kene pabo—hoilebi Tai amikhan ekjon-ekjon pora dur te nohoi, ²⁸kilemane ‘Tar bhitor te amikhan jinda ase, beraise aru thaki ase’; tumikhan laga kunba kobita likha manuh khan pora bhi koise, ‘Amikhan bhi Tar bongsho ase.’ ²⁹Etu karone, amar Pitri laga bacha khan hoi kene, amikhan Sorgiya Jon ke suna, chandi, nahole pathor nisena—manuh laga hunar aru bhabona pora bonaise ekta murti nisena—ase koi kene bhabibo nalage. ³⁰Najani thaka homoi khan ke amar Pitri pora nasai chari dise, kintu etiya Tai sob jagah laga sob manuh ke mon-ghurabole hukum diye. ³¹Tai niyukti kora ekjon manuh pora prithibi ke dharmikota pora bisar koribole din ekta thik korise—tai ke mora pora jinda kori kene sob manuh ke eitu sakhi dise.” ^c c v31 Prithibi ke bisar koribole amar Pitri pora niyukti kora manuh tu Jisu ase; sob manuh ke Pitri laga sakhi tu eitu ase, Tai Jisu ke mora pora jinda kori dise.

³²Mora khan laga punoruthan laga kotha huni kene, kunba khan thatta korise; dusra khan koise, “Eitu kotha te amikhan tumi ke aru hunibo.” ³³Etu nimite Paul taikhan ke chari kene jaise. ³⁴Kintu kunba manuh khan tar logot milise aru biswas korise, Areopagus laga Dionysius, Damaris koi kene ekjon mahila, aru dusra khan bhi.