Otsak 17

17 ¹Amphipolis eina Apolloniali peichao zatta athumna Jihudiwui synagogue akha khalei Thessalonicali vai. ²Paulna khangachā eina athumli vāzangda, sabbath kathumthang Kathara Lairik eina athumli ngayāt ngaroka. ³Kathara Lairik sholaga, Khristana kachotkachāng phungphalungra kala kathiwui eina ringshokphalungra kaji hāngchitheida, "Ina nathumli hāshok kahai Jishu hi Khrista china" da hānga. ⁴Athumwui ngachaili kaikhana shitsangda Paul eina Silaswui ngasovai, kala shitkasanga Greeknao kachungkha eina akhoka sha̱nao kaikhala ngasovai. ⁵Kha Jihudibingna mikpaishihaoda, markli khalei makaphā mibing kaikhali kazipkhuida, mi sorkhangasai keinung chi ngayaonapha ngasaka. Anili yaruili khuishok khavai phāda Jasonwui shimli ngasamrā ngaroka. ⁶Anili masamphangthuda, Jason eina shitkasangabing kaikhali keinungwui akhavābingwui mangāli tukkhuilaga khuivai, vaoda hānga, "Okathuili khangatāk eina phalat ngasaka mibing hi hilila rāhaira, ⁷Jasonna anili mathānthup samphangkhui. Athum saikorana Caesarwui ainbing ngakaikashi, Jishu kaho awunga khangatei akha lei da hānga. ⁸Kaphenbing hi kashā yarui eina keinungwui khamungabing chi athumna ning ngatha̱ ngasaka." ⁹Jason eina achangbingwui eina aman lupā khuikahaiwui thili, anili chihohaowa.

Bereanaobingna Kathara Lairik Ayangkhui

¹⁰Shitkasangabingna ngalāngda Paul eina Silasli chithang ngayā Bereali chihovai; vākashung tharan anina Jihudiwui synagogueli vai. ¹¹Jihudibing hi Thessalonicawui mi eina ning mathingsangla, tui chi khamathān eina khuikasanga, kala kaphenbing hi mashungla kaji theikhavai thangkachida Kathara Lairik ayangkhui. ¹²Chieina athum ngachaili mi kachungkhana shitsanghaowa, kala khayākaka Greek sha̱nao eina mayarnao kachungkhala shitsanghaowa. ¹³Thessalonicawui Jihudibingna Paulna Berealila ithumwui Avāwui tui hāshok kahai kaji theihaoda, athum chilila vālaga yaruibingli sa̱tā kala ning ngatha̱ ngasaka. ¹⁴Shitkasangabingna ngalāngda Paulli shamadru shongli chihovai, kha Silas eina Timothyna chili pamsanga. ¹⁵Paulli ngasovābingna ali Athensli vāshungda khuivai, chiwui thili Silas eina Timothy kashap eina tangda awuili rāra da ningkhami khuilaga latunga.

Paulna Athensli Vāshung

¹⁶Paulna Athensli anili honpamda leilakha, keinung chi meoma̱na pemtinghai kaji theida, awui alungli awui manglā malung thuingasaka. ¹⁷Chiwui vang eina ana synagogueli Jihudibing eina Vareli khokharumabingli hāngchithei kala ngaphata, kala thangkachida markli leikasā mi saikoralila ngaphata. ¹⁸Epicurean kala Stoic thangkhamei phaibing kaikhanala alila khangaphatla ngaphata. Kaikhana ngahāna, "Morsaptap kahai hipāna khi hāngkhavai sai kajikhala?" Khangateibingna hānga, "Ana yur kateiwui varebing khangarān mi khalei kathāna." Kaja ana Jishu kala ringkhalui chiwui paokaphā hāshokhaowa.

¹⁹Athumna ali khuilaga Areopagusli rāmi, ngahānda, "Nana chishutkhami tamkachithei kadhar hi khikhala kaji ithumna theihaopaira? ^a a v19 Areopagus, lah "Mars Hill" da kaho, chiya Athenswui lung phungrei akhana, apam chili keinung chiwui khareiabingna tamkachithei kadhar kala ningphanin kadharbing chāng tamyangkhavai rākazipa. ²⁰Kaja nana ngateihang kahai otbing ithumwui khanāli rākhui, chiwui vang chibingwui kakhalat khikhala kaji ithumna theihaokhangaina." ²¹Chitharan Athenswui mi kachiva̱ kala apam chili kapama yur kateibingna khangatei khikha maleila, kadhar kahai khichān hāngmira, lah nganākhuimila maningmāng atam vātchinga.

²²Paulna Areopaguswui alungli nganingkada hānga, "Athenswui mibing, nathum apong kachiva̱li dharma mataimeida katong khalei kaji ina thei. ²³Kaja ina yaokup kahaiwui thili nathumwui kathara otbing chi chāng tamyanglaga, 'Makathei vare akhawui vang' da kapisang hanphut akha ina thei. Chiwui vang, nathumna matheila khorumkhami chi, ara ina nathumli hāshokra. ²⁴Okathui kala chiwui alungli khalei ot saikora kasā, kazing eina ngaleiwui Akhavā ithumwui Avāna pāng eina kasā shimbingli mapammana, ^b b v24 Athenswui varebing khorumabingli Paulna hānga kaja athumna khorumkhami "makathei vare" chiya khamathā ithumwui Avāna—ot saikora kasā Semkakhuina, khipā shim akhalidala mapamkhui ngasakkhami china. ²⁵lah khikha darkar kasā thāda miwui pāng eina otram ngatha̱khami maningmana; kaja ana khalattana mi kachiva̱li kharing, khaksui, kala ot saikora mina. ²⁶Ana mi akha eina miwui yur kachiva̱li okathui hupta ringda ngasaka, athumwui atam kala athumwui ram thari chāmihaida, ²⁷chiwui vang athumna ithumwui Avāli phāda, alila khāhuilaga samphangpai khavaina. Chithālala ana ithum kachiva̱wui eina matāthuimana, ²⁸kaja 'Awui lungli ithum ringda, zatta, kala leira'; nathumwui lungchān laa kathemabing kaikhanala hithāda hāngkahai thada, 'Ithumla awui naomayarabingna.' ²⁹Chiwui vang, ithumwui Avāwui naobing sāda, varena chi sinā, lupāsā, lah ngalung kathāna, miwui thangkhamei kala ningphanin eina heikakhui ama̱ kathāna da ithumna phaning mamashungmana. ³⁰Matheimana atambing chi ithumwui Avāna yangkateomisai, kha ara ana apam kachiva̱li khalei mi saikorali ningngatei khavai kasoi. ³¹Ana kapangkhui mipā akha eina okathuili mashun eina bichar sākhavai zimiksho akha chāhaira. Ali kathiwui eina ringshok ngasakta ana mi saikorali chi theishingkhui ngasaka." ^c c v31 Okathuili bichar sākhavai ithumwui Avāna kapangkhui mipā chiya Jishuna; Avāna mi saikorali theishingkhui ngasakhaikhami chiya, ana Jishuli kathiwui eina ringshok ngasakhaikhami china.

³²Kathibingwui ringkhalui chi kashā tharan, kaikhana mana̱shi; khangateibingna hānga, "Hiwui pongli ithumna nali latluida shāra." ³³Chieina Paulna athumli chihohailaga thuihaowa. ³⁴Kha mipā kaikhana alila ngarumda shitsanghaowa. Athumwui ngachaili Areopaguswui Dionysius, Damaris da kaho sha̱nao akha, kala khangateibingla zanga.