Otsak 18

18 ¹Hiwui thili Paulna Athens eina thuihailaga Corinthli vāhaowa. ²Apam chili ana Pontuswui luinganai Aquila kaho Jihudi akha samphanga. Ana apreiva̱ Priscilla eina Italywui eina rida rākachangkhata, khikhalajila Claudiusna Jihudi saikorali Rome eina shokkhavai kasohaisai. Paulna anili rāyangmi, ³athumla ana kasā ot chi sāwui vang, ana athumli ngasoda pamda ot sai; kaja athumva rāmrah samebingna. ⁴Sabbaththang kachida ana synagogueli ngaphat-ngayāt sāda, Jihudibing kala Greekbinglila phayetmi khavai hotnai. ⁵Silas eina Timothy Macedonia eina rākachangkhata tharan, Paulna tui hāshok khavai khalatta samichinga, Jihudibingli Jishu chi Khristana da shākhi mi. ⁶Athumna ali khangararla hāngmachin tharan, ana awui kachon kathangtāhailaga hānga, "Nathumwui ashee nathum khalattawui kuili leiranu! Chiwui pongli iwui khayon maleimana. Ara eina thuida ina Gentilebingli vāra."

⁷Ana synagogue eina thuihailaga Titus Justus kaho ithumwui Avāli khorum kasā mipawui shimli vāhaowa; awui shim synagoguewui khongnainaoli lei. ⁸Synagoguewui akhavā Crispusna awui shimkhur katonga eina Proholi shitsanghaowa; kala Paulwui tui kashā Corinthwui mi kachungkhana shitsanghaowa kala ra̱hika.

⁹Ngayā akhali Prohona khamahā eina Paulli hānga, "Mangacheealu; matui thuilu, kasaikha mapamalu, ¹⁰khikhalajila ina nali ngasoda lei, kala khipānakha nali ngararlaga sākashi masārarmara, khikhalajila keinung hili iwui mi kachungkha lei."

¹¹Chieina Paulna zingkum akha kala kachāng tharuk athumwui ngachaili ithumwui Avāwui tui tamchitheida pamsanga.

¹²Galliona Achaiawui governor sāda leilakha, Jihudibingna ningkha sāda Paulli ngarar khavai kazipa, kala ali kārot mangāli khuirai, ¹³hānga, "Mipā hina ainli mangakaikhavai apong eina mibingli Vareli khorum khavai phayeta."

¹⁴Paulna matui khavai leilakha, Galliona Jihudibingli hānga, "Hi khikha khayon lah makaphā morei akha khalei maningsi kaja, O Jihudibing, iva nathumli ja̱mi khavai maram leisara. ¹⁵Hi tui, namei, kala nathum khalattawui ainwui pongli khangarok kajiwui vang, nathum khalattana kupkhuilu. Hikathā otli ina bichar masāmana. ¹⁶Kala ana athumli kārot mangā eina kashamhaowa."

¹⁷Chieina athum saikorana synagoguewui akhavā Sosthenesli yonkhuilaga bichar sākhangayi apam mangāli ali shaowa; kha Galliona saikora hili maphaninghaowa.

Paulna Antiochli Latunga

¹⁸Paulna Corinthli zimiksho kachungkha pamsanga. Chiwui thili ana ivānaobingli kapāngtui matuilaga, Priscilla eina Aquilana ngasovāda, Syriali marikhong tongkhuihaowa. Cenchreaeli ana awui sam katattā ngasaka, kaja ana tuingashit khuikahaina. ^a a v18 Awui sam katattā kaji chi Vareli khalatta horsangwui Jihudiwui tuingashit chi khamashung eina ngathānmi kaji phongmi kahaina. ¹⁹Athumna Ephesusli rāshunga, apam chili Paulna Priscilla eina Aquilali horhaowa, kha ana khalatta synagogueli vāzangda Jihudibingli ngaphat-ngayāt sai. ²⁰Athumna ali atam kasāngkha pamsang khavai ngahān tharan ana makhuisangmana. ²¹Kha ana, "Ithumwui Avā mayāngaiakha ina nathumwuili latungra" da hānghailaga, Ephesuswui eina marikhong tongkhuihaowa.

²²Caesareali ashoklaga, a kāhaolaga churchli samphang khangarok shālam sai, chiwui thili Antiochli tunhaowa.

²³Chili atam kasha̱nakha pamsanghaiwui thili, Galatia eina Phrygiawui ngaleili vālaga sākhangatha̱bing saikorali pangsang ngasaka. ²⁴Apollos kaho Jihudinao akha Ephesusli rai. Ana Alexandriali kapharā, thangkhamei leikahai mi, kathara lairikli theikashung kahaina. ²⁵Ana Prohowui apongli tamchithei kasā, kala awui manglā ngaher tharan, Jishuwui maramli maron-maron eina matuida tamchithei. Kha ana Johnwui ra̱kahik maningla theisā. ²⁶Ana synagogueli pinglak eina matuihaowa. Priscilla eina Aquilana ali kashā eina, ali ngateida hokhuilaga, ithumwui Avāwui apong chi maron-maron eina hāngchithei.

²⁷Apollosna Achaiali kānkā ngaihao tharan, ivānaobingna ali kasatsanga kala sākhangatha̱bingli ali samphangkhui khavai chithi kapisangmi; ana vākashung eina, lukhamashan mangā eina shitsang kahaibingli mataimeida ngachonmi, ²⁸kaja ana yaruiwui mangāli pinglak eina Jihudibing chili pa̱ngapā ngasaklaga, kathara lairikwui eina Khrista chi Jishulaka da theishingkhui ngasaka.