Otsak 19

19 ¹Apollos Corinthli leilakha, Paulna alung ngalei makānlaga Ephesusli vākashung, kala apam chili sākhangatha̱ kaikha samphanga. ²Ana athumli ngahāna, "Nathum shitsang tharan Manglā Kathara samphanglā?" Athumna ngahānkai, "Maningmana, Manglā Kathara lei kaji ithumna shākha mashāmana."

³Chieina ana ngahāna, "Chithākha nathum khili ra̱hika?" "Johnwui ra̱kahikla," da athumna hānga.

⁴Paulna hānga, "Johnna moreiwui eina ning ngateida ra̱kahikwui tui ra̱hikmi, kala awui thili kharā Jishuli shitsang khavai mibingli hānga."

⁵Hi kashā eina, athumli Proho Jishuwui ming eina ra̱hikmi. ⁶Paulna athumwuitungli pāng parrorda tharan, Manglā Kathara athumwuitungli rāhaowa; athumna tuiyur matuida phongkhami ot sai. ⁷Athum saikora mayarnao tharāda khani sha̱khana.

⁸Paulna synagogueli zangda, kachāng kathum pinglak eina matuida, ithumwui Avā wungramwui pongli ngayāt kala hotnai sai. ⁹Kha kaikhana ning ngakaishitingtinghaoda, mashitkasanga yaruiwui mangāli Shongfali khamashāta, ana athumwui eina zatthuihaowa. Sākhangatha̱bingli khuilaga ana thangkachida Tyrannuswui tamchitheipamli ngayāt sai. ¹⁰Hi zingkum khani leichinga, chiwui vang Asiali khalei Jihudinaobing eina Greeknaobing saikorana Proho Jishuwui tui shākhui.

¹¹Ithumwui Avāna Paulwui pāng eina matakhak kahai ot makhalei sāmi, ¹²chiwui vang awui phasāli sāza̱khui kahai khamorkachon kala pāngkachon china kakazābingli khuivāmi, kala kazāt athumwui eina raihaoda makaphā manglābing athumwui eina soserhaowa.

¹³Zatung zatvā Jihudi kameo kashamshokbing kaikhanala makaphā manglā leibingwuitungli Proho Jishuwui ming ngakao khavai hotnai, "Paulna tamchitheia Jishu eina ina nathumli ningmi" da hānga. ¹⁴Sceva kaho Jihudi pāngmon kharei akhawui naomayara shini china hi sākida sai.

¹⁵Kha makaphā manglā china athumli ngahānkai, "Jishuli iya thei, kala Paullila iya theikhui, kha nathum khipākhala?" ¹⁶Kala makaphā manglā leikahai mipa china athumwuitungli ngasonkai, athum saikorali khuiya, kala athumli yuihaoda, chiwui vang athum apam shim chiwui eina asāmsai eina kala khamā za̱laga eina yāmserhaowa. ¹⁷Ephesusli khalei Jihudinaobing eina Greeknaobing saikorana hi theihaowa. Athum saikora ngacheelakhaowa, kala Proho Jishuwui ming hekmaheilak eina masot mihaowa. ¹⁸Shitkasang mi ngasā kachungkhala rālaga athumwui otsak hāngphatta chitheimi. ¹⁹Meowor kasā mi kachungkhana athumwui lairikbing rākazipta mi saikorawui mangāli mei eina riktāhaowa. Athumna aman ngarumda shānlaga mizā khavai lupā thing ngasām khavaina da thei. ^a a v19 Lupāsā akha chi drachma akhana—ngalang kasā mi akhawui thangkha khavai mizā khavai lupā akhana. Riktā kahai lairikbing chi mizā khavai lupā thing ngasām sha̱kha aman kahaina. ²⁰Chithada Proho Jishuwui tui chi hakmahālak eina mataisangda chungmei ngayaovai.

²¹Hi sākahaiwui thili, Paulna Macedonia eina Achaiali vāda Jerusalemli vākhavai awui manglāli phaninghaowa, kala hānga, "Ina chili vākashung thili, Romela ina yangphalungra." ²²Ana awui assirbing ngachaili Timothy eina Erastus khanili Macedoniali chihovāhaowa, kha khalattava Asiali sha̱rākhathang pamsanghaowa. ²³Atam chitharan Shongfawui pongli khangama̱ hakmahālak akha shokhaowa. ²⁴Kaja Artemiswui lupā kameoshim sākasā lupā kasaa Demetrius kaho mi akhana them kathem kachungkhali ngalang za̱ngasaka. ^b b v24 Ephesuswui Artemis chi keinung chiwui reikhamatai ava̱ kameona. Awui khorumshim chi sākasā atamwui matakhak kahai ot shinithangwui akhana kala keinung chiwui leih-lanwui alungna. ²⁵Ana athum eina chithāda leih kasā ot kasābingli kazipkhuilaga hānga, "Mibing, ithumwui lan hi leih hiwui eina rā kaji nathumna thei. ²⁶Paul hina 'pāng eina heikhui varebing chi varela maningmana' da hānglaga, Ephesusli maningla Asia kachiva̱ sha̱khali mi kachungkhali suida ngareithuihaira kaji nathumna theida shai. ²⁷Khangachā chi ithumwui leih chi khami khayākakā shimānra kajimāng maningmana, kha reikhamatai kameo Artemiswui khorumshim chi khangayia maleiluimara, kala Asia kachiva̱ eina okathuina khorum kameo china, awui kharei chi raimiluira kajina."

²⁸Hi kashā tharan, athum malungvātlakhaoda panglāk eina vaoda hānga, "Ephesusnaobingwui Artemis reikhamataia!" ²⁹Keinung chi pa̱ngapā pemhaowa; Paulwui ngasokazatbing, Macedonianao Gaius eina Aristarchusli shimenshoklaga, athum katonga kakazip pamli ngasamzangda vāzanghaowa. ³⁰Paulna yaruiwui ngachaili vāzang khavai ngaingaithuwa, kha sākhangatha̱bingna ali mamayāmana. ³¹Awui ngasotnao ngaleiwui kathāna kaikhanala ali kakazip pamli mavāzangmilu da poda pao chihovāhaowa. ³²Chitharan kaikhana kha akha vaoda, kaikhana khangatei akha vaowa. Kazip chi pa̱ngapāhaowa, kala athum khisāda kazipkha kaji mi kachiva̱na matheimana. ³³Yaruiwui ngachaili kaikhana Alexanderli tui mi, ali Jihudibingna mangā zatta phāsanga; apāng eina khudam sāda, ana mibingwui mangāli khalatta mashun hāngphat khavai poi. ³⁴A Jihudinao kaji kathei tharan, athum katonga pung khani sha̱kha eina vaoda hānga, "Ephesusnaobingwui Artemis reikhamataia!"

³⁵Keinung kapime china yaruiwui khayetla thā ngasaka kahaiwui thili, ana hānga, "Ephesusnaobing, Ephesuswui keinung hi khangama Artemis kala kazingramwui eina tākahai ama̱wui khorumshim khamayona china jikahaina khipāna matheikhala? ^c c v35 Mi kachungkhana kathara ot hi kazingwui eina tākahai lung akhana da shitkasanga — Artemisna keinung hili ningyāng ung kajiwui machut da khuikahaina. ³⁶Ot hibing mamayā ngasak makhavaiwui vang, nathum khayet thāphalungra kala machukmaja̱la khikha masāpaimara. ³⁷Kaja nathumna khuirai kahai mipā hibing khorumshim khalebingla maning, ithumwui philava̱li kachipat kasābingla maning. ³⁸Chieina Demetrius eina awui otsakruma pāngthembingna khipālikha kaphen leiakha, bichar sāpama leira kala bicharwobing leira. Chili athum akha eina akha aminaoranu. ³⁹Kha nathumna khangatei khikha phākazatakha, chi machatlakla yaruili chuk ngasakra. ⁴⁰Ithum ajawui khangama̱ khangashaowui vang kaphen samphang khavai ka̱lāshāt lei, kaja khonkazār hili mashungkhui khavai maram ithumli maleimana." ⁴¹Kala ana hi hānglaga yaruili chiho ngasaka.