Ephesus te Pitri pora Tar laga Atma dhali di ase

Ephesus te baro jon manuh pora Pobitro Atma laga kotha kitia bhi huna nai. Ta pichete dui saal tak roj sikhai thakise, amar Pitri pora Paul laga hath pora asurit asurit kaam korise, aru bhoot ulai diya manuh khan nijor pora matai luwa atma pora mar khaise, aru jadu laga kitab khan jolai dise. Titia mondir murti bikri kom huwa chandi-kaam kora khan pora Artemis laga naam lori kene chilai dise.

Adhyay 19.

Apollos tu Corinth te thaka homoi te, Paul tu bhitor-desh paar kori kene Ephesus te ponchise, aru ta te kunba chella khan ke paise. Tar pora tarkhan ke hudise, “Tumikhan biswas kora homoi te Pobitro Atma paise na?” Tarkhan jawab dise, “Nai, Pobitro Atma ase koi kene bhi amikhan huna nai.”

Tetiya tar pora hudise, “Tene hole tumikhan ki te baptizma loise?” Tarkhan koise, “John laga baptizma te.”

Paul pora koise, “John pora mon-ghura laga baptizma dise, aru manuh khan ke tar pichete aha ekjon ke—Jisu ke—biswas koribole koise.”

Eitu huni kene, tarkhan Prabhu Jisu laga nam te baptizma loise. Paul pora tarkhan uporte hath rakhise, tetiya Pobitro Atma tarkhan uporte ahhise; aru tarkhan alag-alag bhasha te kotha koise aru bhabobani koise. Sob mili kene baroh-jon nisina manuh thakise.

Paul tu Yehudi mondoli-ghor te ghusi kene, tin mohina tak mon dangor kori kene kotha koise, aru amar Pitri laga rajyo laga kotha bujhai kene manuh khan ke mani lobole koise. Kintu kunba manuh khan mon tan kori kene, biswas koribole mana korise aru manuh bhir laga age te Rasta tu laga biya kotha koise, tetiya tar pora tarkhan pora alag hoi kene, chella khan ke loi kene, hodai din Tyrannus laga porhai-ghor te kotha bujhai thakise. Eitu dui saal tak cholise, etu karne Asia te thaka sob manuh, Yehudi aru Greek duita bhi, Prabhu Jisu laga kotha hunise.

Amar Pitri pora Paul laga hath pora bisi dangor asurit kaam khan korise, eneka tak tu je tar gaw te lagi thaka gamcha aru kapra khan bemar manuh khan logote loi jaise, aru tarkhan laga bemar khan bhag jaise aru biya atma khan tarkhan pora bahar ulai jaise.

Kunba ephale-uphale phuri thaka Yehudi atma khedai diya manuh khan bhi biya atma thaka manuh khan uporte Prabhu Jisu laga nam loi kene kobole kosis korise, aru koise, “Paul pora prachar kora Jisu laga nam te moi tumikhan ke hukum di ase.” Sceva koi kene ekjon Yehudi moha-purohit laga sat-jon putro khan eneka kaam kori thakise.

Kintu biya atma pora tarkhan ke jawab dise, “Jisu ke moi jane, aru Paul ke bhi moi chine, kintu tumikhan kun ase?” Aru biya atma thaka manuh tu tarkhan uporte jamp mari kene, tarkhan sob ke harai dise aru tarkhan uporte takot dikhai dise, etu karne tarkhan nenga aru jokhom hoi kene hei ghor pora polai jaise. Ephesus te thaka sob Yehudi aru Greek khan eitu janise. Tarkhan sob uporte bhoi ahhise, aru Prabhu Jisu laga nam tu bisi mahima paise. Biswasi hoi juwa manuh khan majote bisi jon bhi ahhi kene, tarkhan laga kaam khan shikar korise aru khuli koise. Jadu-tona kora manuh khan majote bisi jon tarkhan laga kitab khan joma kori kene anise aru sob laga age te julai dise. Tarkhan daam tu joma korise aru eitu pachas hajar din laga mojuri soman ase koi kene janise. ^a Eneka kori kene Prabhu Jisu laga kotha tu takot pora bisi dangor hoi kene jiti thakise.

Eitu sob khotom huwa pichete, Paul pora tar nijor atma te Macedonia aru Achaia paar kori kene Jerusalem jabole bhabise, aru koise, “Moi ta te juwa pichete, moi Rome bhi sabo lage.” Tar pora tar modot kora duijon, Timothy aru Erastus ke Macedonia te pathai dise, kintu tar nijor olpo din aru Asia te thakise. Hei homoi te Rasta laga kotha karne ekta dangor gondugol uthise. Kilemane Demetrius koi kene ekjon manuh, Artemis laga chandi mondir khan bona chandi-kaam kora manuh, pora bisi karigor khan ke kaam di thakise. ^b Tar pora tarkhan ke aru eneka dhoron kaam kora manuh khan ke joma kori kene koise, “Bhai khan, amikhan laga dhun-sompoti eitu kaam pora aha tu tumikhan jane. Eitu Paul tu—khali Ephesus te nohoi kintu kiba pura Asia te—bisi manuh khan ke mani lobole koise aru ghurai dise, aru tarkhan ke hath pora bona debota khan tu debota he nohoi koi kene koise, eitu tumikhan dikhi ase aru huni ase. Bhoi eitu he nohoi je amikhan laga kaam laga bhal nam harai jabo, kintu dangor devi Artemis laga mondir tu eku kaam nathaka hoi jabo, aru pura Asia aru prithibi pora puja kora tai laga dangor-pon bhi harai jabo.”

Eitu huni kene, tarkhan khong uthise aru hala kori kene koise, “Ephesus manuh khan laga Artemis dangor ase!” Sheher tu gondugol pora bhorta hoi jaise; aru tarkhan eke logote Paul laga safar-sathi Macedonia manuh Gaius aru Aristarchus ke tani loi kene theater bhitorte polai ghusise. Paul tu manuh bhir majote ghusibole mon korise, kintu chella khan pora tar ke jabole diya nai. Desh laga kunba cholawta khan, jun tar sathi khan thakise, bhi theater te na ghusibole koi kene khobor pathai dise. Hei homoi te kunba ekta kotha hala korise, kunba dusra—joma huwa manuh khan gondugol te thakise, aru bisi jon tarkhan kele joma hoise eitu bhi jana nai. Manuh bhir majote kunba pora Alexander ke sikhai dise, junke Yehudi khan pora age te thelai dise; aru tar pora hath pora iseda kori kene, manuh khan age te nijor karne kotha kobole mon korise. Kintu tai ekjon Yehudi ase koi kene jani kene, tarkhan sob eke logote kiba dui ghanta tak hala kori kene koise, “Ephesus manuh khan laga Artemis dangor ase!”

Sheher laga likha-pora kora manuh pora bhir tu chup korai diya pichete, koise, “Ephesus laga manuh khan, Ephesus sheher tu dangor Artemis laga aru sorgo pora giri aha murti laga mondir-rokhiya ase koi kene kun na jane? ^c Eitu kotha khan ke mana koribo napare, etu karne tumikhan chup-chap thaki kene eku joldi-joldi kaam nakoribi. Kilemane tumikhan eitu manuh khan ke yate anise, jun khan mondir chor bhi nohoi aru amikhan laga devi ke ninda kora bhi nohoi. Etu karne jodi Demetrius aru tar logote kaam kora karigor khan laga kunba uporte kiba golti ase, tene hole bisar-ghor khan khula ase aru cholawta khan bhi ase—tarkhan ta te ekjon-ekjon ke golti lagabi. Kintu jodi tumikhan aru kiba bisari ase, tene hole eitu niom laga sabha te thik kori lobo. Aji laga gondugol karne amikhan golti pabo laga bhoi ase, kilemane eitu hala-gula ke thik koribole amikhan logote eku karon nai.” Aru eitu kotha koi diya pichete, tar pora joma huwa manuh khan ke pathai dise.