அப்போஸ்தலர் 18

18 ¹இதற்குப் பின்பு, பவுல் அத்தேனையை விட்டு கொரிந்துவுக்குப் போனார். ²அங்கே அக்கில்லா என்னும் பேருள்ள ஒரு யூதனைக் கண்டார்; இவன் பொந்து தேசத்தான்; கிலவுதியு ராயன் யூதர்கள் அனைவரும் ரோமாபுரியை விட்டுப் போகும்படி கட்டளையிட்டதால், இவன் தன் மனைவியாகிய பிரிஸ்கில்லாளுடனே இத்தாலியிலிருந்து அப்பொழுதுதான் வந்திருந்தான். பவுல் அவர்களிடம் போய், ³அவர்களும் ஒரே தொழிலைச் செய்தவர்களாயிருந்ததால், அவர்களோடே தங்கி வேலைசெய்தார்—அவர்கள் கூடாரம் தைக்கிறவர்களாயிருந்தார்கள். ⁴ஓய்வுநாள்தோறும் அவர் ஜெபஆலயத்தில் தர்க்கம்பண்ணி, யூதர்களையும் கிரேக்கரையும் நம்பவைக்கப் பிரயத்தனப்பட்டார். ⁵சீலாவும் தீமோத்தேயுவும் மக்கெதோனியாவிலிருந்து வந்தபோது, பவுல் வசனத்தால் நிறைந்தவராய், இயேசுவே கிறிஸ்து என்று யூதர்களுக்குச் சாட்சிபகர்ந்தார். ⁶அவர்கள் எதிர்த்து அவரை நிந்தித்தபோது, அவர் தம்முடைய வஸ்திரங்களை உதறி, அவர்களை நோக்கி: “உங்கள் இரத்தப்பழி உங்கள் தலையின்மேலே இருக்கக்கடவது! நான் அதற்குக் குற்றமற்றவன். இது முதற்கொண்டு நான் புறஜாதியாரிடத்தில் போகிறேன்” என்றார்.

⁷பின்பு அவர் அவ்விடத்தை விட்டுப் புறப்பட்டு, எங்கள் பிதாவை வணங்குகிறவனாகிய தீத்து யுஸ்து என்பவனுடைய வீட்டுக்குப் போனார்; அந்த வீடு ஜெபஆலயத்தின் அருகிலிருந்தது. ⁸ஜெபஆலயத்தலைவனாகிய கிறிஸ்பு தன் வீட்டார் அனைவரோடுங்கூடக் கர்த்தரிடத்தில் விசுவாசமுள்ளவனானான்; பவுலின் வசனத்தைக் கேட்ட கொரிந்தியர்களில் அநேகர் விசுவாசித்து ஞானஸ்நானம் பெற்றார்கள்.

⁹ஒரு இரவில் கர்த்தர் தரிசனத்திலே பவுலை நோக்கி: “நீ பயப்படாதே; பேசிக்கொண்டேயிரு, மவுனமாயிராதே; ¹⁰நான் உன்னோடே இருக்கிறேன், உனக்குத் தீங்குசெய்யும்படி ஒருவனும் உன்மேல் கைபோடமாட்டான்; இந்தப் பட்டணத்தில் எனக்கு அநேக ஜனங்கள் உண்டு” என்றார்.

¹¹அப்படியே பவுல் அவர்களுக்குள்ளே ஒரு வருஷமும் ஆறு மாதமும் தங்கி, எங்கள் பிதாவின் வசனத்தை உபதேசம்பண்ணினார்.

¹²கல்லியோன் என்பவன் அகாயா நாட்டின் தேசாதிபதியாயிருந்தபோது, யூதர்கள் ஒருமனப்பட்டு பவுலுக்கு விரோதமாய் எழும்பி, அவரை நியாயாசனத்திற்கு முன்பாகக் கொண்டுவந்து: ¹³“இந்த மனிதன் நியாயப்பிரமாணத்துக்கு விரோதமாய் தேவனை வணங்கும்படி ஜனங்களை நம்பப்பண்ணுகிறான்” என்றார்கள்.

¹⁴பவுல் பேசத் தொடங்கும்போது, கல்லியோன் யூதர்களை நோக்கி: “யூதர்களே, இது ஏதாவது அநியாயமாயாவது கொடுமையான குற்றமாயாவது இருந்தால் நான் உங்களைப் பொறுத்துக்கொள்ள நியாயமிருக்கும். ¹⁵இது வார்த்தைகளையும் பேர்களையும் உங்கள் சொந்த நியாயப்பிரமாணத்தையுங்குறித்த தர்க்கமாயிருக்கிறபடியால், நீங்களே இதைப் பார்த்துக்கொள்ளுங்கள். இப்படிப்பட்டவைகளை நான் நியாயந்தீர்க்கமாட்டேன்” என்று சொல்லி, ¹⁶அவர்களை நியாயாசனத்தை விட்டுத் துரத்திவிட்டான்.

¹⁷அப்பொழுது அவர்கள் எல்லாரும் ஜெபஆலயத்தலைவனாகிய சொஸ்தேனேயைப் பிடித்து, நியாயாசனத்திற்கு முன்பாக அடித்தார்கள்; இவைகள் ஒன்றைக்குறித்தும் கல்லியோன் கவலைப்படவில்லை.

பவுல் அந்தியோகியாவுக்குத் திரும்புகிறார்

¹⁸பவுல் இன்னும் அநேக நாட்கள் கொரிந்துவில் தங்கியிருந்தார். பின்பு சகோதர சகோதரிகளிடம் விடைபெற்றுக்கொண்டு, பிரிஸ்கில்லாளும் அக்கில்லாவும் தன்னோடே வர, கப்பல் ஏறி சீரியாவுக்குப் புறப்பட்டுப் போனார். செங்கிரேயா என்னும் இடத்தில் அவர் ஒரு பொருத்தனை செய்திருந்தபடியால், தம்முடைய தலைமயிரைக் களைந்துபோட்டார். ^a a v18 தலைமயிரைக் களைந்துபோட்டது, தேவனுக்கு அர்ப்பணிக்கப்பட்ட ஒரு யூதப் பொருத்தனையின் முறையான முடிவைக் குறித்தது. ¹⁹அவர்கள் எபேசுவுக்கு வந்துசேர்ந்தார்கள்; அங்கே பவுல் பிரிஸ்கில்லாளையும் அக்கில்லாவையும் விட்டுவிட்டு, தானோ ஜெபஆலயத்தில் பிரவேசித்து யூதர்களோடே தர்க்கம்பண்ணினார். ²⁰அவர்கள் இன்னும் அதிக நாட்கள் தங்கும்படி அவரைக் கேட்டுக்கொண்டபோது, அவர் சம்மதிக்கவில்லை. ²¹ஆனால் அவர் அவர்களை நோக்கி: “எங்கள் பிதாவுக்குச் சித்தமானால், நான் மறுபடியும் உங்களிடத்திற்குத் திரும்பிவருவேன்” என்று சொல்லி விடைபெற்றுக்கொண்டு, எபேசுவைவிட்டுக் கப்பல் ஏறிப் போனார்.

²²செசரியா பட்டணத்தில் இறங்கி, அவர் மேலே போய், சபையை வாழ்த்திவிட்டு, அங்கிருந்து அந்தியோகியாவுக்கு இறங்கிப்போனார்.

²³அங்கே சிலகாலம் தங்கியிருந்தபின்பு, அவர் புறப்பட்டு, கலாத்தியா நாட்டையும் பிரிகியா நாட்டையும் கடந்து, சீஷர்கள் எல்லாரையும் பலப்படுத்தினார். ²⁴அப்பொல்லோ என்னும் பேருள்ள ஒரு யூதன் எபேசுவுக்கு வந்தான்; இவன் அலெக்சந்திரியா பட்டணத்தில் பிறந்தவனும், கல்விமானும், வேதவாக்கியங்களில் வல்லவனுமாயிருந்தான். ²⁵இவன் கர்த்தருடைய மார்க்கத்தில் போதிக்கப்பட்டு, ஆவியில் அனலுள்ளவனாய், யோவானுடைய ஞானஸ்நானத்தை மாத்திரம் அறிந்திருந்தும், இயேசுவைக்குறித்துத் திட்டமாய்ப் பேசி உபதேசித்தான். ²⁶இவன் ஜெபஆலயத்தில் தைரியமாய்ப் பேசத் தொடங்கினான். பிரிஸ்கில்லாளும் அக்கில்லாவும் அவன் பேசினதைக் கேட்டு, அவனைத் தனியே அழைத்துக்கொண்டுபோய், எங்கள் பிதாவின் மார்க்கத்தை அவனுக்கு அதிக திட்டமாய் விவரித்துக் காண்பித்தார்கள்.

²⁷அப்பொல்லோ அகாயாவுக்குக் கடந்துபோக மனதாயிருந்தபோது, சகோதர சகோதரிகள் அவனை உற்சாகப்படுத்தி, அவனை ஏற்றுக்கொள்ளும்படி சீஷர்களுக்கு எழுதினார்கள்; அவன் அங்கே வந்தபோது, கிருபையினால் விசுவாசித்தவர்களுக்கு மிகவும் உதவிசெய்தான்; ²⁸ஏனெனில், இயேசுவே கிறிஸ்து என்று வேதவாக்கியங்களினால் ஸ்தாபித்து, யூதர்களை வெளிப்படையாய் பலமாய் கண்டனம்பண்ணினான்.