Paulei Korinta to Lashong Huongkei
Paulei Akila si Priskila yoa Athebü kümbei, hoba Nounyet pendoua sinagoga joyokei, aishanga onou longbü khoei hao neichem to satkei. Mangsanga joyoko kishi dogo mangh ka lenbü khoei, hao po che hoba yoka che khünei kikei. Galioei kümsilei kho ngüh shanga oyophetyobü dogo matjem apyokei, hoba mütshuongei khü shela Sosthenes to ngümbei.
18 1Kho phaia, Paulei Athebü apyokei hoba Korinta to haukei. 2Khünei haoei Ponta kabü, Akila dogo nyenbü Jihudabü che hapbei, haoei haoeibü yak Priskila yoa Italia ka enyu loukei, aishanga Claudiusei Jihudabü pendou Rom ka longla sakkukei. Hibü Paulei haosi to onoukei, 3aishanga haoeneibü kümsilei che ong kikei, haoei haoen yoa longan kümsilei kümkei—haoen neichem kümbü kikei. 4Nounyet angbüa haoei sinagoga joyokei, hoba Jihudabü si Grikbü suletla haujembei. 5Ladang Sila si Timoti Makedonia ka loukei, Paul ngüha khümbo atheko kikei, hoba Khrista kho Jisu ki dogo Jihudabü to aukabü kukei. 6Ladang haoen shingekkei hoba hao to tenyikukei, haoei haoeibü neisimei kangan apbei hoba laukei, “Kaneibü sii kaneibü lolo khua phanga ki! Ngo khonei saüenbü ki. Tou ka ngo Küksithang jungto haulabü.”
7Haoei sinagog apyokei hoba sinagog nyangetnyu kibü, seneibü Bou to lembou Titia Jasta chem to haukei. 8Krispa, sinagog leiyeibü, haoeibü chempen khümbo yoa Bunyubou to mailembei; Paul ngüh ditbü Korintabü juongei mailembei hoba baptikukei.
9Nyetche Bunyubouei mangsanga Paul to laukei, “Tehüt; lauko kingaiashi, telemen, 10aishanga ngo nyi yoa kia, hoba aokei no to amaibü kümla alonglabü, aishanga ho sangnyua ngeibü mütshuong juong kia.”
11Hibü Paulei po che si lit lak thüngkei, haoen yoa seneibü Bou ngüh lenko.
12Galio Akhaia governor kibü jiha, Jihudabüei Paul khulimbo che tegü yeian kamshaikei hoba hao matjemshang thedanga leikei, 13laukei, “Ho mütei mütshuong to ngühkhüm khulimbo Mühghaü lemla suletda.”
14Ladang Paul joyola kiteikei, Galioei Jihudabü to laukei, “Jihudabü, ho aikei amaibü ayingsi shedbü yaangbü shonbü yingan kialonga, ngei kan ngüh natenla mukhoulabü. 15Lausikei ho ngüh, nyen, hoba kaneibü lolo ngühkhüm shangabü lemen yingsije, kan lolo jemashi. Ngei khei tegü ngüh amatjemlabü. 16Hobaje haoei haoen matjemshang ka shian sattikei.”
17Hibü haoen pendouei sinagog leiyeibü Sostheni hatan matjemshang thedanga ngümbei, lausikei Galio khübü shanga ai amaada.
Paul Antiok to Ngaikei
18Paulei Korinta to chalou lounyu thüngkei. Kheijinei haoei jaisinasi shuong to shoukela laukei hoba Priskila si Akila yoa Siria to longchema haukei. Kenkhrea to haoei haoeibü khu kiptikei, aishanga haoei theletbü thekei. a a v18 Haoeibü khu kipbü kho Mühghaü to jembü kuko thekubü Jihudabü takletbü kho khümkhümbü lenlangbü kikei. 19Haoen Efesa to loukei, khünei Paulei Priskila si Akila phokukei, lausikei haoei himshuong sinagog to atan Jihudabü yoa joyokei. 20Ladang haoenei hao to longche thüngashi dogo phekei, haoei asakku. 21Lausikei haoei apyoan laukei, “Seneibü Bou maangangsije, ngei kan jungto loungailabü,” hoba Efesa ka longchema haukei.
22Kaisariaa lotan, haoei angkei, lashong to salem kukei, kheijinei Antiok to louyenkei.
23Khünei jih tuisho kian, haoei Galatia si Frigia danko meimeikei hoba eikshuong pendou hau kingaikei. 24Alexandria ka bukbü, Apola dogo nyenbü Jihudabü che, Efesa to loukei—haoei ngebou müt che kikei, Laishiba hapbüngebü. 25Haoei Bunyubou lam shangabü lenletan kikei, hoba soushou yangsangko, haoei Jisu shangabü thenkei thenko lauko lenkei—lausikei haoei Johan baptikubü lolo ngekei. 26Haoei sinagoga maangei the lauko kikei. Priskila si Akilaei hao ngüh ditkei, hao kukan louan, seneibü Bou lam shangabü thenkeiche thenko lenletkei.
27Ladang Apolaei Akhaia to danla maangkei, jaisinasi shuongei hao hau kingaikei hoba hao sungletla shanga eikshuong to le dokei; louan, onouei haoei mailembü shuong to aeibou thuikei, 28aishanga haoei mütsangto Jihudabü kaangkosekko matkei, Khrista kho Jisu ki dogo Laishiba ka tüktisakkei.
