ሐዋርያት ሥራ 18

18 ¹ከዚህ በኋላ ጳውሎስ አቴንስን ለቅቆ ወደ ቆሮንቶስ ሄደ። ²በዚያም አቂላ የተባለ፣ የጶንጦስ ተወላጅ የሆነ አንድ አይሁዳዊ አገኘ፤ ቀላውዴዎስ አይሁድ ሁሉ ከሮም እንዲወጡ ስላዘዘ፣ አቂላ ከሚስቱ ከጵርስቅላ ጋራ ከኢጣልያ ገና አዲስ መጥቶ ነበር። ጳውሎስም ጠየቃቸው፤ ³ሙያቸው አንድ ስለ ነበር፣ ከእነርሱ ጋራ ተቀምጦ ይሠራ ነበር፤ ሙያቸውም ድንኳን መሥራት ነበር። ⁴በየሰንበቱም በምኵራብ እየተከራከረ አይሁድንና ግሪኮችን ለማሳመን ይጥር ነበር። ⁵ሲላስና ጢሞቴዎስ ከመቄዶንያ በመጡ ጊዜ፣ ጳውሎስ ክርስቶስ ኢየሱስ እንደ ሆነ ለአይሁድ እየመሰከረ ሙሉ ለሙሉ በቃሉ ተጠምዶ ነበር። ⁶እነርሱም በተቃወሙትና በተሳደቡበት ጊዜ፣ ልብሱን እያራገፈ፣ “ደማችሁ በራሳችሁ ላይ ይሁን! እኔ ከእርሱ ንጹሕ ነኝ። ከአሁን ጀምሮ ወደ አሕዛብ እሄዳለሁ” አለ።

⁷ከምኵራቡም ወጥቶ አባታችንን ወደሚያመልክ ወደ ቲቶስ ኢዮስጦስ ቤት ሄደ፤ ቤቱም ከምኵራቡ አጠገብ ነበር። ⁸የምኵራብ አለቃ የሆነው ቀርስጶስ ከቤተ ሰቡ ሁሉ ጋራ በጌታ አመነ፤ ጳውሎስንም የሰሙ ብዙ የቆሮንቶስ ሰዎች አምነው ተጠመቁ።

⁹ጌታም በሌሊት በራእይ ጳውሎስን፣ “አትፍራ፤ ተናገር እንጂ ዝም አትበል፤ ¹⁰እኔ ከአንተ ጋራ ነኝና፤ ማንም ሊጎዳህ አያጠቃህም፤ በዚህ ከተማ ብዙ ሕዝብ አለኝና” አለው።

¹¹ስለዚህ ጳውሎስ የአባታችንን ቃል በመካከላቸው እያስተማረ አንድ ዓመት ከስድስት ወር ተቀመጠ።

¹²ጋልዮስ የአካይያ አገረ ገዥ በነበረ ጊዜ፣ አይሁድ በአንድነት በጳውሎስ ላይ ተነሥተው ወደ ፍርድ ወንበር አመጡት፤ ¹³“ይህ ሰው ሰዎች ሕግን በሚቃረን መንገድ እግዚአብሔርን እንዲያመልኩ ያግባባል” አሉ።

¹⁴ጳውሎስም ሊናገር ባለ ጊዜ፣ ጋልዮስ አይሁድን እንዲህ አለ፤ “እናንተ አይሁድ ሆይ፤ ይህ አንዳች በደል ወይም ክፉ ወንጀል ቢሆን ኖሮ፣ ልታገሣችሁ ምክንያት ባገኘሁ ነበር። ¹⁵ነገር ግን ስለ ቃላትና ስለ ስሞች ስለ ገዛ ሕጋችሁም የሆነ ክርክር ስለ ሆነ፣ ራሳችሁ ፍቱት፤ እኔ እንደዚህ ያለውን ነገር አልፈርድም። ¹⁶ከፍርድ ወንበሩም አባረራቸው።”

¹⁷ሁሉም የምኵራብ አለቃ የሆነውን ሶስቴንስን ይዘው በፍርድ ወንበር ፊት መቱት፤ ጋልዮስ ግን ከዚህ ነገር ምንም ግድ አልሰጠውም።

ጳውሎስ ወደ አንጾኪያ ተመለሰ

¹⁸ጳውሎስም በቆሮንቶስ ብዙ ተጨማሪ ቀኖች ተቀመጠ። ከዚያም ወንድሞችንና እኅቶችን ተሰናብቶ፣ ከጵርስቅላና ከአቂላ ጋራ ወደ ሶርያ በመርከብ ተጓዘ። ስእለት ገብቶ ስለ ነበር፣ በክንክራኦስ ፀጕሩን ተላጨ። ^a a v18 ፀጕርን መላጨት ለእግዚአብሔር የመወሰን የአይሁድ ስእለት በይፋ ማብቃቱን ያመለክታል። ¹⁹ወደ ኤፌሶንም ደረሱ፤ በዚያም ጳውሎስ ጵርስቅላንና አቂላን ተወ፤ እርሱ ራሱ ግን ወደ ምኵራብ ገብቶ ከአይሁድ ጋራ ተከራከረ። ²⁰ተጨማሪ ጊዜ እንዲቆይ በለመኑት ጊዜ፣ እምቢ አለ። ²¹ነገር ግን፣ “አባታችን ቢፈቅድ ወደ እናንተ እመለሳለሁ” ብሎ ተሰናብቶ ከኤፌሶን በመርከብ ተጓዘ።

²²በቂሳርያም ወርዶ፣ ወደ ላይ ወጥቶ ቤተ ክርስቲያንን ሰላምታ ሰጠ፤ ከዚያም ወደ አንጾኪያ ወረደ።

²³በዚያም ጥቂት ጊዜ ከቆየ በኋላ፣ ደቀ መዛሙርትን ሁሉ እያበረታ በገላትያና በፍርግያ አገር አልፎ ተጓዘ። ²⁴በእስክንድርያ የተወለደ አጵሎስ የተባለ አንድ አይሁዳዊ ወደ ኤፌሶን መጣ፤ እርሱም የተማረ ሰው፣ በመጻሕፍት የተካነ ነበር። ²⁵እርሱም የጌታን መንገድ ተምሮ ነበር፤ መንፈሱም እየተቃጠለ ስለ ኢየሱስ በትክክል ይናገርና ያስተምር ነበር፤ ነገር ግን የሚያውቀው የዮሐንስን ጥምቀት ብቻ ነበር። ²⁶በምኵራብም በድፍረት ተናገረ። ጵርስቅላና አቂላም በሰሙት ጊዜ፣ ለብቻው ወስደው የአባታችንን መንገድ ይበልጥ በትክክል አስረዱት።

²⁷አጵሎስም ወደ አካይያ ማቋረጥ በፈለገ ጊዜ፣ ወንድሞችና እኅቶች አበረታቱት፤ ደቀ መዛሙርቱም እንዲቀበሉት ጻፉ፤ በደረሰም ጊዜ በጸጋ ያመኑትን እጅግ ረዳቸው፤ ²⁸ክርስቶስ ኢየሱስ እንደ ሆነ ከመጻሕፍት እያስረዳ፣ በሕዝብ ፊት አይሁድን በኀይል ያስተባብል ነበርና።