ግብሪ ሃዋርያት 18 FHB Father's Heart Bible™

18 ¹ድሕሪዙይ ጳውሎስ ካብ ኣቴና ወፂኡ ናብ ቆሮንቶስ ከደ። ²ኣብኡ ድማ ኣቂላ ዝበሃል ሓደ ኣይሁዳዊ ረኸበ፤ ንሱ ከዓ ወዲ ጳንጦስ ነበረ። ቀላውዴዎስ ኵሎም ኣይሁድ ካብ ሮሜ ክወፁ ስለ ዝኣዘዘ፥ ንሱ ምስ ሰበይቱ ጵርስቅላ ኮይኑ፥ ኣብ ቀረባ እዋን ካብ ኢጣልያ መፂኡ ነበረ። ጳውሎስ ድማ ጠየቖም፤ ³ሓደ ዓይነት ስራሕ ስለ ዝነበሮም ድማ፥ ምሳቶም ተቐሚጡ ሰርሐ፤ ብሞያኦም ከዓ ሰራሕቲ ድንኳን ነበሩ። ⁴ኵሉ ሰንበት ድማ ኣብ ቤተ ፀሎት ኣይሁድ እናተዛረበ፥ ንኣይሁድ ኾነ ንግሪካውያን ከእምን ይፍትን ነበረ። ⁵ሲላስን ጢሞቴዎስን ካብ መቄዶንያ ምስ መፁ፥ ጳውሎስ በቲ ቓል ተታሒዙ፥ ክርስቶስ ኢየሱስ ከም ዝኾነ ንኣይሁድ ይምስክር ነበረ። ⁶ንሳቶም ምስ ተቓወምዎን ምስ ፀረፍዎን ድማ፥ ክዳውንቱ ነገፈ እሞ ከምዙይ በሎም፦ “ደምኩም ኣብ ርእስኹም ይኹን! ኣነ ካብኡ ንፁህ እየ። ካብ ሕዚ ንደሓር ናብ ኣህዛብ ክኸይድ እየ።”

⁷ካብኡ ወፂኡ ድማ ናብ ገዛ ቲቶስ ኢዮስጦስ ከደ፤ ንሱ ኸዓ ንኣቦና ዘምልኽ ነበረ፤ ቤቱ ድማ ኣብ ጥቓ ቤተ ፀሎት ኣይሁድ ነበረ። ⁸ቅርስጶስ እቲ ሓለቓ ቤተ ፀሎት ኣይሁድ ምስ ብዘሎ ቤቱ ብጐይታ ኣመነ፤ ካብ ሰብ ቆሮንቶስ ድማ ብዙሓት ንጳውሎስ ሰሚዖም ኣመኑ፤ ተጠመቑ ኸዓ።

⁹ሓደ ለይቲ ድማ ጐይታ ንጳውሎስ ብራእይ ከምዙይ በሎ፦ “ኣይትፍራሕ፤ ተዛረብ እምበር ስቕ ኣይትበል፤ ¹⁰ኣነ ምሳኻ ኣለኹ እሞ፥ ሓደ እኳ ከጥቅዓካን ክጎድኣካን ኣይኽእልን እዩ፤ ኣብዛ ኸተማ እዚኣ ብዙሕ ህዝቢ ኣለኒ እዩ።”

¹¹ጳውሎስ ድማ ቃል ኣቦና ኣብ ማእኸሎም እናመሃረ፥ ሓደ ዓመትን ሽዱሽተ ወርሕን ተቐመጠ።

¹²ጋልዮን ኣብ ኣካይያ ገዛኢ እንተሎ፥ ኣይሁድ ብሓደ ኾይኖም ኣብ ልዕሊ ጳውሎስ ተንሲኦም፥ ናብ መጋባእያ ፍርዲ ኣምፅእዎ፤ ¹³ከምዙይ ድማ በሉ፦ “እዝ ሰብ እዙይ ንሰባት፥ ንእግዚኣብሄር ካብ ሕጊ ወፃኢ ብዝኾነ መንገዲ ኽሰግዱ የእምኖም ኣሎ።”

¹⁴ጳውሎስ ኽዛረብ ምስ ቀረበ፥ ጋልዮን ነይሁድ ከምዙይ በሎም፦ “ኦ ኣይሁድ፥ እዝ ነገር እዙይ ገለ ዓመፃ ወይ እኩይ ገበን እንተ ዝኸውን፥ ክዕገሰኩም ምኽንያት ምሃለወኒ ነይሩ። ¹⁵እዝ ክርክር ብዛዕባ ቃላት፥ ኣስማት፥ ናትኩም ሕግን ስለ ዝኾነ፥ ባዕልኻትኩም ፍትሑዎ፤ ኣነ ነዝ ዝበለ ነገር ክፈርድ ኣይደልን እየ። ¹⁶ካብ መጋባእያ ፍርዲ ድማ ሰጎጎም።”

¹⁷ኵሎም ድማ ንሶስቴንስ እቲ ሓለቓ ቤተ ፀሎት ኣይሁድ ሒዞም፥ ኣብ ቅድሚ መንበር ፍርዲ ወቕዕዎ፤ ጋልዮን ግና ነዝ ዅሉ ገለ እኳ ኣይገደሶን።

ጳውሎስ ናብ ኣንጾክያ ተመለሰ

¹⁸ጳውሎስ ድማ ኣብ ቆሮንቶስ ገና ብዙሕ መዓልቲታት ተቐመጠ። ብድሕሪኡ ነሕዋት ተሰናቢቱ፥ ምስ ጵርስቅላን ኣቂላን ኮይኑ ናብ ሶርያ ብመርከብ ከደ። ኣብ ክንክሬ ድማ መብፅዓ ኣትዩ ስለ ዝነበረ፥ ፀጕሩ ተላፀየ። ^a a v18 ፀጕሩ ምልፃይ፥ ንእግዚኣብሄር ርእስኻ ናይ ምውፋይ ኣይሁዳዊ መብፅዓ ብወግዒ ምፍፃሙ የመልክት ነበረ። ¹⁹ናብ ኤፌሶን ድማ በፅሑ፤ ጳውሎስ ከዓ ንጵርስቅላን ኣቂላን ኣብኡ ሓደጎም፤ ባዕሉ ግና ናብ ቤተ ፀሎት ኣይሁድ ኣትዩ ምስ ኣይሁድ ተዛረበ። ²⁰ንሳቶም ድማ ገና ኣብኡ ኽፅንሕ ምስ ለመንዎ፥ ንሱ ኣይፈተወን። ²¹ግና “ኣቦና እንተ ፈቒዱ፥ ናባኻትኩም ክምለስ እየ” ኢሉ ተሰናቢቱ፥ ካብ ኤፌሶን ብመርከብ ከደ።

²²ኣብ ቂሳርያ ድማ ወሪዱ ደየበ፤ ንቤተ ክርስቲያን ሰላም ኢሉ ድማ፥ ናብ ኣንጾክያ ወረደ።

²³ኣብኡ ድማ ቑሩብ ጊዜ ምስ ገበረ፥ ንዅሎም ደቀ መዛሙርቲ እናበርትዐ፥ ብሃገር ገላትያን ብፍርግያን ሓለፈ። ²⁴ኣጶሎስ ዝበሃል፥ ኣብ እስክንድርያ ዝተወለደ ሓደ ኣይሁዳዊ ድማ ናብ ኤፌሶን መፀ፤ ንሱ ምሁር ሰብ፥ ኣብ ቅዱሳት መፃሕፍቲ ድማ ኣዝዩ ዝተዋህለለ ነበረ። ²⁵ንሱ መንገዲ ጐይታ ተማሂሩ ነበረ፤ መንፈሱ እናገንፈለ ድማ፥ ብዛዕባ ኢየሱስ ብልክዕ ተዛረበን መሃረን፤ ጥምቀት ዮሃንስ ጥራሕ ግና ይፈልጥ ነበረ። ²⁶ኣብ ቤተ ፀሎት ኣይሁድ ድማ ብትብዓት ተዛረበ። ጵርስቅላን ኣቂላን ከዓ ምስ ሰምዕዎ፥ ናብ ጎኒ ወሲዶም፥ መንገዲ ኣቦና ኣፀቢቖም ገለፁሉ።

²⁷ኣጶሎስ ድማ ናብ ኣካይያ ክሰግር ምስ ደለየ፥ እቶም ኣሕዋት ኣፀናንዕዎ፤ ነቶም ደቀ መዛሙርቲ ድማ ኽቕበልዎ ፅሓፉሎም፤ ንሱ ምስ በፅሐ ኸዓ፥ ነቶም ብፀጋ ዝኣመኑ የመና ረድኦም፤ ²⁸ንሱ ኣብ ቅድሚ ህዝቢ ንኣይሁድ ብብርቱዕ ረትዖም፥ ክርስቶስ ኢየሱስ ከም ዝኾነ ድማ ካብ ቅዱሳት መፃሕፍቲ ኣረጋገፀሎም እዩ እሞ።