Timoti ya Shiga Aikin

Ubanmu ya kira su ta wahayin wani mutumin Makidoniya. Lidiya ta buɗe gidanta; wata baiwa mai duba ta rasa ruhunta, iyayengijinta kuma suka rasa kuɗin shigarsu. Bayan an yi musu duka aka ɗaure su da sarƙoƙi, Bulus da Sila suka raira waƙa da tsakar dare, girgizar ƙasa ta buɗe ƙofofi, aka kuma yi wa mai gadin kurkukun baftisma.

Babi na 16.

Bulus ya ci gaba zuwa Darbe da Listira. A can akwai wani almajiri mai suna Timoti, ɗan wata mace Bayahudiya mai bi, amma mahaifinsa Baheleni ne. 'Yan'uwa a Listira da Ikoniyum suna yabonsa. Bulus yana so yă tafi tare da shi, saboda haka ya ɗauke shi ya yi masa kaciya, saboda Yahudawan waɗannan wurare, gama duk sun san mahaifinsa Baheleni ne. Sa'ad da suke ratsa garuruwan, suka ba su ƙa'idodin da manzanni da dattawa a Urushalima suka kafa, domin su kiyaye su. Saboda haka ikkilisiyoyi suka ƙarfafa cikin bangaskiya, suka kuma riƙa ƙaruwa a yawansu kullum.

Uba ya Kira su zuwa Makidoniya

Suka ratsa yankin Firijiya da Galatiya, da yake Ruhu Mai Tsarki ya hana su yin maganar a Asiya. Da suka isa Misiya, suka yi ƙoƙari su shiga Bitiniya, amma Ruhun Yesu bai bar su ba. Saboda haka suka wuce Misiya, suka gangara zuwa Taruwasa. Da dare Bulus ya ga wahayi: wani mutumin Makidoniya ya tsaya yana roƙonsa, “Ka ƙetare zuwa Makidoniya ka taimake mu.” Da ya ga wahayin, nan da nan muka nemi mu tashi zuwa Makidoniya, muka tabbata Ubanmu ya kira mu domin mu yi musu bishara.

Lidiya ta Buɗe Zuciyarta a Filibi

Saboda haka muka shiga jirgin ruwa daga Taruwasa, muka miƙe zuwa Samotaresi, kashegari kuma zuwa Niyafolis, daga can kuma zuwa Filibi, babban birnin wannan yankin Makidoniya, mallakar Roma. Muka zauna a can kwanaki da dama.

A ranar Asabar muka fita waje da ƙofar gari zuwa wani kogi, muna tsammani akwai wurin addu'a a can. Muka zauna muka yi magana da matan da suka taru a wurin. Wata mace mai suna Lidiya, daga Tiyatira, mai sayar da shunayyar tufa, mai bautar Ubanmu, tana sauraro. Ubangiji ya buɗe zuciyarta ga maganar Bulus. Da aka yi mata baftisma ita da iyalinta, sai ta roƙe mu, “In kun ɗauke ni mai aminci ga Ubangiji, ku zo gidana ku sauka.” Ta kuma rinjaye mu.

An Daure su saboda Bishara

Yayinda muke tafiya wurin addu'a, sai muka sadu da wata baiwa mai aljanin duba; takan sami wa masu ita riba mai yawa ta wurin duba. Ta bi Bulus da mu, tana ihu, “Waɗannan mutane bayin Allah Maɗaukaki ne, suna sanar da ku hanyar ceto.” Ta yi haka kwanaki da yawa. Bulus ya ɓata rai ƙwarai, sai ya juya ya ce wa aljanin, “Na umarce ka da sunan Yesu Almasihu, ka fito daga gare ta.” Nan take ya fito.

Da masu ita suka ga begen ribarsu ya ɓace, sai suka kama Bulus da Sila, suka ja su zuwa kasuwa a gaban masu mulki. Suka kawo su wurin alƙalai, suka ce, “Waɗannan mutane Yahudawa ne, suna tada hankalin birninmu. Suna yaɗa al'adun da bai dace mu Romawa mu karɓa ko mu aikata ba.”

Taron suka haɗu suka fāɗa musu, alƙalai kuma suka tsage tufafin Bulus da Sila, suka ba da umarni a yi musu dūka da sanduna. Bayan sun yi musu dūka kam, sai suka jefa su cikin kurkuku, suka umarci mai gadin kurkuku yă tsare su sosai. Da ya sami wannan umarni, sai ya kulle su a ɗakin ciki, ya kuma sa ƙafafunsu a turu.

Wajen tsakar dare Bulus da Sila suna addu'a suna raira waƙoƙin yabo ga Ubanmu, 'yan kurkuku kuma suna sauraronsu. Ba zato ba tsammani sai wata girgizar ƙasa mai ƙarfi ta girgiza harsashen kurkukun; nan take dukan ƙofofi suka buɗe, sarƙoƙin kowa kuma suka kunce. Mai gadin kurkuku ya farka, ya ga ƙofofin kurkuku a buɗe, sai ya zāre takobinsa yana nufin yă kashe kansa, yana tsammani 'yan kurkuku sun gudu. Amma Bulus ya yi ihu, “Kada ka cuci kanka, gama dukanmu muna nan!”

Mai gadin kurkuku ya nemi fitilu, ya ruga ciki, ya kuma faɗi yana rawar jiki a gaban Bulus da Sila. Sa'an nan ya fito da su waje ya ce, “Ya shugabanni, me zan yi don in sami ceto?”

Suka ce, “Ka gaskata da Ubangiji Yesu, za ka kuwa sami ceto, kai da iyalinka.” Suka yi masa maganar Ubangiji, shi da duk waɗanda suke gidansa. A wannan sa'a ta dare, ya ɗauke su ya wanke musu raunukansu; sa'an nan nan take aka yi masa baftisma shi da dukan iyalinsa. Ya kawo su gidansa, ya shimfiɗa musu abinci, ya kuma yi farin ciki ƙwarai tare da dukan iyalinsa saboda sun gaskata da Ubanmu.

Amma da safiya ta yi, sai alƙalai suka aiki 'yan sanda, suna cewa, “Ku saki waɗannan mutane.”

Mai gadin kurkuku ya gaya wa Bulus, “Alƙalai sun aiko da umarni a sake ku. Yanzu ku fito, ku tafi lafiya.”

Amma Bulus ya ce musu, “Sun yi mana dūka a bainar jama'a, ba tare da shari'a ba, mu da muke 'yan ƙasar Roma, suka kuma jefa mu cikin kurkuku. Yanzu suna so su fitar da mu a ɓoye? A'a! Su kansu su zo su fito da mu.”

'Yan sanda suka kai wa alƙalai waɗannan kalmomi, suka kuma ji tsoro da suka ji su 'yan ƙasar Roma ne. Suka zo suka nemi gafara, suka fito da su, suka kuma roƙe su su bar birnin. Saboda haka suka bar kurkuku suka tafi gidan Lidiya. A can suka ga 'yan'uwa, suka ƙarfafa su, sa'an nan suka tafi.