அப்போஸ்தலர் 16

16 ¹பவுல் தெர்பைக்கும் லீஸ்திராவுக்கும் சென்றார். அங்கே தீமோத்தேயு என்னும் பேருள்ள ஒரு சீஷன் இருந்தான்; அவன் விசுவாசியாகிய ஒரு யூத ஸ்திரீயின் மகன், ஆனால் அவனுடைய தகப்பன் கிரேக்கனாயிருந்தான். ²லீஸ்திராவிலும் இக்கோனியாவிலும் இருந்த சகோதரர்கள் அவனைக்குறித்து நற்சாட்சி சொன்னார்கள். ³பவுல் அவனைத் தன்னோடே அழைத்துக்கொண்டு பயணம் செய்ய விரும்பினார்; அந்த இடங்களிலிருந்த யூதர்களினிமித்தம் அவனை உடன்படிக்கை செய்து விருத்தசேதனம்பண்ணினார்; ஏனெனில் அவனுடைய தகப்பன் கிரேக்கன் என்று அவர்கள் எல்லாரும் அறிந்திருந்தார்கள். ⁴அவர்கள் பட்டணங்கள்தோறும் பயணம்பண்ணி, எருசலேமிலுள்ள அப்போஸ்தலரும் மூப்பரும் தீர்மானித்த கட்டளைகளைக் கைக்கொள்ளும்படி அவர்களிடத்தில் ஒப்புவித்தார்கள். ⁵அப்படியே சபைகள் விசுவாசத்தில் பலப்படுத்தப்பட்டு, நாளுக்குநாள் எண்ணிக்கையில் பெருகின.

எங்கள் பிதா அவர்களை மக்கெதோனியாவிற்கு அழைக்கிறார்

⁶பரிசுத்த ஆவியானவர் ஆசியாவில் வசனத்தைச் சொல்லாதபடி அவர்களைத் தடுத்ததினால், அவர்கள் பிரிகியா கலாத்தியா நாட்டைக் கடந்துபோனார்கள். ⁷மீசியாவுக்கு வந்தபோது, பித்தினியாவுக்குள் பிரவேசிக்க முயற்சித்தார்கள்; ஆனால் இயேசுவின் ஆவி அவர்களுக்கு இடங்கொடுக்கவில்லை. ⁸அப்பொழுது மீசியாவைக் கடந்து, துரோவா பட்டணத்திற்கு இறங்கிப்போனார்கள். ⁹இராத்திரியிலே பவுல் ஒரு தரிசனத்தைக் கண்டார்: மக்கெதோனியா தேசத்து மனுஷன் ஒருவன் நின்று, “நீர் மக்கெதோனியாவுக்குக் கடந்துவந்து எங்களுக்கு உதவிசெய்யும்” என்று அவரை வேண்டிக்கொண்டான். ¹⁰அவர் அந்தத் தரிசனத்தைக் கண்டபின்பு, அவர்களுக்கு நற்செய்தியை அறிவிக்கும்படி எங்கள் பிதா எங்களை அழைத்தார் என்று நாங்கள் நிச்சயித்து, உடனே மக்கெதோனியாவுக்குப் புறப்படும்படி முயற்சித்தோம்.

பிலிப்பியில் லீதியாள் தன் இருதயத்தைத் திறக்கிறாள்

¹¹ஆகவே நாங்கள் துரோவாவிலிருந்து கப்பல் ஏறி, நேராகச் சாமோத்திராக்கே தீவுக்கும், மறுநாள் நெயாப்போலி பட்டணத்துக்கும், ¹²அங்கிருந்து பிலிப்பிக்கும் வந்தோம்; அது மக்கெதோனியா மாகாணத்தின் அப்பகுதியில் முதன்மையான பட்டணமும், ரோமருடைய குடியேற்றமுமாயிருந்தது. அந்தப் பட்டணத்தில் சிலநாள் தங்கியிருந்தோம்.

¹³ஓய்வுநாளிலே நாங்கள் ஜெபம்பண்ணும் இடம் ஒன்று ஆற்றங்கரையில் இருக்குமென்று எண்ணி, நகர வாசலுக்கு வெளியே போய், அங்கே கூடியிருந்த ஸ்திரீகளோடே உட்கார்ந்து பேசினோம். ¹⁴தியத்தீரா பட்டணத்தாளும் இரத்தாம்பர வஸ்திரங்களை விற்கிறவளும் எங்கள் பிதாவைப் பணிந்துகொள்ளுகிறவளுமான லீதியாள் என்னும் பேருள்ள ஒரு ஸ்திரீ செவிகொடுத்துக் கேட்டுக்கொண்டிருந்தாள். பவுல் சொன்ன வார்த்தைகளைக் கவனிக்கும்படி கர்த்தர் அவளுடைய இருதயத்தைத் திறந்தார். ¹⁵அவளும் அவளுடைய வீட்டாரும் ஞானஸ்நானம் பெற்றபின்பு, அவள் எங்களை நோக்கி: “நான் கர்த்தருக்கு உண்மையுள்ளவள் என்று நீங்கள் எண்ணினால், என் வீட்டுக்கு வந்து தங்குங்கள்” என்று வேண்டிக்கொண்டு, எங்களை வருந்திக் கேட்டுக்கொண்டாள்.

நற்செய்திக்காகச் சிறையிடப்பட்டல்

¹⁶நாங்கள் ஜெபம்பண்ணும் இடத்திற்குப் போகையில், குறிசொல்லுகிற ஆவி பிடித்திருந்த ஒரு அடிமைப் பெண் எங்களைச் சந்தித்தாள்; அவள் குறிசொல்லுகிறதினால் தன் எஜமான்களுக்கு மிகுந்த ஆதாயத்தைச் சம்பாதித்துக்கொடுத்துவந்தாள். ¹⁷அவள் பவுலையும் எங்களையும் பின்தொடர்ந்து வந்து: “இந்த மனுஷர் உன்னதமான தேவனுடைய ஊழியக்காரர், இரட்சிப்பின் வழியை உங்களுக்கு அறிவிக்கிறவர்கள்” என்று சத்தமிட்டாள். ¹⁸இப்படி அவள் அநேகநாள் செய்துகொண்டுவந்தாள். பவுல் மிகவும் கலங்கி, திரும்பிப்பார்த்து, அந்த ஆவியை நோக்கி: “நீ இவளைவிட்டுப் புறப்பட்டுப்போ என்று இயேசுகிறிஸ்துவின் நாமத்தினாலே உனக்குக் கட்டளையிடுகிறேன்” என்றார். அந்நேரமே அது புறப்பட்டுப்போயிற்று.

¹⁹தங்கள் ஆதாயத்தின் நம்பிக்கை போய்விட்டதென்று அவளுடைய எஜமான்கள் கண்டபோது, பவுலையும் சீலாவையும் பிடித்து, சந்தைவெளியில் அதிகாரிகளுக்கு முன்பாக இழுத்துக்கொண்டுபோனார்கள். ²⁰அவர்களை நியாயாதிபதிகளிடத்தில் கொண்டுவந்து: “யூதராகிய இந்த மனுஷர் நம்முடைய பட்டணத்தைக் கலகப்படுத்தி, ²¹ரோமராகிய நாம் ஏற்றுக்கொள்ளவும் அனுசரிக்கவும் தகாத முறைமைகளைப் போதிக்கிறார்கள்” என்றார்கள்.

²²ஜனங்களும் அவர்களுக்கு விரோதமாக எழும்பினார்கள்; நியாயாதிபதிகள் அவர்களுடைய வஸ்திரங்களைக் கிழித்துப்போட்டு, அவர்களைப் பிரம்புகளால் அடிக்கும்படி கட்டளையிட்டார்கள். ²³அவர்களை அதிகமாய் அடித்தபின்பு, சிறைச்சாலையில் அடைத்து, அவர்களைப் பத்திரமாய்க் காக்கும்படி சிறைச்சாலைக்காரனுக்குக் கட்டளையிட்டார்கள். ²⁴அப்படிப்பட்ட கட்டளையைப் பெற்ற அவன், அவர்களை உள்ளறையிலே அடைத்து, அவர்களுடைய கால்களைத் தொழுவத்தில் மாட்டிவைத்தான்.

²⁵நடுஇராத்திரியிலே பவுலும் சீலாவும் ஜெபம்பண்ணி, எங்கள் பிதாவைத் துதித்துப் பாடினார்கள்; காவலிலிருந்தவர்கள் அவர்களுக்குச் செவிகொடுத்துக் கேட்டார்கள். ²⁶திடீரென்று பூமி மிகவும் அதிரும்படி பலத்த பூமியதிர்ச்சி உண்டாகி, சிறைச்சாலையின் அஸ்திபாரங்கள் அசைந்தன; உடனே கதவுகளெல்லாம் திறவுண்டு, எல்லாருடைய கட்டுகளும் கழன்றுபோயின. ²⁷சிறைச்சாலைக்காரன் நித்திரை தெளிந்து, சிறைச்சாலையின் கதவுகள் திறந்திருக்கிறதைக் கண்டு, கட்டப்பட்டவர்கள் தப்பியோடிப்போனார்களென்று எண்ணி, பட்டயத்தை உருவி, தன்னைத்தானே கொலைசெய்துகொள்ள முயன்றான். ²⁸ஆனால் பவுல்: “நீ உனக்கு ஒரு தீங்கும் செய்துகொள்ளாதே, நாங்கள் எல்லாரும் இங்கேதான் இருக்கிறோம்” என்று உரத்த சத்தமாய்க் கூப்பிட்டான்.

²⁹அப்பொழுது அவன் விளக்குகளைக் கொண்டுவரச்சொல்லி, உள்ளே ஓடிவந்து, நடுங்கிக்கொண்டு பவுலுக்கும் சீலாவுக்கும் முன்பாக விழுந்தான். ³⁰பின்பு அவர்களை வெளியே அழைத்துக்கொண்டுவந்து: “ஐயா, நான் இரட்சிக்கப்படும்படி என்ன செய்யவேண்டும்?” என்று கேட்டான்.

³¹அதற்கு அவர்கள்: “கர்த்தராகிய இயேசுவை விசுவாசி, அப்பொழுது நீயும் உன் வீட்டாரும் இரட்சிக்கப்படுவீர்கள்” என்றார்கள். ³²அவனுக்கும் அவன் வீட்டிலிருந்த எல்லாருக்கும் கர்த்தருடைய வசனத்தைச் சொன்னார்கள். ³³இராத்திரியில் அந்நேரமே அவன் அவர்களை அழைத்துக்கொண்டுபோய், அவர்களுடைய காயங்களைக் கழுவினான்; உடனே அவனும் அவன் வீட்டாரெல்லாரும் ஞானஸ்நானம் பெற்றார்கள். ³⁴பின்பு அவர்களைத் தன் வீட்டிற்கு அழைத்துக்கொண்டுபோய், அவர்களுக்கு போஜனம் வைத்து, எங்கள் பிதாவை விசுவாசித்ததினால் தன் வீட்டாரெல்லாரோடும் மிகவும் சந்தோஷப்பட்டான்.

³⁵விடியற்காலமானபோது, நியாயாதிபதிகள் காவலாளரை அனுப்பி: “அந்த மனுஷரை விடுதலைபண்ணுங்கள்” என்று சொல்லச்சொன்னார்கள்.

³⁶சிறைச்சாலைக்காரன் இந்த வார்த்தைகளைப் பவுலுக்கு அறிவித்து: “உங்களை விடுதலைபண்ணும்படி நியாயாதிபதிகள் கட்டளை அனுப்பினார்கள்; இப்பொழுது புறப்பட்டுச் சமாதானத்தோடே போங்கள்” என்றான்.

³⁷ஆனால் பவுல் அவர்களை நோக்கி: “ரோமக் குடிமக்களாகிய எங்களை நியாயம் விசாரிக்காமல் வெளியரங்கமாய் அடித்து, சிறைச்சாலையில் போட்டார்களே. இப்பொழுது இரகசியமாய் எங்களை அனுப்பிவிடப்பார்க்கிறார்களா? அப்படியல்ல; அவர்களே வந்து எங்களை வெளியே அழைத்துவிடட்டும்” என்றான்.

³⁸காவலாளர் இந்த வார்த்தைகளை நியாயாதிபதிகளுக்கு அறிவித்தார்கள்; அவர்கள் ரோமக் குடிமக்கள் என்று கேள்விப்பட்டபோது பயந்தார்கள். ³⁹அவர்கள் வந்து, மன்னிப்புக் கேட்டு, அவர்களை வெளியே அழைத்துக்கொண்டுவந்து, பட்டணத்தைவிட்டுப் போகும்படி வேண்டிக்கொண்டார்கள். ⁴⁰அப்படியே அவர்கள் சிறைச்சாலையைவிட்டுப் புறப்பட்டு, லீதியாளுடைய வீட்டிற்குப் போய், அங்கே சகோதரர்களைக் கண்டு, அவர்களுக்குத் தேறுதல் சொல்லிப் புறப்பட்டுப்போனார்கள்.