ሐዋርያት ሥራ 16

16 ¹ጳውሎስ ወደ ደርቤና ወደ ልስጥራ ሄደ። በዚያም ጢሞቴዎስ የተባለ ደቀ መዝሙር ነበረ፤ አማኝ የሆነች የአይሁዳዊት ሴት ልጅ ነበር፤ አባቱ ግን ግሪካዊ ነበረ። ²በልስጥራና በኢቆንዮን ባሉት ወንድሞች ዘንድ መልካም ምስክር ነበረው። ³ጳውሎስ ከእርሱ ጋራ አብሮ እንዲጓዝ ፈለገ፤ ስለዚህ በእነዚያ ስፍራ ስለ ነበሩት አይሁድ ወስዶ ገረዘው፤ አባቱ ግሪካዊ እንደ ነበረ ሁሉም ያውቁ ነበርና። ⁴በከተሞቹ ውስጥ እያለፉ፣ በኢየሩሳሌም የነበሩት ሐዋርያትና ሽማግሌዎች ያሳለፉትን ውሳኔ እንዲጠብቁ ሰጧቸው። ⁵ስለዚህ አብያተ ክርስቲያናት በእምነት ይጸኑ ነበር፤ ዕለት ዕለትም በቍጥር ይጨምሩ ነበር።

አባታችን ወደ መቄዶንያ ጠራቸው

⁶መንፈስ ቅዱስ በእስያ ቃሉን እንዳይናገሩ ስለ ከለከላቸው፣ በፍርግያና በገላትያ አገር አለፉ። ⁷ወደ ሚስያ በደረሱ ጊዜ ወደ ቢታንያ ለመግባት ሞከሩ፤ የኢየሱስ መንፈስ ግን አልፈቀደላቸውም። ⁸ስለዚህ ሚስያን አልፈው ወደ ጢሮአዳ ወረዱ። ⁹ጳውሎስ በሌሊት ራእይ አየ፤ አንድ የመቄዶንያ ሰው ቆሞ፣ “ወደ መቄዶንያ ተሻገርና እርዳን” እያለ ይለምነው ነበር። ¹⁰ራእዩን ካየ በኋላ ወዲያውኑ ወደ መቄዶንያ ለመሄድ ሞከርን፤ ምሥራቹን እንድንነግራቸው አባታችን እንደ ጠራን ተረድተን ነበርና።

ልድያ በፊልጵስዩስ ልቧን ከፈተች

¹¹ስለዚህ ከጢሮአዳ በመርከብ ተነሥተን በቀጥታ ወደ ሳሞትራቄ፣ በማግስቱም ወደ ናጶሊስ ተጓዝን፤ ¹²ከዚያም በመቄዶንያ የዚያ አውራጃ ዋና ከተማ ወደ ሆነችው፣ የሮም ቅኝ ግዛት ወደ ሆነችው ወደ ፊልጵስዩስ ሄድን። በዚያም ጥቂት ቀን ተቀመጥን።

¹³በሰንበት ቀን የጸሎት ስፍራ ያለ መስሎን ከበሩ ውጭ ወደ ወንዝ ዳር ወጣን። ተቀምጠንም በዚያ ከተሰበሰቡት ሴቶች ጋራ ተነጋገርን። ¹⁴ከትያጥራ የመጣች፣ ሐምራዊ ጨርቅ የምትሸጥ፣ አባታችንን የምታመልክ ልድያ የተባለች ሴት ትሰማ ነበር። ጌታም ጳውሎስ የተናገረውን እንድታዳምጥ ልቧን ከፈተ። ¹⁵እርሷና ቤተ ሰቧ ከተጠመቁ በኋላ፣ “ለጌታ ታማኝ እንደ ሆንሁ ከቈጠራችሁኝ፣ ወደ ቤቴ መጥታችሁ ተቀመጡ” ብላ ለመነችን። አሳመነችንም።

ስለ ወንጌል ታሰሩ

¹⁶ወደ ጸሎቱ ስፍራ ስንሄድ፣ የምዋርት መንፈስ ያደረባት አንዲት ባሪያ ልጃገረድ አገኘን፤ እርሷም በምዋርት ለጌቶቿ ብዙ ትርፍ ታስገኝ ነበር። ¹⁷እርሷም ጳውሎስንና እኛን ተከትላ፣ “እነዚህ ሰዎች የልዑል እግዚአብሔር ባሪያዎች ናቸው፤ የድነትን መንገድ ይነግሯችኋል” እያለች ትጮኽ ነበር። ¹⁸ይህንም ብዙ ቀን አደረገች። ጳውሎስም እጅግ ተቸግሮ ዘወር ብሎ መንፈሱን፣ “ከእርሷ እንድትወጣ በኢየሱስ ክርስቶስ ስም አዝሃለሁ” አለው። በዚያም ቅጽበት ወጣ።

¹⁹ጌቶቿም የትርፋቸው ተስፋ እንደ ጠፋ ባዩ ጊዜ፣ ጳውሎስንና ሲላስን ይዘው ወደ ገበያው ወደ ገዦቹ ፊት ጎተቷቸው። ²⁰ወደ ዳኞቹም አቅርበው፣ “እነዚህ ሰዎች አይሁድ ሆነው ከተማችንን ያውካሉ፤ ²¹እኛ ሮማውያን እንድንቀበለውና እንድናደርገው ያልተፈቀደልንን ልማድ ያስተምራሉ” አሉ።

²²ሕዝቡም አብረው ተነሡባቸው፤ ዳኞቹም የጳውሎስንና የሲላስን ልብስ ገፈው በበትር እንዲደበደቡ አዘዙ። ²³እጅግ ከደበደቧቸውም በኋላ ወደ ወኅኒ ጣሏቸው፤ ወኅኒ ጠባቂውንም በጥብቅ እንዲጠብቃቸው አዘዙት። ²⁴እንዲህ ያለ ትእዛዝ ስለ ተቀበለ፣ በውስጠኛው ክፍል አስገብቶ ቈለፋቸው፤ እግሮቻቸውንም በግንድ አጠበቀ።

²⁵እኩለ ሌሊት ገደማ ጳውሎስና ሲላስ ይጸልዩ ነበር፤ ለአባታችንም መዝሙር ይዘምሩ ነበር፤ እስረኞቹም ያዳምጧቸው ነበር። ²⁶ድንገትም ብርቱ የምድር መናወጥ ሆነ፤ የወኅኒውም መሠረት ተናወጠ፤ ወዲያውኑ በሮቹ ሁሉ ተከፈቱ፤ የሁሉም ሰንሰለት ተፈታ። ²⁷ወኅኒ ጠባቂውም ከእንቅልፉ ነቅቶ የወኅኒውን በሮች ተከፍተው ባየ ጊዜ፣ እስረኞቹ ያመለጡ መስሎት ራሱን ሊገድል ሰይፉን መዘዘ። ²⁸ጳውሎስ ግን በታላቅ ድምፅ፣ “ሁላችንም እዚህ ነንና ራስህን አትጕዳ” ብሎ ጮኸ።

²⁹ወኅኒ ጠባቂውም መብራት አስመጥቶ ወደ ውስጥ ሮጦ ገባ፤ እየተንቀጠቀጠም በጳውሎስና በሲላስ ፊት ወደቀ። ³⁰ከዚያም ወደ ውጭ አውጥቶ፣ “ጌቶች ሆይ፣ እድን ዘንድ ምን ማድረግ አለብኝ?” አለ።

³¹እነርሱም፣ “በጌታ በኢየሱስ እመን፤ አንተና ቤተ ሰብህ ትድናላችሁ” አሉት። ³²የጌታንም ቃል ለእርሱና በቤቱ ላሉት ሁሉ ነገሩ። ³³በዚያም የሌሊት ሰዓት ወስዶ ቍስላቸውን አጠበ፤ ወዲያውኑም እርሱና ቤተ ሰቡ ሁሉ ተጠመቁ። ³⁴ወደ ቤቱም አውጥቶ ምግብ አቀረበላቸው፤ በአባታችንም በማመኑ እርሱና ቤተ ሰቡ ሁሉ እጅግ ደስ አላቸው።

³⁵በነጋም ጊዜ ዳኞቹ ሎሌዎችን ልከው፣ “እነዚያን ሰዎች ፍታቸው” አሉ።

³⁶ወኅኒ ጠባቂውም ጳውሎስን፣ “ዳኞቹ እንዲፈቷችሁ ትእዛዝ ልከዋል፤ አሁንም ውጡና በሰላም ሂዱ” አለው።

³⁷ጳውሎስ ግን፣ “እኛ ሮማውያን ዜጎች ሆነን ሳለን ሳይፈርዱብን በሰው ፊት ደበደቡን፤ ወደ ወኅኒም ጣሉን። አሁንስ በስውር ሊያስወጡን ይፈልጋሉን? አይሆንም! እነርሱ ራሳቸው መጥተው ያስወጡን” አላቸው።

³⁸ሎሌዎቹም ይህን ቃል ለዳኞቹ ነገሯቸው፤ እነርሱም ሮማውያን ዜጎች እንደ ሆኑ በሰሙ ጊዜ ፈሩ። ³⁹መጥተውም ይቅርታ ጠየቋቸው፤ አውጥተውም ከተማይቱን ለቀው እንዲሄዱ ለመኗቸው። ⁴⁰ከወኅኒም ወጥተው ወደ ልድያ ቤት ገቡ፤ በዚያም ወንድሞችን አይተው አበረታቷቸው፤ ከዚያም ሄዱ።