Timoteo Bɛka Asɛmpatrɛw Adwuma no Ho
Yɛn Agya nam anisoadehunu mu frɛ wɔn: ɔbarima bi a ɔfi Makedonia. Lidia bue ne fie ma wɔn; abaayewa akoa bi a ɔkyerɛ nkɔm no, honhom a ɛwɔ ne mu no fi ne mu, na ne wuranom hwere wɔn sika. Wɔboro Paulo ne Silas de wɔn gu nkɔnsɔnkɔnsɔn mu, nanso wɔto dwom dasuom, asasewosoɔ bue apono no, na afiase hwɛfoɔ no bɔ asu.
16 1Paulo kɔɔ Derbe ne Listra. Ɔsuani bi wɔ hɔ a wɔfrɛ no Timoteo; ne na yɛ Yudani a ogye di, nanso nʼagya yɛ Helani. 2Anuanom a wɔwɔ Listra ne Ikonio no kamfoo no yiye. 3Paulo pɛɛ sɛ ɔne no tu kwan, enti ɔfaa no twaa no twetia, esiane Yudafo a wɔwɔ saa mmeae no nti, efisɛ wɔn nyinaa nim sɛ nʼagya yɛ Helani. 4Bere a wɔfaa nkurow no mu rekɔ no, wɔde gyinae a asomafo ne mpanyimfo a wɔwɔ Yerusalem no asisi no maa wɔn sɛ wonni so. 5Enti asafo ahorow no gyidi mu yɛɛ den, na wɔn dodow kɔɔ soro da biara.
Agya no Frɛ Wɔn Kɔ Makedonia
6Wɔtwaa Frigia ne Galatia mantam no mu, efisɛ Honhom Kronkron no siw wɔn kwan sɛ wɔnka asɛm no wɔ Asia. 7Bere a woduu Misia no, wɔpɛɛ sɛ wɔkɔ Bitinia, nanso Yesu Honhom no amma wɔn kwan. 8Enti wɔtwaa Misia ho kɔɔ Troas. 9Anadwo Paulo huu anisoadehu bi: Makedoniani bi gyina hɔ resrɛ no se, “Twa bra Makedonia na bɛboa yɛn.” 10Bere a ohuu anisoadehu no wiei no, yɛyɛɛ ntɛm sɛ yɛbɛkɔ Makedonia, efisɛ yehuu sɛ yɛn Agya afrɛ yɛn sɛ yɛnkɔka asɛmpa no nkyerɛ wɔn.
Lidia Bue Ne Koma wɔ Filipi
11Enti yefii Troas kɔɔ po so tee kɔɔ Samotrake, na ade kyee no yɛkɔɔ Neapoli, 12na yefii hɔ kɔɔ Filipi, kurow titiriw bi a ɛwɔ Makedonia mantam no mu, na ɛyɛ Romafo atenae. Yɛtenaa hɔ nna bi.
13Homeda no, yefii kurow no pon ano kɔɔ asubɔnten bi ho, efisɛ yɛsusuw sɛ mpaebɔbea bi wɔ hɔ. Yɛtenaa ase ne mmea a wɔaboa wɔn ho ano wɔ hɔ no kasae. 14Ɔbaa bi a wɔfrɛ no Lidia a ofi Tiatira, a ɔtɔn ntama beredum na ɔsom yɛn Agya no, tiee. Awurade buee ne koma ma ɔtiee Paulo nsɛm no. 15Bere a wɔbɔɔ ɔno ne ne fifo asu no, ɔsrɛɛ yɛn se, “Sɛ mobu me sɛ midi Awurade nokware a, mommra me fi mmɛtena hɔ.” Na ɔhyɛɛ yɛn ma yɛpenee so.
Wɔde Wɔn Gu Afiase Esiane Asɛmpa no Nti
16Bere a yɛrekɔ mpaebɔbea hɔ no, yɛhyiaa akoa abaayewa bi a honhom a ɛde nkɔmhyɛ ba wɔ ne mu; ɔnam nkɔmhyɛ so maa ne wuranom nyaa sika pii. 17Odii Paulo ne yɛn akyi teɛteɛɛ mu se, “Saa mmarima yi yɛ Onyankopɔn Ɔsorosoroni no nkoa, na wɔreka nkwagye kwan no akyerɛ mo.” 18Ɔyɛɛ saa nna pii. Ɛhyɛɛ Paulo abufuw yiye, enti ɔdan ne ho ka kyerɛɛ honhom no se, “Mede Yesu Kristo din hyɛ wo sɛ fi ne mu.” Na ɛfii ne mu amonom hɔ ara.
19Bere a ne wuranom huu sɛ wɔn sikanya anidaso no ayera no, wɔkyeree Paulo ne Silas, twee wɔn kɔɔ gua so kɔɔ atumfo no anim. 20Wɔde wɔn kɔɔ atemmufo no anim kae se, “Saa mmarima yi yɛ Yudafo, na wɔrehaw yɛn kurow. 21Wɔrekyerɛkyerɛ amanne a ɛnsɛ sɛ yɛn a yɛyɛ Romafo gye tom anaa yedi so.”
22Nnipadɔm no nso bɛkaa ho tow hyɛɛ wɔn so, na atemmufo no tetew Paulo ne Silas ntade fii wɔn ho, hyɛe sɛ wɔmfa mmaa mmɔ wɔn. 23Wɔbɔɔ wɔn yiye wiei no, wɔde wɔn guu afiase, na wɔhyɛɛ afiase sohwɛfo no sɛ ɔnwɛn wɔn yiye. 24Esiane saa ahyɛde no nti, ɔde wɔn guu afiase dan a ɛwɔ mu koraa no mu, na ɔde wɔn nan hyɛɛ nnua mu.
25Bɛyɛ dɔn dumien anadwo no, Paulo ne Silas bɔɔ mpae, too ayeyi nnwom maa yɛn Agya, na nneduafo no tiee wɔn. 26Amonom hɔ ara, asasewosow kɛse bi wosowee afiase no fapem; ntɛm ara na apon no nyinaa buebuei, na obiara nkɔnsɔnkɔnsɔn sansan fii ne ho. 27Afiase sohwɛfo no nyanee, na ohuu sɛ afiase apon no abue no, ɔtwee nʼafoa sɛ ɔde rekum ne ho, efisɛ ɔsusuw sɛ nneduafo no aguan. 28Nanso Paulo teɛɛ mu se, “Nnyɛ wo ho bɔne biara, efisɛ yɛn nyinaa wɔ ha!”
29Afiase sohwɛfo no ma wɔde kanea brae, na ɔtuu mmirika kɔɔ mu, ɔrepopo, na ɔhwee ase wɔ Paulo ne Silas anim. 30Afei ɔde wɔn baa abɔnten kae se, “Me wuranom, dɛn na ɛsɛ sɛ meyɛ na wɔagye me nkwa?”
31Na wɔkae se, “Gye Awurade Yesu di, na wobenya nkwa, wo ne wo fifo.” 32Wɔkaa Awurade asɛm no kyerɛɛ ɔno ne wɔn a wɔwɔ ne fi nyinaa. 33Anadwo dɔn no ara mu, ɔfaa wɔn hohoroo wɔn apirakuru; afei wɔbɔɔ ɔno ne ne fifo nyinaa asu ntɛm ara. 34Ɔde wɔn kɔɔ ne fi, de aduan sii wɔn anim, na ɔne ne fifo nyinaa ani gyee yiye sɛ wɔagye yɛn Agya adi.
35Nanso ade kyee no, atemmufo no somaa polisifo kɔkae se, “Monnyaa saa mmarima no.”
36Afiase sohwɛfo no ka kyerɛɛ Paulo se, “Atemmufo no asoma se wonnyaa mo. Enti mumfi adi seesei na monkɔ asomdwoe mu.”
37Nanso Paulo ka kyerɛɛ wɔn se, “Wɔbɔɔ yɛn badwam a wɔammu yɛn atɛn, yɛn a yɛyɛ Romafo, na wɔde yɛn guu afiase. Na afei wɔpɛ sɛ wɔpam yɛn kokoam? Dabi! Wɔn ankasa mmra mmɛyi yɛn mfi ha.”
38Polisifo no de saa nsɛm yi kɔbɔɔ atemmufo no amanneɛ, na bere a wɔtee sɛ wɔyɛ Romafo no, ehu kaa wɔn. 39Wɔbae, srɛɛ wɔn fafiri, de wɔn fii adi, na wɔsrɛɛ wɔn sɛ wɔmfi kurow no mu nkɔ. 40Enti wofii afiase hɔ kɔɔ Lidia fi. Wohuu anuanom no wɔ hɔ, hyɛɛ wɔn nkuran, na wɔkɔe.
