Mi eng' bukuit

Poisyonigap che Kiyoktoi 16 FHB Father's Heart Bible™

Kiistoi 15% eng' kiy ne iale korook →
Bukuit

Konamgei Timoteo eng' Panda

Kiguur icheek Kwandanyo eng' ng'ang'utyetap chii ne po Makedonia. Koyatji Lydia koonnyi; koisto chepto otwogik ne po kayomiset kabuusennyi ak kobetyi chemoinyik rabinikwak. Kirabach ak kirate, kotyenei Paulo ak Silas eng' kemoutap kemoi, kopotan ng'wony koyatagei kurgeetinwek, ak kibatisan riibindetap korgoreet.

Sura 16.

Ki tesak Paulo koba Derbe ak Lystra. Ki mi kasubindet age yooto ne kiguure Timoteo, weeriitap kwonyi ne Yahudindet ne iyani, ago ki Yunanindet kwandanyi. Ki mwaei komyee agobo ineendet tupchosyek che mi Lystra ak Ikonio. Ki mach Paulo kobwa kobooto ineendet, konam anyun ak koketyi ineendet, amu Yahudik che mi oloosyechuuto, amu ki ngen tugul kole Yunanindet kwandanyi. Ye kisiirto nganasook, kiipchi icheek ng'aleek che ki tet kayooktoik ak poisyek che mi Jerusalem, si koriip. Ki igimitu anyun kanisek eng' kayaneet, ak kochang'itu piik peet age tugul.

Guurei Kwanda Icheek Koba Makedonia

Ki siirto icheek komostap Phrygia ak Galatia, amu kiga koger icheek Kabuuset ne Tiliil si momwa ng'olyoot eng' Asia. Kingo it Mysia, ki temgei kochut Bithynia, ago ma chamji Kabuusetap Jeso. Ye kisiirto Mysia, kochoortagei koba Troas. Ki keer Paulo ng'ang'utyet eng' kemout: ki tonone chii age ne po Makedonia, kosoomei ineendet, kole, “Siirto inyoo Makedonia ak itoretech.” Ye kingo keer ng'ang'utyet, ki kitemgei kityo keebe Makedonia, ki kinai kole kaguurech Kwandanyo keyoktoi icheek logoiywek che myach.

Yaatyi Lydia Muguleldanyi eng' Philippi

Ki kinam anyun melisyek eng' Troas, ak kiibe imanda agoi Samothrace, ak eng' peetuut ne isubu koit Neapolis, ak kong'etee olooto koit Philippi, nganaseet ne oo ne po komostanooto po Makedonia, nganaseet ne po Romaik. Ki kimeny olooto peetuusyek che chaang'.

Eng' Sabato ki kimanda eng' kurgeet keebe aineet, ki ibwaat kole mi ole kisaaei. Ki kitebee ak keng'alaal ak kwonyiik che ki yumgei yooto. Ki mi kwonyi age ne kiguure Lydia, ne po Thyatira, ne aldae ngoroik che korooron, ne tyeng'ei Kwandanyo, ki kasei iit. Ki yaat Kiptaiyat muguleldanyi si koepchi iit ng'aleegap Paulo. Ye kingo kisonisyo ineendet kobooto koonnyi, ki kisoomech, kole, “Ngo orwookyo ale aa ne po iman eng' Kiptaiyat, obwa koonnyu ak omeny.” Ak ki konyolunech.

Kiratyin Korgoreet Agobo Logoiywek che Myaach

Ye kiwendi ole saaei, ki kitui ak lakweet age ne otwogindet ne tinyei oindetap ng'oorset; ne kinyorunee piik che tinye ineendet siling'isyek che chaang' eng' ng'oorset. Ki isubi Paulo ak acheek, kowaach, kole, “Pichu ko otwogigap Kamuktaindet Ne Toroor Miising', che iboorchinok ooreetap yetunet.” Ki yai niito eng' peetuusyek che chaang'. Ki nereech Paulo miising', koweigei ak koleenji oindet, “Ang'atin eng' kaineetap Jeso Kristo imanda eng' ineendet.” Ki manda kityo.

Ye kingo keer piik che tinye ineendet kole kagobet mang'unetap siling'isyek, konam Paulo ak Sila, kola icheek koba ole aldoe eng' taitap laitorinik. Kiibe icheek koba kirwoogik, kole, “Pichu ko Yahudik, che yaei ngemnateet eng' nganasennyo. Kaneetei piik pitonwek che ma nyolu si ketaach anan keyai, acheek che po Romaik.”

Ki ibeligei piik che chaang' ak icheek, ak kotengteng'chi kirwoogik ngoroigap Paulo ak Sila, ak kong'at si kebir icheek ak kirokto. Ye kingo kagobir icheek miising', kotoorchi icheek korgoreet, kong'at pounindetap korgoreet koriip icheek komyee. Ye kingo kiget ng'atutyonooto, koger icheek korgoreet ne mi kween, ak korat keelyekwak eng' keetiik.

Eng' kemoi kween ki saaei Paulo ak Sila, ak kotyen tyenwogik che itoroori Kwandanyo, kasei iit icheek kimonjororik. Ki potan ng'wony miising' eng' sainooto kot kochei lumeiywegap korgoreet; kityo koyaatagei kurgotik tugul, ak koibutyo rateiywek che po piik tugul. Ki ng'eet pounindetap korgoreet eng' rwondo, kogeer kurgotigap korgoreet ko yaatotin, koisto rotwennyi komachei kobar ineegei, amu ki ibwaat kole kagomwei kimonjororik. Ago ki waach Paulo, kole, “Meyai ne ya eng' iigei, amu kimi tugul yu!”

Ki soom pounindetap korgoreet lapkeiyosyek, kolabat kochut, ak kobutyi ng'wony kotumdumgei eng' taitap Paulo ak Sila. Ki imut icheek saang', ak kole, “Kiptaiyik, nee ne anyolu kayai si asaru?”

Ak ki le, “Iyan Kiptaiyat Jeso, ak isaru, inyee ak piigap koong'ung'.” Ki mwachi ng'olyootap Kiptaiyat ineendet, kobooto piik tugul che mi koonnyi. Eng' sainooto po kemout, ki nam icheek ak koun pirutikwak; ak kisonisyo ineendet kobooto piik tugul che po koonnyi kityo. Ki imut icheek koba koonnyi, ak konde amitwogik eng' taitap icheek, ak koboiboitu kobooto piik tugul che po koonnyi amu ki iyan Kwandanyo.

Ago ye kingo karon, ki iyookto kirwoogik asigarik, koleenji, “Olakta pichooto.”

Ki mwachi pounindetap korgoreet Paulo, kole, “Ki iyookto kirwoogik ng'aleek si kilaktaak. Manda anyun ak iwe eng' kaalyeet.”

Ago ki leenji Paulo icheek, “Ki kibirech eng' taitap piik, ama kirwoogech, acheek che po Romaik, ak kitoorchech korgoreet. Ara machei komonorsech eng' ung'oot? Achicha! Ingobwa icheek inegei ak koistoenech.”

Ki mwachi asigarik ng'aleechuuto kirwoogik, ak ki iywei ye kingo kagas kole Romaik icheek. Ki pwa ak kosoomei kaalyeet, ak koisto icheek, ak kosoomei icheek si komanda nganaseet. Ki manda anyun eng' korgoreet, ak koba kootap Lydia. Kingo keer tupchosyek, kigaigai icheek, ak komanda.