Teebutyet ne Beesei
Ki ng'at kaneetik che punu Judea kole nyolu komuratan Pororyosyek si kosarak, ak ki iyookto tiyetani murenik koba Jerusalem. Ki bwaate Petero ak Jakobo ole kigoochi Kwandanyo Kabuuset ne Tiliil ma kinde ng'atuutik, ak ki manda baruet ne isto kiboitet. Yeityo ki teerchigei Paulo ak Barnaba agobo Mariko.
Ng'alaali Kwandanyo eng' mustarisyek 17–18
15 1Ki pwa murenik alak che punu Judea ak koneet tupchosyek, koleenji, “Ngot ma kimuratan okweek ko uu piteetap Musa, ma omuuchi osarak.” 2Ye kingo piit tiyet ne ng'waan ak suryet eng' Paulo ak Barnaba kobooto icheek, ki lewen tupchosyek Paulo ak Barnaba ak alak che po icheek kotogosta koba ole mi che kiyooktoi ak poisyek eng' Jerusalem agobo teebutyetani. 3Ye kingo kiyookto icheek eng' kaniset, koyom icheek Phoenikia ak Samaria, komwaei weegutetap Pororyosyek, ak koboiboiyini tupchosyek tugul miising'. 4Ye kingo it Jerusalem, ki taach icheek kaniset ak che kiyooktoi ak poisyek, ak komwa tugul che kiyai Kwandanyo kobooto icheek.
5Ago ki ng'eetun piik alak che kiyanat che po partigap Pharisaik, ak kole, “Manyalu kiyatita icheek ak king'at koriibei ng'atuutyetap Musa.” 6Ki yumgei anyun che kiyooktoi ak poisyek, si kogeer ng'olyoondoni. 7Ye kingo piit suryet ne chaang', ki ng'eetu Petero ak kole, “Che kitupche, ongen ile eng' peetuusyek che po tai ko ki lewen Kwandanyo eng' kwenung'wong', si kogas Pororyosyek ng'olyootap logoiywek che myach eng' kutinnyu ak koyan. 8Ak ki baoryan Kwandanyo, ne ngen muguleldo, kogoochi icheek Kabuuset ne Tiliil, ko uu ye kiyaech. 9Ma ki kobees kwenunnyo ak icheek, kotiliilji mugulelwekwak eng' kayaneet. 10Amu nee anyun si oyom Kwandanyo, oinde jogit kurubtap kasubik, ne ma kimuuchi keip, acheek anan kwanisyekyok? 11Ago keyani ale kisarwech eng' myeeindap Kiptaiyat Jeso, ko uu ye kisarak icheek.”
12Ki siis piik tugul, koepchin iit Barnaba ak Paulo ko amwae kaboorunoik ak kwang'utik che kiyai Kwandanyo eng' Pororyosyek eng' icheek. 13Ye kingo kagomwa icheek, ki wol Jakobo kole, “Che kitupche, ongas anee. 14Ki mwa Simion ole kirutoochi tai Kwandanyo pororyosyek, konam eng' icheek piik che po kainennyi. a a v14 Simeon ko kainetap Petero eng' ng'oliaetap Hebraniik — kiyooktoindet age noto ne ki ng'alaal eng' isetoyet 7. 15Ak namgei ng'aleegap maotik ak niito, ko uu ye ki kisir, keele:
16“‘Letusye ni aweekyigei, ak ateeche emaitap Daudi ne kagoterteer; ateeche karotwekyik, ak aweekyini, b b v16 Ye mwae Jakobo ile teeche Kwandanyo “emaitap Daudi ne kagoterter,” koboorchini weegutet ne ki kiit eng' Jeso, weeriitap Daudi ne ki kiyomis, ne yatei kaa koba piik che punu pororyet age tugul.
17si kocheeng' alagtoigap piik Kwandanyo, agot Pororyosyek tugul che kiguure eng' kainennyu, koleenji Kwandanyo, ne yaei tuguuchu, 18che king'en kobooch keny.’
19Amu nooto, airwookyin ale ma kinyalu kiyaitin Pororyosyek che weekyigei Kwandanyo, 20ago kisirchi icheek koleenji koistoegei tuguuk che kagoyaach eng' tolisienik, ak ng'eiyweet, ak pandap tyong'ik che kititi, ak korotiik. 21Amu ki kiamdaati Musa eng' nganaseet age tugul koigeny, kisomaanini eng' sinagogisyek eng' sabato age tugul.”
Parweet ne po Tupchosyekyok che po Pororyosyek
22Ki cham che kiyooktoi ak poisyek ak kaniset komugul kolewen murenik eng' kwenunnywa ak koyookto icheek Antiokia kobooto Paulo ak Barnaba: Judas ne kiguure Barsaba, ak Silas, kandoik eng' tupchosyek. 23Ki sirchi parwaani kobooto icheek, koleenji, “Acheek che kiyooktoi ak poisyek, tupchosyekwok, kisirwok okweek tupchosyek che po Pororyosyek che menye Antiokia ak Syria ak Kilikia: Chamge.
24Amu kagegas ale ki yaitok piik alak che ki punu eng' acheek eng' ng'aleek, koibil mugulelwekwak, ago ma ki kigoochi icheek ng'atuutik che u no, 25kichamgei eng' kutit agenge kelewen murenik ak keyooktowok, kobooto chamanichu Barnaba ak Paulo. 26Murenik che kagoochi saboonwekwak agobo kainetap Kiptaiyannyo Jeso Kristo. 27Nooto anyun, keyookto Judas ak Silas, che amwaun icheek kityo tuguuchooto eng' kutit. 28Kagechamgei acheek ak Kabuuset ne Tiliil ma kiindewok lautet age ne oo kosiir tuguuchu che tegeksei: 29Oistoegei amitwogik che kigitosechi tolisienik, ak korotiik, ak pandap tyong'ik che kititi, ak ng'eiyweet. Oriibegei eng' tuguuchu ak oyai komyee. Oun komyee.”
30Nooto anyun, ye kingo kiyookto icheek, koba Antiokia, koyum kaniset, ak koigoochi parweet. 31Ye kingo kagosoman icheek, koboiboitu agobo kigaigaiyet. 32Ak Judas ak Silas, che ki maotik kityo, ki igaigai ak kogimit tupchosyek eng' ng'aleek che chaang'. 33Ye kingo meny sait eng' yooto, ki yookto icheek tupchosyek eng' kaalyeet, koba ole mi che ki kiyookto icheek. c c v33 Bukusyek che po tai ko ma tinyei isetoyet 34 eng' yu; bukusyek che isubu kotesi: “Ago ki tet Silas komeny yooto.” 35Ago ki meny Paulo ak Barnaba Antiokia, koneet ak koamdooti ng'olyootap Kiptaiyannyo, kobooto alak che chaang'.
Beesegei Paulo ak Barnaba
36Ye kingo pata peetuusyek alak, ki leenji Paulo Barnaba, “Keweek keruto tupchosyek eng' nganaseet age tugul ole ki kiamda ng'olyootap Kiptaiyannyo, ak kegeer ile menye ano.” 37Ki mach Barnaba koip kobooto icheek Johana ne ki kiguure Mariko. 38Ago ki kwai Paulo kole ma myee koip chiichooto ne ki bagaakta icheek eng' Pamphylia, ak ma ki kwo kobooto icheek poisyet. 39Ki oo tiyennywa miising' kot kobeesegei icheek; ki ip Barnaba Mariko ak koba Kipro, 40ago ki lewen Paulo Silas ak kong'eet, ye kingo kigoochi tupchosyek ineendet eng' myeeindap Kiptaiyannyo. 41Ak ki yom ineendet Syria ak Kilikia, kogimit kanisisyek.