அப்போஸ்தலர் 15

15 ¹சிலர் யூதேயாவிலிருந்து வந்து சகோதரருக்கு உபதேசம் செய்து, “மோசேயின் முறைமையின்படி நீங்கள் விருத்தசேதனம் பண்ணப்படாவிட்டால், இரட்சிக்கப்படமாட்டீர்கள்” என்றார்கள். ²இதைக்குறித்துப் பவுலும் பர்னபாவும் அவர்களோடே கடுமையான வாக்குவாதமும் தர்க்கமும் பண்ணினபோது, இந்தக் கேள்வியைக்குறித்து எருசலேமிலிருக்கிற அப்போஸ்தலரிடத்திற்கும் மூப்பரிடத்திற்கும் போகும்படி பவுலையும் பர்னபாவையும் அவர்களில் வேறு சிலரையும் சகோதரர் நியமித்தார்கள். ³சபையினால் வழியனுப்பப்பட்ட அவர்கள் பெனிக்கே தேசத்தையும் சமாரியாவையும் கடந்துபோய், புறஜாதியார் மனந்திரும்பின செய்தியை விவரித்துச் சொல்லி, சகோதரர் எல்லாருக்கும் மிகுந்த சந்தோஷத்தை உண்டாக்கினார்கள். ⁴அவர்கள் எருசலேமுக்கு வந்தபோது, சபையாரும் அப்போஸ்தலரும் மூப்பரும் அவர்களை ஏற்றுக்கொண்டார்கள்; எங்கள் பிதா தங்களோடிருந்து செய்த யாவற்றையும் அவர்கள் அறிவித்தார்கள்.

⁵ஆனால் பரிசேயர் கூட்டத்தைச் சேர்ந்த சில விசுவாசிகள் எழுந்து, “அவர்களை விருத்தசேதனம் பண்ணவேண்டும் என்றும், மோசேயின் நியாயப்பிரமாணத்தைக் கைக்கொள்ளும்படி கட்டளையிடவேண்டும் என்றும்” சொன்னார்கள். ⁶அப்பொழுது அப்போஸ்தலரும் மூப்பரும் இந்தக் காரியத்தைக் கவனித்துப் பார்க்கும்படி கூடிவந்தார்கள். ⁷மிகுந்த தர்க்கம் நடந்தபின்பு, பேதுரு எழுந்து அவர்களை நோக்கி: “சகோதரரே, புறஜாதியார் என் வாயினால் சுவிசேஷ வார்த்தையைக் கேட்டு விசுவாசிக்கும்படி, ஆரம்ப நாட்களில் எங்கள் பிதா உங்களுக்குள்ளே என்னைத் தெரிந்துகொண்டார் என்பதை நீங்கள் அறிந்திருக்கிறீர்கள். ⁸இருதயங்களை அறிந்திருக்கிற எங்கள் பிதா, நமக்குத் தந்ததுபோலவே அவர்களுக்கும் பரிசுத்த ஆவியானவரைத் தந்து, அவர்களைக்குறித்துச் சாட்சி கொடுத்தார். ⁹விசுவாசத்தினால் அவர்களுடைய இருதயங்களைச் சுத்தமாக்கி, நமக்கும் அவர்களுக்கும் இடையில் யாதொரு வித்தியாசமும் பாராட்டவில்லை. ¹⁰இப்படியிருக்க, நம்முடைய முன்னோர்களாலும் நம்மாலும் சுமக்கமுடியாதிருந்த ஒரு நுகத்தடியைச் சீஷருடைய கழுத்தின்மேல் வைத்து, எங்கள் பிதாவை ஏன் சோதிக்கிறீர்கள்? ¹¹அவர்கள் இரட்சிக்கப்படுவதுபோலவே, நாமும் கர்த்தராகிய இயேசுவின் கிருபையினால் இரட்சிக்கப்படுவோம் என்று விசுவாசிக்கிறோமே” என்றான்.

¹²அப்பொழுது கூட்டத்தார் அனைவரும் அமைதலாயிருந்து, பர்னபாவும் பவுலும் தங்கள் மூலமாய் எங்கள் பிதா புறஜாதியாருக்குள்ளே செய்த அடையாளங்களையும் அற்புதங்களையும் விவரிக்கக் கேட்டுக்கொண்டிருந்தார்கள். ¹³அவர்கள் பேசிமுடித்தபின்பு, யாக்கோபு அவர்களை நோக்கி: “சகோதரரே, எனக்குச் செவிகொடுங்கள். ¹⁴எங்கள் பிதா தமது நாமத்திற்காக ஒரு ஜனத்தைப் புறஜாதிகளிலிருந்து சேர்த்துக்கொள்ளும்படி, முதலாவது அவர்களை எப்படிக் கடாட்சித்தார் என்பதைச் சிமியோன் விவரித்துச் சொன்னான். ^a a v14 சிமியோன் என்பது பேதுருவின் எபிரெயப் பெயர் — 7-ஆம் வசனத்தில் பேசிய அதே அப்போஸ்தலன். ¹⁵தீர்க்கதரிசிகளுடைய வார்த்தைகளும் இதற்கு இசைந்திருக்கிறது; எழுதியிருக்கிறபடி:

¹⁶“‘இதற்குப்பின்பு நான் திரும்பிவந்து, மறுபடியும் கட்டுவேன் தாவீதின் கூடாரத்தை, விழுந்துபோன அதை; நான் மறுபடியும் கட்டுவேன் அதின் பாழிடங்களை, அதை நிலைநிறுத்துவேன், ^b b v16 விழுந்துபோன ‘தாவீதின் கூடாரத்தை’ எங்கள் பிதா மறுபடியும் கட்டுவார் என்று யாக்கோபு சொல்லும்போது, தாவீதின் வாக்குத்தத்தம்பண்ணப்பட்ட குமாரனாகிய இயேசுவினால் நிறைவேறின மறுசீரமைப்பையே அவன் சுட்டிக்காட்டுகிறான்; அவர் எல்லா ஜாதியாருக்கும் குடும்பத்தைத் திறந்துவைக்கிறார்.

¹⁷மற்ற மனுஷர் அனைவரும், என் நாமம் தரிக்கப்பட்ட புறஜாதியார் யாவரும், எங்கள் பிதாவைத் தேடும்படிக்கே, என்று இக்காரியங்களை உண்டாக்குகிற எங்கள் பிதா சொல்லுகிறார், ¹⁸இவைகள் ஆதிகாலமுதல் தமக்குத் தெரிந்திருக்கிறது.’

¹⁹ஆகையால், எங்கள் பிதாவிடத்திற்குத் திரும்புகிற புறஜாதியாரை நாம் தொந்தரவுபடுத்தலாகாது என்று நான் தீர்மானிக்கிறேன், ²⁰ஆனாலும், விக்கிரகங்களால் தீட்டுப்பட்டவைகளுக்கும், வேசித்தனத்திற்கும், நெரித்துக் கொல்லப்பட்ட மிருகத்தின் மாம்சத்திற்கும், இரத்தத்திற்கும் விலகியிருக்கும்படி அவர்களுக்கு எழுதவேண்டும். ²¹ஏனெனில், மோசே பூர்வகாலமுதல் ஒவ்வொரு பட்டணத்திலும் அறிவிக்கப்பட்டு, ஓய்வுநாள்தோறும் ஜெப ஆலயங்களில் வாசிக்கப்பட்டு வருகிறானே” என்றான்.

நமது புறஜாதி சகோதரருக்கு ஒரு நிருபம்

²²அப்பொழுது தங்களில் சிலரைத் தெரிந்துகொண்டு, பவுலோடும் பர்னபாவோடும் அந்தியோகியாவுக்கு அனுப்பும்படி அப்போஸ்தலரும் மூப்பரும் சபையார் அனைவரும் தீர்மானித்தார்கள்: சகோதரரில் தலைவர்களாகிய, பர்சபா என்னப்பட்ட யூதாவையும், சீலாவையுமே தெரிந்துகொண்டார்கள். ²³அவர்கள் கையிலே அவர்கள் இந்த நிருபத்தைக் கொடுத்தனுப்பினார்கள்: “அப்போஸ்தலரும் மூப்பரும் சகோதரருமாகிய நாங்கள் அந்தியோகியாவிலும் சீரியாவிலும் சிலிசியாவிலுமுள்ள புறஜாதி சகோதரருக்கு வாழ்த்துதல் சொல்லி எழுதுகிறதாவது:

²⁴எங்களிடத்திலிருந்து புறப்பட்ட சிலர், நாங்கள் அப்படிக் கட்டளையிடாதிருந்தும், தங்கள் வார்த்தைகளால் உங்களைக் கலங்கப்பண்ணி, உங்கள் இருதயங்களைக் குழப்பினார்கள் என்று நாங்கள் கேள்விப்பட்டபடியால், ²⁵எங்களுக்குப் பிரியமான பர்னபா, பவுல் என்பவர்களோடே சிலரைத் தெரிந்துகொண்டு உங்களிடத்திற்கு அனுப்பும்படி ஒருமனப்பட்டோம். ²⁶இவர்கள் நம்முடைய கர்த்தராகிய இயேசுகிறிஸ்துவின் நாமத்திற்காகத் தங்கள் ஜீவனை ஒப்புக்கொடுத்தவர்கள். ²⁷ஆகையால், யூதாவையும் சீலாவையும் அனுப்பினோம்; இவர்களும் இந்தக் காரியங்களை வாய்மொழியாய் உங்களுக்குச் சொல்லுவார்கள். ²⁸பின்வரும் அவசியமான காரியங்களைத்தவிர, அதிக பாரத்தை உங்கள்மேல் சுமத்தாதிருக்கிறது பரிசுத்த ஆவியானவருக்கும் எங்களுக்கும் நலமாய்க் கண்டது: ²⁹விக்கிரகங்களுக்குப் படைக்கப்பட்டவைகளுக்கும், இரத்தத்திற்கும், நெரித்துக் கொல்லப்பட்ட மிருகத்தின் மாம்சத்திற்கும், வேசித்தனத்திற்கும் விலகியிருங்கள். இவைகளுக்கு உங்களைக் காத்துக்கொண்டால் நன்மையாயிருக்கும். சுகமாய் வாழுங்கள்” என்று எழுதினார்கள்.

³⁰இப்படி வழியனுப்பப்பட்ட அவர்கள் அந்தியோகியாவுக்குப் போய், சபையைக் கூடிவரச்செய்து, அந்த நிருபத்தை ஒப்படைத்தார்கள். ³¹அவர்கள் அதை வாசித்தபோது, அதின் ஆறுதலுக்காகச் சந்தோஷப்பட்டார்கள். ³²யூதாவும் சீலாவும் தாங்களும் தீர்க்கதரிசிகளாயிருந்தபடியால், அநேக வார்த்தைகளினால் சகோதரருக்குப் புத்திசொல்லி, அவர்களைப் பலப்படுத்தினார்கள். ³³அவர்கள் அங்கே சிலகாலம் தங்கியிருந்தபின்பு, தங்களை அனுப்பினவர்களிடத்திற்குச் சமாதானத்தோடே போகும்படி சகோதரர் அவர்களை வழியனுப்பினார்கள். ^c c v33 மிகப் பழமையான பிரதிகளில் இங்கே 34-ஆம் வசனம் இல்லை; பிற்காலப் பிரதிகள், “ஆனாலும் சீலா அங்கே தங்கியிருக்கத் தீர்மானித்தான்” என்று சேர்க்கின்றன. ³⁵பவுலும் பர்னபாவும் அந்தியோகியாவில் தங்கியிருந்து, வேறு அநேகரோடுங்கூட நம்முடைய கர்த்தருடைய வார்த்தையை உபதேசித்துப் பிரசங்கித்தார்கள்.

பவுலும் பர்னபாவும் பிரிந்து செல்கிறார்கள்

³⁶சிலநாட்களுக்குப்பின்பு, பவுல் பர்னபாவை நோக்கி: “நாம் நம்முடைய கர்த்தருடைய வார்த்தையை அறிவித்த ஒவ்வொரு பட்டணத்திலுமுள்ள சகோதரரிடத்திற்குத் திரும்பிப்போய், அவர்கள் எப்படியிருக்கிறார்கள் என்று பார்ப்போம் வாரும்” என்றான். ³⁷மாற்கு என்னப்பட்ட யோவானைக் கூட்டிக்கொண்டுபோகும்படி பர்னபா விரும்பினான். ³⁸ஆனால் பம்பிலியாவிலே தங்களைவிட்டுப் பிரிந்துபோய், தங்களோடே வேலைக்கு வராதிருந்தவனைக் கூட்டிக்கொண்டுபோகக்கூடாது என்று பவுலுக்கு நலமாய்த் தோன்றியது. ³⁹அவர்களுடைய வாக்குவாதம் மிகவும் கடுமையாகி, அவர்கள் ஒருவரையொருவர் விட்டுப் பிரிந்தார்கள்; பர்னபா மாற்குவைக் கூட்டிக்கொண்டு கப்பல் ஏறிச் சீப்புருதீவுக்குப் போனான், ⁴⁰பவுலோ சீலாவைத் தெரிந்துகொண்டு, சகோதரரால் நம்முடைய கர்த்தருடைய கிருபைக்கு ஒப்புவிக்கப்பட்டுப் புறப்பட்டான். ⁴¹அவன் சீரியா, சிலிசியா தேசங்கள்வழியாய்ச் சென்று, சபைகளைப் பலப்படுத்தினான்.