Manuh Khan Ke Bhag Kori Diya Ekta Prosno

Judea pora aha kunba sikhok khan pora koise Porjati khan poritran pabole hoile sunnot koribo lage, aru etu jhagara nimite ekta dol Jerusalem te pathai dise. Peter aru James pora yaad korise kineka amar Pitri pora kunba sorto nathaki kene Atma dise, aru bhar tu utai dibole ekta chithi pathai dise. Titia Mark nimite Paul aru Barnabas alag hoi jaise.

Adhyay 15.

Kunba manuh khan Judea pora ahhi kene bhai khan ke sikhai thakise, “Moses laga niyom hisab te tumikhan sunnot nakorile, tumikhan poritran pabo naparibo.” Jitia Paul aru Barnabas pora tarkhan logot bisi jhagara aru kotha namila hoise, tetiya bhai khan pora Paul, Barnabas aru tarkhan majot pora kunba dusra khan ke eitu prosno nimite Jerusalem te thaka pasoni khan aru bura khan logot jabole basi dise. Girja pora pathai diya karone, tarkhan Phoenicia aru Samaria paar kori kene juaise, aru Porjati khan kineka mon ghurai loise koi thakise, aru eitu pora sob bhai khan ke bisi khushi dise. Jerusalem te punchi kene, girja, pasoni khan aru bura khan pora tarkhan ke grohon korise, aru amar Pitri pora tarkhan logot ki ki korise eitu sob tarkhan pora koi dise.

Kintu Pharisee dol pora kunba biswasi khan uthi kene koise, “Tarkhan ke sunnot koribo lage aru Moses laga niyom mani bole hukum dibo lage.” Tetiya pasoni khan aru bura khan eitu kotha sabole eke logot joma hoise. Bisi kotha namila huwa pichete, Peter uthi kene koise, “Bhai khan, tumikhan jani ase je, shuru laga din khan te amar Pitri pora tumikhan majot pora moi ke basi loise, titia moi laga mukh pora Porjati khan susamachar laga kotha huni kene biswas koribo. Aru mon jana amar Pitri pora, amikhan ke diya nisena tarkhan ke bhi Pobitro Atma di kene gawahi dise. Tai amikhan aru tarkhan majot eku bhed kora nai, biswas pora tarkhan laga mon khan sapha kori dise. Titia hoile, amar baba-pordada khan bhi aru amikhan bhi bukhi bo napara ekta joal chella khan laga gla te rakhi kene, kele amar Pitri ke porikhya kore? Kintu amikhan biswas kore je, tarkhan nisena amikhan bhi Prabhu Jisu laga anugrah pora poritran pabo.”

Pura bhir chup-chap hoi jaise, aru Barnabas aru Paul pora tarkhan laga dwara amar Pitri Porjati khan majot ki ki chihna aru asurit kaam korise koi thaka tarkhan huni thakise. Tarkhan kotha kowa khotom huwa pichete, James pora jawab di koise, “Bhai khan, moi laga kotha huni bi. Simeon pora koise je kineka amar Pitri pora prothom bar jati khan ke saise, aru Tar nam nimite tarkhan majot pora ekta manuh khan ulai loise. ^a Aru bhabobadi khan laga kotha khan eitu logot mili ase, jineka likhi kene ase:

“‘Eitu pichete Moi wapas ahhibo, aru giri kene thaka David laga tombu ke Moi aru bonai dibo; tar bhanga khan ke Moi aru bonai dibo, aru Moi etu ke thik kori dibo, ^b

titia bachi thaka manuh khan amar Pitri ke bisaribo, aru Moi laga nam pora mata sob Porjati khan bhi, eitu sob kora amar Pitri pora koi ase, poila somoy pora jana khan.’

Etu karone, moi eneka bisar kore je, amar Pitri phale ghuri aha Porjati khan ke amikhan digdar nadibo lage, kintu murti khan pora letera kora saman khan, bebichar, gla chipi kene morija janwar laga mangso, aru khoon pora dur thakibole tarkhan ke likhi kene koi dibo lage. Kilemane poila jamana pora sob sheher te Moses laga kotha prachar kori ahhise, aru har ekta Bisram din te mondoli khan te eitu jor pora pori ahhise.”

Amar Porjati Bhai Khan Ke Ekta Chithi

Tetiya pasoni khan, bura khan aru pura girja pora tarkhan majot pora kunba manuh khan basi kene Paul aru Barnabas logot Antioch te pathabole faisla korise: Barsabbas koi mata Judas, aru Silas, jun bhai khan majot te neta khan thakise. Tarkhan logot eneka chithi pathaise: “Pasoni khan aru bura khan, tumikhan laga bhai khan pora, Antioch, Syria aru Cilicia te thaka Porjati bhai khan ke: salaam.

Amikhan majot pora juwa kunba manuh khan ke eneka hukum nadiya hoile bhi, tarkhan pora kotha khan di kene tumikhan ke digdar dise aru tumikhan laga mon ke chinta te rakhise koi kene amikhan hunise, amikhan sob eke mon hoi kene, kunba manuh khan basi loi kene amar morom laga Barnabas aru Paul logot tumikhan logote pathabole thik korise. Eitu manuh khan amar Prabhu Jisu Khrista laga nam nimite nijor jibon di dise. Etu karone amikhan Judas aru Silas ke pathaise, aru tarkhan nijor pora mukh laga kotha pora eke kotha tumikhan ke kobo. Pobitro Atma aru amikhan eneka thik korise je, eitu dorkar kaam khan pora bahar te tumikhan uporte aru bisi boja narakhibo: Murti ke diya kha-luwa, khoon, gla chipi kene morija janwar laga mangso, aru bebichar pora dur thakibi. Eitu khan pora nijor ke rakhile tumikhan bhal koribo. Bhal pora thakibi.”

Titia, tarkhan ke pathai diya pichete, tarkhan Antioch te namise, aru manuh khan ke joma kori kene chithi tu di dise. Aru jitia tarkhan eitu porise, mon dangor kora kotha pora tarkhan khushi hoise. Aru Judas aru Silas, jun nijor bhi bhabobadi thakise, bisi kotha pora bhai khan ke mon dangor korise aru takot dise. Ta te kisu din thaka pichete, bhai khan pora tarkhan ke pathai diya manuh khan logote shanti pora pathai dise. ^c Kintu Paul aru Barnabas Antioch te thaki jaise, aru dusra bisi manuh logot amar Prabhu laga kotha sikhai aru prachar kori thakise.

Paul Aru Barnabas Alag Hoi Jaise

Kisu din pichete, Paul pora Barnabas ke koise, “Ahibi amikhan wapas jai kene, amikhan ki ki sheher te amar Prabhu laga kotha prachar korise, eitu sob sheher te thaka bhai khan ke aru tarkhan kineka ase koi kene sabole jabo.” Etiya Barnabas pora Mark koi mata John ke bhi tarkhan logot loi jabole mon korise. Kintu Paul pora eneka bhabise je, jun manuh Pamphylia te tarkhan ke chari dise aru kaam nimite tarkhan logot joga nai, tai ke loi najuwa he bhal ase. Tarkhan majot eneka dangor jhagara hoise je tarkhan ekjon-ekjon pora alag hoi jaise; Barnabas pora Mark ke loi kene pani jahaj pora Cyprus te juaise, kintu Paul pora Silas ke basi loise, aru bhai khan pora amar Prabhu laga anugrah te di diya pichete tai ulai jaise. Aru tai Syria aru Cilicia paar kori kene juaise, aru girja khan ke takot di thakise.