2 ነገሥት 9

9 ¹ነቢዩ ኤልሳዕ ከነቢያት ልጆች አንዱን ጠርቶ እንዲህ አለው፤ “ወገብህን ታጠቅ፤ ይህን የዘይት ብልቃጥ ይዘህ ወደ ራሞት ዘገለዓድ ሂድ። ²በደረስህም ጊዜ የናምሺ ልጅ የሆነውን የኢዮሳፍጥን ልጅ ኢዩን ፈልግ። ገብተህ ከጓደኞቹ መካከል አስነሥተህ ወደ ውስጠኛው ክፍል ውሰደው።

³“የዘይቱን ብልቃጥ ይዘህ በራሱ ላይ አፍስስና ‘አባታችን እንዲህ ይላል፤ በእስራኤል ላይ ንጉሥ አድርጌ ቀብቼሃለሁ’ በል። ከዚያም በሩን ከፍተህ ሽሽ፤ አትዘግይ።”

⁴ስለዚህ ጐበዙ፣ የነቢዩ አገልጋይ፣ ወደ ራሞት ዘገለዓድ ሄደ። ⁵በደረሰም ጊዜ የሰራዊቱ አለቆች ተሰብስበው ተቀምጠው ነበር። “አንተ አለቃ ሆይ፣ ለአንተ መልእክት አለኝ” አለ። ኢዩም፣ “ከእኛ ለማናችን?” ብሎ ጠየቀ። እርሱም፣ “አንተ አለቃ ሆይ፣ ለአንተ ነው” አለ።

⁶ኢዩም ተነሥቶ ወደ ውስጥ ገባ። ጐበዙም ዘይቱን በራሱ ላይ አፍስሶ እንዲህ አለ፤ “የእስራኤል አምላክ አባታችን እንዲህ ይላል፤ ‘በሕዝቤ፣ በእስራኤል ላይ ንጉሥ አድርጌ ቀብቼሃለሁ። ⁷የጌታህን የአክዓብን ቤት ምታ፤ ስለዚህ የባሪያዎቼን የነቢያትን ደም፣ እንዲሁም የሚያገለግሉኝን ሁሉ ደም በኤልዛቤል ላይ እበቀላለሁ። ⁸የአክዓብ ቤት ሁሉ ይጠፋል። ባሪያም ሆነ ነጻ፣ በእስራኤል ውስጥ ያለውን ወንድ ሁሉ ከአክዓብ አስወግዳለሁ። ⁹የአክዓብን ቤት እንደ ናባጥ ልጅ እንደ ኢዮርብዓም ቤት፣ እንደ አኪያ ልጅ እንደ ባኦስ ቤት አደርገዋለሁ። ¹⁰ኤልዛቤልንም በኢይዝራኤል ዕርሻ ቦታ ላይ ውሾች ይበሉዋታል፤ የሚቀብራትም አይኖርም።’ ” ከዚያም በሩን ከፍቶ ሸሸ።

¹¹ኢዩም ወደ ጌታው መኰንኖች ወጣ። አንዱም፣ “ሁሉም ደኅና ነውን? ይህ ዕብድ ለምን ወደ አንተ መጣ?” ብሎ ጠየቀ። እርሱም፣ “ሰውየውንና የንግግሩን ዐይነት ታውቃላችሁ” አለ።

¹²እነርሱም፣ “ይህ ውሸት ነው! ንገረን” አሉ። እርሱም እንዲህ አለ፤ “እንዲህ ብሎ ነገረኝ፤ ‘አባታችን እንዲህ ይላል፤ በእስራኤል ላይ ንጉሥ አድርጌ ቀብቼሃለሁ።’”

¹³እነርሱም ፈጥነው እያንዳንዳቸው ልብሳቸውን ወስደው ባዶ ደረጃው ላይ ከበታቹ አነጠፉ። መለከትም ነፍተው፣ “ኢዩ ነገሠ!” ብለው ጮኹ።

ኢዩ ኢዮራምንና አካዝያስን ይገድላል

¹⁴የናምሺ ልጅ የሆነው የኢዮሳፍጥ ልጅ ኢዩ በኢዮራም ላይ አደመ። ኢዮራም ከእስራኤል ሁሉ ጋር የሶርያን ንጉሥ አዛኤልን ለመከላከል ራሞት ዘገለዓድን ይጠብቅ ነበር፤ ¹⁵ንጉሡ ኢዮራም ግን የሶርያን ንጉሥ አዛኤልን ሲወጋ ሶርያውያን ያደረሱበትን ቍስል ለመፈወስ ወደ ኢይዝራኤል ተመልሶ ነበር። ኢዩም፣ “ፈቃዳችሁ ከሆነ፣ ይህን በኢይዝራኤል ለማወራት ከከተማዪቱ ማንም አያምልጥ” አለ። ¹⁶ኢዩም ሠረገላውን ተቀምጦ ኢዮራም ወደ ተኛባት ወደ ኢይዝራኤል ሄደ። የይሁዳ ንጉሥ አካዝያስም እርሱን ለመጠየቅ ወርዶ ነበር። ¹⁷በኢይዝራኤል ግንብ ላይ የቆመው ጠባቂ ኢዩ ከጭፍራው ጋር ሲመጣ ባየ ጊዜ፣ “የሰዎች ጭፍራ አያለሁ” ብሎ ጮኸ። ኢዮራምም፣ “ፈረሰኛ አምጡ፤ ሊቀበላቸው ላኩና ‘ሰላም ነውን?’ ብሎ ይጠይቅ” ብሎ አዘዘ።

¹⁸ፈረሰኛውም ኢዩ ዘንድ ሄዶ፣ “ንጉሡ ‘ሰላም ነውን?’ ብሎ ይጠይቃል” አለ። ኢዩም፣ “ሰላም ምን አገባህ? ዘወር ብለህ ተከተለኝ” አለ። ጠባቂውም፣ “መልእክተኛው እነርሱ ዘንድ ደረሰ፤ ነገር ግን አይመለስም” ብሎ አወራ።

¹⁹ንጉሡም ሁለተኛ ፈረሰኛ ላከ። እርሱም እነርሱ ዘንድ ደርሶ፣ “ንጉሡ ሰላም ነውን? ብሎ ይጠይቃል” አለ። ኢዩም፣ “ሰላም ምን አገባህ? ዘወር ብለህ ተከተለኝ” ብሎ መለሰ።

²⁰ጠባቂውም፣ “እነርሱ ዘንድ ደረሰ፤ ነገር ግን አይመለስም። አነዳዱ የናምሺ ልጅ እንደ ኢዩ አነዳድ ነው፤ እንደ ዕብድ ይነዳልና” ብሎ አወራ።

²¹ኢዮራምም፣ “ሠረገላዬን አዘጋጁ” ብሎ አዘዘ። ሠረገላውም ተዘጋጅቶ የእስራኤል ንጉሥ ኢዮራምና የይሁዳ ንጉሥ አካዝያስ እያንዳንዳቸው በየሠረገላቸው ኢዩን ለመቀበል ወጡ፤ በኢይዝራኤላዊው በናቡቴ ዕርሻ ላይ አገኙት።

²²ኢዮራምም ኢዩን ባየ ጊዜ፣ “ኢዩ ሆይ፣ ሰላም ነውን?” ብሎ ጠየቀ። እርሱም፣ “የእናትህ የኤልዛቤል ስፍር ቍጥር የሌለው ዝሙትና ጥንቆላ እስካለ ድረስ፣ ምን ሰላም አለ?” ብሎ መለሰ።

²³ኢዮራምም ዘወር ብሎ ሸሸ፤ አካዝያስንም፣ “አካዝያስ ሆይ፣ ክዳት ነው!” ብሎ ጠራ።

²⁴ኢዩም ቀስቱን በሙሉ ኀይሉ ወጥሮ ኢዮራምን በትከሻዎቹ መካከል መታው። ፍላጻውም ልቡን ስለ በሳው በሠረገላው ውስጥ ተዝለፈለፈ። ²⁵ኢዩም መኰንኑን ባድቅርን እንዲህ አለው፤ “አንሥተህ በኢይዝራኤላዊው በናቡቴ ዕርሻ ቦታ ላይ ጣለው። አንተና እኔ አብረን አባቱን አክዓብን ተከትለን ስንጋልብ፣ አባታችን ይህን ትንቢት በእርሱ ላይ እንደ ተናገረ ዐስብ፤

²⁶‘በእርግጥ ትናንት የናቡቴንና የልጆቹን ደም አየሁ፣ ይላል አባታችን፤ በዚሁ ዕርሻ ቦታ ላይ እበቀልሃለሁ።’ አሁንም የአባታችን ቃል እንደ ተናገረ፣ አንሥተህ በዚያ ዕርሻ ቦታ ላይ ጣለው።”

²⁷የይሁዳ ንጉሥ አካዝያስም ይህን ባየ ጊዜ በቤትሃጋን መንገድ ወደ ላይ ሸሸ። ኢዩም፣ “እርሱንም ምቱት!” ብሎ እያዘዘ አሳደደው። በይብልዓም አጠገብ ወደ ጉር በሚወጣው ዐቀበት ላይ በሠረገላው ውስጥ መቱት፤ ነገር ግን ወደ መጊዶ አምልጦ በዚያ ሞተ። ²⁸ባሪያዎቹም በሠረገላ ወደ ኢየሩሳሌም ወስደው በዳዊት ከተማ ውስጥ ከአባቶቹ ጋር በመቃብሩ ቀበሩት። ²⁹(አካዝያስ በአክዓብ ልጅ በኢዮራም በዐሥራ አንደኛው ዓመት በይሁዳ ላይ ነገሠ።)

የአባታችን ቃል በኤልዛቤል ላይ

³⁰ኢዩም ወደ ኢይዝራኤል መጣ። ኤልዛቤልም ይህን ሰምታ ዐይኖቿን ተኵላ፣ ጠጕሯን አሳምራ በመስኮት ተመለከተች። ³¹ኢዩም በበሩ ሲገባ፣ “ጌታህን የገደልህ ዝምሪ ሆይ፣ ሰላም ነውን?” ብላ ጠየቀች። ^a a v31 ኤልዛቤል ኢዩን “ዝምሪ” ብላ በመጥራት ታፌዝበታለች፤ ዝምሪ የእስራኤልን ዙፋን ለመያዝ ንጉሡን የገደለ፣ ነገር ግን በጥቂት ቀናት ውስጥ የሞተ የሰራዊት መኰንን ነበር፤ እርሷም ኢዩን ጥፋት የሚጠብቀው ከዳተኛ አድርጋ ትፈርጀዋለች።

³²እርሱም ቀና ብሎ ወደ መስኮቱ ተመለከተና፣ “ከእኔ ጋር ማን አለ? ማን?” ብሎ ጮኸ። ሁለት ወይም ሦስት ጃንደረቦችም ወደ እርሱ ተመለከቱ።

³³ኢዩም፣ “ወደ ታች ጣሏት!” አለ። እነርሱም ወደ ታች ጣሏት፤ ከደሟም ከፊሉ ግንቡንና ፈረሶቹን ረጨ፤ ፈረሶቹም ረገጧት።

³⁴ኢዩም ገብቶ በልቶ ጠጥቶ፣ “ይህችን የተረገመች ሴት ተመልከቱና ቅበሯት፤ የንጉሥ ልጅ ነበረችና” አለ።

³⁵ሊቀብሯትም በሄዱ ጊዜ ከራስ ቅሏ፣ ከእግሮቿና ከእጆቿ መዳፎች በቀር ምንም አላገኙም።

³⁶ተመልሰውም ለኢዩ ነገሩት። እርሱም እንዲህ አለ፤ “ይህ አባታችን በባሪያው በቲስብያዊው በኤልያስ በኩል የተናገረው ቃል ነው፤ ‘በኢይዝራኤል ዕርሻ ቦታ ላይ ውሾች የኤልዛቤልን ሥጋ ይበላሉ። ³⁷የኤልዛቤልም ሬሳ በኢይዝራኤል ዕርሻ ላይ እንደ ዕበት ይተኛል፤ ስለዚህ ማንም፣ “ይህች ኤልዛቤል ናት” ሊል አይችልም።’”