2 Wungnaobing 9

9 ¹Elisha marānna marānbingwui naomayarabing akhali hoda hānga, "Nawui shānneira̱ neilu, hi thaokhong khuilu, kala Ramoth-gileadli ungulu. ²Chili vā tharan Nimshiwui athei Jehoshaphatwui naomayara Jehuli samphanglu. Azangda awui ngasotnaobingwui ngachai eina ali ngakarthuimilu, kala ali shimlung akhali khuiunglu.

³Thaokhong khuilaga awui akuili heirorda hānglu, 'Ithumwui Avāna hithāda hānga: Israelwui awunga sākhavai nali tharchisinmira.' Khāmong sholaga yāmvaulu; mahuinganongalu."

⁴Chieina marānwui rao yaronnao chi Ramoth-gileadli vai. ⁵Ana chili vā tharan raimi kathānabing tharāda pamsai. Ana, "Kathāna, nali pao akha lei," da hānga. Jehuna, "Ithumwui khipāwuili?" da ngahāna. "Kathāna, nalina," da ana hānga.

⁶Jehu ngakarthuida shimli azanga. Yaronnao china thao awui akuili heirorda hānga, "Israelwui Vare, ithumwui Avāna hithāda hānga: 'Iwui mibing, Israelwui awunga sākhavai nali tharchisinmira. ⁷Nawui akhavā Ahabwui shimkhurli shaothatlu, chieina iwui rao marānbing kala ili otram ngatha̱ching saikorawui ashee chiwui vang ina Jezebelli athut khuimira. ⁸Ahabwui shimkhur katonga thiserra. Israelli khalei raonao lah ningkhān kahai Ahabwui mevā saikora ina katathaora. ⁹Ahabwui shimkhur chi Nebadwui naomayara Jeroboamwui shimkhur kathāna, kala Ahijahwui naomayara Baashawui shimkhur kathāna ina sāra. ¹⁰Jezebel chi, Jezreelwui leiretli fana ali shaira, kala ali chifa khavai khipākha maleimara.' " Chiwui thili ana khāmong sholaga yāmhaowa.

¹¹Jehu awui akhavāwui otva̱bingli shoka. Akhana ngahāna, "Chingri kahaila? Hi kapāna nawuili khisāda rākhala?" Ana hānga, "Nathumna mipā chi kala awui matui thei."

¹²"Chi kakapikna!" da athumna hānga. "Ithumli hānglu." Ana hānga, "Ana ili hithāda hānga, 'Ithumwui Avāna hithāda hānga: Israelwui awunga sākhavai nali tharchisinmira.'"

¹³Athumna thakta kachichāna awui kachon khuilaga khaokhur atungli ali azingli hamizata. Athumna talla̱ khonglaga panglāk eina vaoda hānga, "Jehu awunga sāhaira!"

Jehuna Joram kala Ahaziahli Shaothat

¹⁴Nimshiwui athei Jehoshaphatwui naomayara Jehuna Joramli makhamayāwui vang ngathumhaowa. (Chi atam Joramna Israel saikora ngasoda Aramwui awunga Hazaelwui vang Ramoth-gilead raikān chipamda, ¹⁵kha Awunga Joram chi Aramwui awunga Hazaelli ngararda Aramnaobingna ali sākaza̱ khamā raikhavai Jezreelli latunga.) Chieina Jehuna hānga, "Nathum nganaakha, khipākha keinungwui eina Jezreelli pao khuiung khavai malatshokranu." ¹⁶Jehuna awui siguigari tongda Jezreelli vai, chili Joram chipethai. Judahwui awunga Ahaziahna ali kongluikhavai tāhaowa. ¹⁷Jezreelwui dolanli anganinga raikān china Jehuwui khangaso mibing kharā chi thei tharan, ana vaoda hānga, "Ina mibing ashang akha thei." Joramna kasoda hānga, "Sigui katonga akha khuilu. Athumli samphang khavai ali chihovālu, kala ngahānmiranu, 'Chingri kahaila?'"

¹⁸Sigui katonga akhana Jehuli tongda vālaga hānga, "Awungana ngahānna, 'Ngalem leira?'" "Ngalem chi nawui vang khi tangra?" da Jehuna hānga. "Iwui khanukli rālu." Shantrina unghānga, "Paomena athumwuili vāshunghaira, kha mahanungmana."

¹⁹Awungana sigui katonga kakhane akha chihovāhaowa. Ana athumwuili vāshunglaga hānga, "Awungana ngahānna, ngalem leira?" Jehuna ngahānkai, "Ngalem chi nawui vang khi tangra? Iwui khanukli rālu."

²⁰Shantrina unghānga, "Ana athumwuili vāshunghaira, kha mahanungmana. Katongkhami chi Nimshiwui naomayara Jehuwui kathāna; ana kapā mi thāda tonga."

²¹"Iwui siguigari khangarān sālu," da Joramna kasoi. Siguigari khangarān sāhaikahai eina, Israelwui awunga Joram eina Judahwui awunga Ahaziah kachichā awui siguigarili Jehuli samphang khavai tongda shoka, kala Jezreelpa Nabothwui luili ali samphanga.

²²Joramna Jehuli akathei tharan ngahānna, "Ngalem leira, Jehu?" Ana ngahānkai, "Nava̱ Jezebelwui makhuila khamathang-khamarang kala khara̱kasang leichinglakha, khi ngalem leira?"

²³Joramna ngaranda yāmda Ahaziahli vaoda hānga, "Kakapik, Ahaziah!"

²⁴Jehuna awui yang saikora eina malā hunda Joramwui yartui angachaili kāpa. Malā china awui ningli kāpngarui uta, kala ana awui siguigarili pisanghaowa. ²⁵Jehuna awui otva̱ Bidkarli hānga, "Ali reokhuilaga Jezreelpa Nabothwui lui apamli horlu. Nana kala ina khanini awui avā Ahabwui khanukli tongda rāsai tharan ithumwui Avāna awuitungli khamarān hi sangmi kahai chi phaningunglu:

²⁶'Makahatlakla ina ayā Nabothwui ashee kala awui naomayarabingwui ashee thei,' da ithumwui Avāna hānga, 'kala ina hi apam khalattali nali tandi khamila.' Ara ithumwui Avāwui tui hāngkahai athishurda ali reokhuilaga apam chili horlu."

²⁷Judahwui awunga Ahaziahna hi akathei tharan Beth-haggan shongfashong yāmhaowa. Jehuna ali kharomvai, "Alila kāplu!" da kasoi. Ibleam nganaili Gur kāshongli athumna ali siguigarili kāpa, kha ana Megiddoli yāmshokta chili thihaowa. ²⁸Awui raobingna ali siguigarili Jerusalemli khuivā, kala Davidwui keinungli avā ngarāli ngasoda awui chikhurli chifahaowa. ²⁹(Ahabwui naomayara Joramwui khamung kum tharāda akhali, Ahaziahna Judahwui awunga sāhaowa.).

Avāwui Tui Jezebelwuitungli

³⁰Jehuna Jezreelli rāhaowa. Jezebelna chi kashā tharan awui mikli neolaga awui sam sāsangda charfa eina yangshoka. ³¹Jehuna khamong eina kazang tharan, ana ngahānna, "Ngalem leira, na Zimri, nawui akhavā shaokathatapā?" ^a a v31 Jezebelna Jehuli "Zimri" da hoda kakhayak sāmi—Zimri chiya awui awunga sāthatlaga Israelwui khamung tukkhui khavai raimi otva̱ akhana, chiwui thili zimiksho kaikha kāshung eina thihaowa; ana Jehuli katakahai kakapikpā akhana da khuina.

³²Ana charfashong yangkāda panglāk eina vaoda hānga, "Khipā ili ngasopamda? Khipā?" Ahongabing khani lah kathum china ali yangshoka.

³³"Ali chihohaolu!" da Jehuna hānga. Chieina athumna ali chihohaowa, kala athumna ali naikazam tharan awui ashee kaikha phākho kala siguibingtungli sirrorhaowa.

³⁴Jehuna zangda phāshak phāzai, chiwui thili hānga, "Hi khonkashi sha̱naopāva̱ chi yangmilu, kala ali chifalu; ana awungawui naongalāva̱ akhana."

³⁵Ali chifa khavai vālaga athumna akuira̱, aphei, kala apāngmayā maningla samphanga.

³⁶Athumna hanunglaga Jehuli hānga. Ana hānga, "Hi ithumwui Avāna awui rao Tishbewui Elijah shāda hāngkahai tuina: 'Jezreelwui lamli fana Jezebelwui asā shaira. ³⁷Jezebelwui asakva̱ Jezreelwui ronli lengruk khipāna alunghaora, chieina "Hi Jezebelna" da khipānakha hānglai matheimira.'"