2 Wungnaobing 8

8 ¹Elishana awui naomayarali ringshok ngasak kahai sha̱nao chili hānga, "Na kala nawui shimkhur ngakarthuida zatlu, kala nana pamshapa apam kachida pamsālu, kaja ithumwui Avāna zāt kasak rākhangasak kahaina; china ngaleili zingkum shini rāra."

²Sha̱nao china ngakarthuida ithumwui Avāwui mipā china kahāng athishurda sai, kala ana kala awui shimkhur Philistine ngaleili zingkum shini pam khavai zata. ³Zingkum shini kākashung eina sha̱nao chi Philistine ngaleiwui eina latunga, kala awui shim kala ngaleiwui vang awungali nganingmi khavai vai. ⁴Awungana ithumwui Avāwui mipāwui rao Gehazili ngazekta hānga, "Elishana sākahai matakhak kahai otsak saikora ili hāngmilu." ⁵Gehazina Elishana kathi mili ringshok ngasak kaji awungali unghāngmamānlakha, awui naomayarali ana ringshok ngasak kahai sha̱nao chi awui shim kala luiwui vang awungali chapta rai. Gehazina hānga, "O iwui awunga, sha̱nao chiya hina, kala Elishana ringshok ngasak kahai awui naomayarala hina."

⁶Awungana sha̱nao chili ngahāna, kala ana meisā eina hānga. Chieina awungana awui vang otva̱ akha azangda hānga, "Awui ot saikora, kala ana ngalei chizat kahai thangwui eina ara eina tangda luiwui samkaphang saikorala hanmiluishitlu."

Avāna Hazaelwui Mungphok Chitheimi

⁷Elishana Damascusli vai. Aramwui awunga Ben-hadad kazāhaoda leilakha, ali hānga, "Varewui mipā hili rāhaira."

⁸Awungana Hazaelli hānga, "Lemmet akha khuilu, kala Varewui mipāli samphang khavai vālu, kala kakazā hi eina I raihaora? da awui eina PROHO Vareli ngahānlu."

⁹Damascuswui kaphā ot saikorawui lemmet, ut hangmatiwui phungzat khuilaga, Hazaelna ali samphang khavai vai. Ana Elishawui mangāli anganingda hānga, "Aramwui awunga nawui naomayara Ben-hadadna, 'Kakazā hi eina I raihaora?' da ngahān khavai ili chihovā."

¹⁰Elishana hānga, "Vāda ali hānglu, 'Na raikachangra,' kha ithumwui Avāna ana thikachangra da ili chithei." ¹¹Ana amik ngatartei hailaga, Hazael khayak eina tangda yangpama. Chieina ithumwui Avāwui mipā chapa.

¹²Hazaelna ngahāna, "Khisāda iwui akhavā chapkhala?" Ana ngahānkai, "Kaja Israelnaobingli nana sāra kaji sākashi chi ina thei jira: athumwui raipan mei eina thotra, athumwui yaronnaobingli raighai eina shaothatra, athumwui angangnaobingli ngaleili shāttāra, kala athumwui nao vākasā sha̱naobingli yongrorra."

¹³Hazaelna ngahānkai, "Nawui rao, fa akha mashichinla hi, khisāda matakhak kahai kachungkha hi sārakhala?" Elishana ngahānkai, "Ithumwui Avāna na Aramwuitungli awunga sāra da ili chithei."

¹⁴Hazaelna Elishawui eina zatlaga awui akhavāli latunga, kala ana ngahāna, "Elishana khi hāngkhala?" Ana ngahānkai, "Na raikachangra da ili hānga."

¹⁵Akhama kathā, Hazaelna kachon kashā chi khuilaga tara̱li rurlaga awungawui mai kuirunda faror sai, kala ana thihaowa. Chieina Hazaelna awui mahut thuishina.

Jehoramna Judahli Munga

¹⁶Israelwui awunga Ahabwui nao Joramna mungda kaphangā kum, Jehoshaphatna Judahwui awunga sālakha, Jehoshaphatwui nao Jehoramna Judahwui awunga mungphoka. ¹⁷Ana awunga sākaphok tharan zingkum thumrāda khani kāshunghairasai, kala Jerusalemli zingkum chishat munga. ¹⁸Ana Israelwui awungabingwui apongli shurzatta, Ahabwui shimkhurna kasā thāda sai, kaja ana Ahabwui naongalāva̱li ngakumhaowa. Kala ana ithumwui Avāwui mangāli makhayā otmāng sai. ¹⁹Chithālala awui rao Davidwui vang ithumwui Avāna Judahli sāshimān masākhangaimana; kaja ana Davidli kala awui naomayarabingli mashimānla thaomei akha khami khavai ngashit kahaina.

²⁰Awui thotli Edompashina Judahli thuingarara, kala athum khalattawui awunga phākhuihaowa. ²¹Chieina Joramna awui siguigari saikorali ngasoda Zairshong kānkā, kala ngayā ngakarthuida a eina ali kuikhanama Edompashili kala siguigari kathānabingli sāthatserhaowa; kha raimibingna kachichāwui kachonshimli yāmhaowa. ²²Edombingna aja eina tangda Judahli ngararchinga. Atam chichangli Libnahshinala thuingarara. ²³Joramwui kasā khavā, ana kasāsā saikora, Judah Awungabingwui Thotrinchān Lairikli makapiserhaimala? ²⁴Joram thikahai eina avāva̱ ngarāli ngasoda Davidwui keinungli chifahaowa; kala anaomayara Ahaziahna awui mahut thuishina.

Ahaziahna Judahli Munga

²⁵Israelwui awunga Ahabwui nao Joramna mungda tharāda kakhane kum, Judahwui awunga Jehoramwui nao Ahaziahna mungphoka. ²⁶Ahaziahna mungkaphok tharan a zingkum maga̱da khani kāhairasai, kala Jerusalemli zingkum akha munga. Ava̱va̱li Athaliah hoi, Israelwui awunga Omriwui ara̱va̱na. ²⁷Ana Ahabwui shimkhurwui apongli zata, kala Ahabwui shimkhurna kasā thāda ithumwui Avāwui mangāli makhayā otmāng sai; kaja ana Ahabwui shimkhurwui naongalāva̱li ngakumhaowa.

²⁸Ana Ahabwui nao Joramli ngasoda, Aramwui awunga Hazaelli rai sāda Ramoth-gileadli vai. Chili Aramnaobingna Joramli khamā zamihaowa. ²⁹Awunga Joramna Aramwui awunga Hazaelli khangarar tharan Aramnaobingna Ramahli sākaza̱ khamā chi ngahā khavai Jezreelli latunga. Judahwui awunga Jehoramwui nao Ahaziahna Jezreelli khamā za̱kahai Ahabwui nao Joramli angahān khavai tunga.