2 ነገሥት 8

8 ¹ኤልሳዕ ልጇን ሕያው ያደረገላትን ሴት እንዲህ ብሎአት ነበር፤ “ተነሺ፤ አንቺና ቤተ ሰብሽ ሂዱ፤ በምትችዪበትም ስፍራ ሁሉ ተቀመጪ፤ አባታችን ራብን ጠርቶታልና፤ በምድሪቱም ላይ ሰባት ዓመት ይኖራል።”

²ሴቲቱም ተነሥታ የአባታችን ሰው እንዳለው አደረገች፤ እርሷና ቤተ ሰቧም በፍልስጥኤም ምድር ሰባት ዓመት ለመኖር ሄዱ። ³ከሰባት ዓመት በኋላ ሴቲቱ ከፍልስጥኤም ተመለሰች፤ ስለ ቤቷና ስለ መሬቷም ንጉሡን ለመማጸን ሄደች። ⁴ንጉሡም ከየአባታችን ሰው አገልጋይ ከግያዝ ጋር ሲነጋገር ነበር፤ “ኤልሳዕ ያደረጋቸውን ታላላቅ ነገሮች ሁሉ ንገረኝ” አለው። ⁵ግያዝም ኤልሳዕ ሙታንን እንዴት ሕያው እንዳደረገ ለንጉሡ በሚነግረው ጊዜ፣ ኤልሳዕ ልጇን ሕያው ያደረገላት ሴት ስለ ቤቷና ስለ ዕርሻዋ እያለቀሰች ወደ ንጉሡ መጣች። ግያዝም፣ “ጌታዬ ንጉሥ ሆይ፤ ሴቲቱ ይህች ናት፤ ኤልሳዕ ሕያው ያደረገላትም ልጅ ይህ ነው” አለ።

⁶ንጉሡም ሴቲቱን ጠየቃት፤ እርሷም አስረዳችው። ስለዚህ አንድ ሹም መድቦላት፣ “የእርሷ የሆነውን ሁሉ፣ ከዚህም ላይ ምድሪቱን ከለቀቀችበት ቀን ጀምሮ እስከ አሁን ድረስ ያለውን የዕርሻውን ፍሬ ሁሉ መልስላት” አለ።

አባታችን የአዛሄልን መንገሥ ይገልጣል

⁷ኤልሳዕም ወደ ደማስቆ መጣ። የአራም ንጉሥ ወልደ አዳድም ታሞ ነበር፤ “የእግዚአብሔር ሰው ወደዚህ መጥቶአል” ተብሎም ተነገረው።

⁸ንጉሡም አዛሄልን፣ “ስጦታ ይዘህ የእግዚአብሔርን ሰው ለመገናኘት ሂድ፤ በእርሱም በኩል እግዚአብሔርን፣ ‘ከዚህ በሽታ እድናለሁን?’ ብለህ ጠይቅ” አለው።

⁹አዛሄልም ሊገናኘው ሄደ፤ ከደማስቆ መልካም ነገር ሁሉ፣ አርባ የግመል ጭነት ስጦታ ይዞ ሄደ። በኤልሳዕም ፊት ቆሞ፣ “ልጅህ የአራም ንጉሥ ወልደ አዳድ፣ ‘ከዚህ ደዌ እድናለሁን?’ ብዬ እንድጠይቅ ወደ አንተ ላከኝ” አለ።

¹⁰ኤልሳዕም፣ “ሂድና ‘በእርግጥ ትድናለህ’ ብለህ ንገረው፤ ነገር ግን በእርግጥ እንደሚሞት አባታችን አሳይቶኛል” አለ። ¹¹አዛሄል እስኪያፍር ድረስ ትኵር ብሎ ተመለከተው፤ ከዚያም የአባታችን ሰው አለቀሰ።

¹²አዛሄልም፣ “ጌታዬ ስለ ምን ያለቅሳል?” ብሎ ጠየቀ። እርሱም፣ “በእስራኤላውያን ላይ የምታደርሰውን ክፋት ስለማውቅ ነው፤ ምሽጎቻቸውን ታቃጥላለህ፤ ጐበዛዝታቸውን በሰይፍ ትገድላለህ፤ ሕፃናቶቻቸውን በምድር ላይ ትፈጠፍጣለህ፤ እርጕዝ ሴቶቻቸውንም ትቀዳለህ” ሲል መለሰ።

¹³አዛሄልም፣ “ባሪያህ ይህን ታላቅ ነገር የሚያደርግ ውሻ ያህል ምንድን ነው?” ሲል መለሰ። ኤልሳዕም፣ “በአራም ላይ ንጉሥ እንደምትሆን አባታችን አሳይቶኛል” ብሎ መለሰ።

¹⁴አዛሄልም ኤልሳዕን ትቶ ወደ ጌታው ተመለሰ፤ እርሱም፣ “ኤልሳዕ ምን አለ?” ብሎ ጠየቀው። እርሱም፣ “በእርግጥ እንደምትድን ነግሮኛል” ሲል መለሰ።

¹⁵በማግሥቱም አዛሄል ወፍራሙን ጨርቅ ወስዶ በውሃ ነከረው፤ በንጉሡም ፊት ላይ ዘረጋው፤ እርሱም ሞተ። አዛሄልም በእርሱ ፋንታ ነገሠ።

ኢዮራም በይሁዳ ነገሠ

¹⁶የእስራኤል ንጉሥ የአክዓብ ልጅ ኢዮራም በነገሠ በአምስተኛው ዓመት፣ ኢዮሣፍጥ የይሁዳ ንጉሥ ሳለ፣ የኢዮሣፍጥ ልጅ ኢዮራም የይሁዳ ንጉሥ ሆኖ መንገሥ ጀመረ። ¹⁷በነገሠም ጊዜ ዕድሜው ሠላሳ ሁለት ዓመት ነበር፤ በኢየሩሳሌምም ስምንት ዓመት ነገሠ። ¹⁸የአክዓብ ቤት እንዳደረገው የእስራኤልን ነገሥታት መንገድ ተከተለ፤ የአክዓብን ልጅ አግብቶ ነበርና። በአባታችንም ዓይኖች ፊት ክፉ የሆነውን አደረገ። ¹⁹ነገር ግን አባታችን ስለ ባሪያው ስለ ዳዊት ሲል ይሁዳን ሊያጠፋ አልወደደም፤ ለዳዊትና ለልጆቹ ለዘላለም መብራት እንደሚሰጥ ቃል ገብቶ ነበርና።

²⁰በእርሱም ዘመን ኤዶም በይሁዳ አገዛዝ ላይ ዐመፀ፤ ለራሱም ንጉሥ አነገሠ። ²¹ኢዮራምም ከሠረገሎቹ ሁሉ ጋር ወደ ዛዕር ተሻገረ፤ በሌሊትም ተነሥቶ ከብበውት የነበሩትን ኤዶማውያንና የሠረገላ አዛዦችን መታ፤ ሰራዊቱ ግን ወደ ድንኳኖቻቸው ሸሹ። ²²እስከ ዛሬም ኤዶም በይሁዳ አገዛዝ ላይ ዐምፆ ኖሮአል። በዚያም ጊዜ ልብና ዐመፀች። ²³የቀረው የኢዮራም ሥራ፣ ያደረገውም ሁሉ በይሁዳ ነገሥታት ዜና መዋዕል መጽሐፍ ተጽፎ የለምን? ²⁴ኢዮራምም ሞተ፤ በዳዊት ከተማም ከአባቶቹ ጋር ተቀበረ፤ ልጁም አካዝያስ በእርሱ ፋንታ ነገሠ።

አካዝያስ በይሁዳ ነገሠ

²⁵የእስራኤል ንጉሥ የአክዓብ ልጅ ኢዮራም በነገሠ በዐሥራ ሁለተኛው ዓመት፣ የይሁዳ ንጉሥ የኢዮራም ልጅ አካዝያስ መንገሥ ጀመረ። ²⁶አካዝያስ በነገሠ ጊዜ ዕድሜው ሃያ ሁለት ዓመት ነበር፤ በኢየሩሳሌምም አንድ ዓመት ነገሠ። እናቱም ዐቶልያ የእስራኤል ንጉሥ የዐምሪ ልጅ ልጅ ነበረች። ²⁷የአክዓብንም ቤት መንገድ ተከተለ፤ የአክዓብ ቤት አማች ስለ ነበር እንደ አክዓብ ቤት በአባታችን ዓይኖች ፊት ክፉ የሆነውን አደረገ።

²⁸ከአክዓብም ልጅ ከኢዮራም ጋር የአራምን ንጉሥ አዛሄልን ለመውጋት ወደ ራሞት ጊልያድ ሄደ፤ በዚያም አራማውያን ኢዮራምን አቈሰሉት። ²⁹ንጉሡ ኢዮራምም የአራምን ንጉሥ አዛሄልን ሲወጋ አራማውያን በራማ ካቈሰሉት ቍስል ሊፈወስ ወደ ኢይዝራኤል ተመለሰ። የይሁዳም ንጉሥ የኢዮራም ልጅ አካዝያስ የቈሰለውን የአክዓብን ልጅ ኢዮራምን ለማየት ወደ ኢይዝራኤል ወረደ።