2 Wafalme 8

8 ¹Elisha alikuwa amemwambia yule mwanamke ambaye alimfufua mwanawe, "Ondoka, uende, wewe na nyumba yako yote, ukakae mahali popote uwezapo, kwa maana Baba yetu ameita njaa, nayo itakuja juu ya nchi miaka saba."

²Yule mwanamke akaondoka, akafanya kama alivyosema mtu wa Baba yetu, akaenda, yeye na nyumba yake, kukaa katika nchi ya Wafilisti miaka saba. ³Baada ya miaka saba yule mwanamke akarudi kutoka nchi ya Wafilisti, akaenda kumsihi mfalme kwa ajili ya nyumba yake na nchi yake. ⁴Mfalme alikuwa akizungumza na Gehazi, mtumishi wa mtu wa Baba yetu, akisema, "Niambie mambo yote makuu aliyoyafanya Elisha." ⁵Basi Gehazi alipokuwa akimwambia mfalme jinsi Elisha alivyomfufua mfu, tazama, yule mwanamke ambaye mwanawe alifufuliwa akaja akimlilia mfalme kwa ajili ya nyumba yake na shamba lake. Gehazi akasema, "Bwana wangu mfalme, huyu ndiye yule mwanamke, na huyu ndiye mwanawe ambaye Elisha alimfufua."

⁶Mfalme akamwuliza yule mwanamke, naye akamweleza. Basi akampa afisa mmoja, akisema, "Mrudishie kila kitu chake, pamoja na mazao yote ya shamba tangu siku aliyoiacha nchi hata sasa."

Baba Afunua Kuinuka kwa Hazaeli

⁷Elisha akaenda Dameski. Ben-hadadi mfalme wa Aramu alikuwa mgonjwa; naye akaambiwa, "Mtu wa Mungu amefika hapa."

⁸Mfalme akamwambia Hazaeli, "Chukua zawadi mkononi mwako, uende kumlaki mtu wa Mungu, ukamwulize BWANA kwa kupitia kwake, kusema: Je, nitapona ugonjwa huu?"

⁹Hazaeli akaenda kumlaki, akichukua zawadi ya vitu vyote vizuri vya Dameski, mizigo ya ngamia arobaini. Akaja akasimama mbele ya Elisha, akasema, "Mwanao Ben-hadadi mfalme wa Aramu amenituma kwako, kuuliza, 'Je, nitapona ugonjwa huu?'"

¹⁰Elisha akamwambia, "Nenda, umwambie, 'Hakika utapona,' lakini Baba yetu amenionyesha ya kuwa hakika atakufa." ¹¹Naye akamkazia macho hata Hazaeli akaona haya. Ndipo mtu wa Baba yetu akalia.

¹²Hazaeli akauliza, "Kwa nini bwana wangu analia?" Akajibu, "Kwa sababu ninajua mabaya utakayowatendea wana wa Israeli: utaziteketeza ngome zao kwa moto, na vijana wao utawaua kwa upanga, na watoto wao wachanga utawaponda, na wanawake wao wenye mimba utawapasua."

¹³Hazaeli akajibu, "Mtumishi wako ni nini, ila mbwa tu, hata afanye jambo hili kubwa?" Elisha akajibu, "Baba yetu amenionyesha ya kuwa utakuwa mfalme juu ya Aramu."

¹⁴Hazaeli akaondoka kwa Elisha, akarudi kwa bwana wake, aliyemwuliza, "Elisha alikuambia nini?" Akajibu, "Aliniambia ya kuwa hakika utapona."

¹⁵Siku ya pili yake, Hazaeli akachukua nguo nene, akaichovya majini, akaitandaza juu ya uso wa mfalme, hata akafa. Naye Hazaeli akatawala mahali pake.

Yehoramu Atawala Yuda

¹⁶Katika mwaka wa tano wa Yoramu mwana wa Ahabu, mfalme wa Israeli, Yehoshafati alipokuwa mfalme wa Yuda, Yehoramu mwana wa Yehoshafati akaanza kutawala akiwa mfalme wa Yuda. ¹⁷Alikuwa na umri wa miaka thelathini na miwili alipoanza kutawala; akatawala miaka minane huko Yerusalemu. ¹⁸Akaenda katika njia za wafalme wa Israeli, kama nyumba ya Ahabu ilivyofanya, kwa maana alikuwa amemwoa binti Ahabu. Naye akafanya yaliyo maovu machoni pa Baba yetu. ¹⁹Lakini Baba yetu hakutaka kuiangamiza Yuda, kwa ajili ya Daudi mtumishi wake, kama alivyoahidi kumpa Daudi taa kwa ajili yake na wanawe milele.

²⁰Siku zake Edomu wakaasi wasitawaliwe na Yuda, wakajiwekea mfalme wao wenyewe. ²¹Basi Yoramu akavuka kwenda Sairi pamoja na magari yake yote ya vita; akaondoka usiku, akawapiga Waedomu waliomzunguka, na majemadari wa magari ya vita; nao watu wakakimbilia hema zao. ²²Hata leo Edomu wameasi wasitawaliwe na Yuda. Wakati huo huo Libna nayo ikaasi. ²³Basi mambo yote yaliyosalia ya Yoramu, na yote aliyoyafanya, je, hayakuandikwa katika kitabu cha tarehe za wafalme wa Yuda? ²⁴Yoramu akalala na baba zake, akazikwa pamoja na baba zake katika mji wa Daudi; na Ahazia mwanawe akatawala mahali pake.

Ahazia Atawala Yuda

²⁵Katika mwaka wa kumi na mbili wa Yoramu mwana wa Ahabu, mfalme wa Israeli, Ahazia mwana wa Yehoramu mfalme wa Yuda akaanza kutawala. ²⁶Ahazia alikuwa na umri wa miaka ishirini na miwili alipoanza kutawala; akatawala mwaka mmoja huko Yerusalemu. Na jina la mamaye aliitwa Athalia, mjukuu wa Omri mfalme wa Israeli. ²⁷Akaenda katika njia ya nyumba ya Ahabu, akafanya yaliyo maovu machoni pa Baba yetu kama nyumba ya Ahabu, kwa maana alikuwa mkwe wa nyumba ya Ahabu.

²⁸Akaenda pamoja na Yoramu mwana wa Ahabu kupigana na Hazaeli mfalme wa Aramu huko Ramoth-gileadi; nao Waaramu wakamjeruhi Yoramu. ²⁹Mfalme Yoramu akarudi Yezreeli ili apone jeraha alizotiwa na Waaramu huko Rama, alipopigana na Hazaeli mfalme wa Aramu. Naye Ahazia mwana wa Yehoramu, mfalme wa Yuda, akashuka aende kumtazama Yoramu mwana wa Ahabu aliyekuwa amejeruhiwa huko Yezreeli.