2 ነገሥት 10

10 ¹አክዓብ በሰማርያ ሰባ ወንዶች ልጆች ነበሩት። ኢዩም ወደ ሰማርያ፣ ለከተማዪቱ ሹማምት፣ ለሽማግሌዎችና ለአክዓብ ልጆች ሞግዚቶች እንዲህ ሲል ደብዳቤ ላከ፦ ²“ይህ ደብዳቤ በደረሳችሁ ጊዜ፣ የጌታችሁ ልጆች ከእናንተ ጋር ስለሆኑ፣ ደግሞም ሰረገሎች፣ ፈረሶች፣ የተመሸገች ከተማና የጦር መሣሪያ ስላሉአችሁ፣ ³ከጌታችሁ ልጆች መካከል የተሻለውንና የሚበቃውን መርጣችሁ በአባቱ ዙፋን ላይ አስቀምጡት፤ ስለ ጌታችሁም ቤት ተዋጉ።”

⁴እነርሱ ግን እጅግ ፈሩ፤ እጅግም ተደናገጡ፤ እንዲህም አሉ፦ “እነሆ፣ ሁለት ነገሥታት በፊቱ ሊቆሙ አልቻሉም፤ እኛስ እንዴት መቆም እንችላለን?” ⁵የቤተ መንግሥቱ አዛዥ፣ የከተማዪቱ ገዥ፣ ሽማግሌዎቹና ሞግዚቶቹ ወደ ኢዩ እንዲህ ብለው ላኩ፦ “እኛ ባሪያዎችህ ነን፤ የምትለንንም ሁሉ እናደርጋለን። ማንንም አናነግሥም፤ በፊትህ መልካም የሆነውን አድርግ።”

⁶ኢዩም ዳግመኛ ደብዳቤ እንዲህ ሲል ጻፈላቸው፦ “ከእኔ ጋር ብትሆኑና ለእኔ ብትታዘዙ፣ የጌታችሁን ልጆች ራሶች ይዛችሁ ነገ በዚህ ሰዓት ወደ እኔ ወደ ይዝራኤል ኑ።” የንጉሡም ሰባ ልጆች ከሚያሳድጉአቸው ከከተማዪቱ መኳንንት ጋር ነበሩ።

⁷ደብዳቤውም በደረሰ ጊዜ፣ የንጉሡን ልጆች ይዘው ሰባውን አረዱአቸው፤ ራሶቻቸውንም በቅርጫቶች ውስጥ አኑረው ወደ ኢዩ ወደ ይዝራኤል ላኩ። ⁸መልእክተኛውም መጥቶ፣ “የንጉሡን ልጆች ራሶች አምጥተዋል” ብሎ ነገረው። እርሱም፣ “እስከ ማለዳ ድረስ በበሩ መግቢያ ላይ ሁለት ክምር አድርጋችሁ አኑሩአቸው” አለ።

⁹በማለዳም ወጥቶ በሕዝቡ ሁሉ ፊት ቆመ፤ እንዲህም አለ፦ “እናንተ ንጹሓን ናችሁ። እነሆ፣ እኔ በጌታዬ ላይ አሢሬ ገደልሁት፤ እነዚህን ሁሉ ግን የመታ ማን ነው? ¹⁰እንግዲህ በአክዓብ ቤት ላይ ከተናገረው ከአባታችን ቃል አንዳች ወደ ምድር እንደማይወድቅ እወቁ። አባታችን በባሪያው በኤልያስ በኩል የተናገረውን አድርጓል።”

¹¹ስለዚህ ኢዩ በይዝራኤል የቀሩትን የአክዓብን ቤት ሰዎች ሁሉ፣ መኳንንቱን፣ የቅርብ ወዳጆቹንና ካህናቱን ገደለ፤ አንድም የተረፈ አላስቀረለትም።

¹²ከዚያም ተነሥቶ ወደ ሰማርያ ሄደ። በመንገድም ላይ በእረኞች ቤትዔቄድ ሳለ፣ ¹³ኢዩ የይሁዳ ንጉሥ የአካዝያን ዘመዶች አገኘ፤ “እናንተ እነማን ናችሁ?” ብሎም ጠየቀ። እነርሱም፣ “እኛ የአካዝያ ዘመዶች ነን፤ የንጉሡንና የእቴጌይቱን ቤተ ሰዎች ሰላም ለማለት እየወረድን ነው” ብለው መለሱ።

¹⁴“በሕይወታቸው ያዙአቸው!” አለ። በሕይወታቸውም ያዙአቸው፤ ከዚያም በቤትዔቄድ ጕድጓድ አጠገብ አረዱአቸው፤ አርባ ሁለት ሰዎች ነበሩ፤ አንድም አልቀረም።

¹⁵ከዚያም ተነሥቶ ሄደ፤ ወደ እርሱ የሚመጣውን የሬካብ ልጅ ዮናዳብን አገኘው። ኢዩም ሰላም ብሎት፣ “ልቤ ከአንተ ልብ ጋር ቅን እንደሆነ፣ ልብህ ከልቤ ጋር ቅን ነውን?” ብሎ ጠየቀው። ዮናዳብም፣ “ቅን ነው” አለ። ኢዩም፣ “እንደዚያ ከሆነ፣ እጅህን ስጠኝ” አለ። እጁንም ሰጠው፤ ኢዩም ወደ ሰረገላው ሳበው።

¹⁶“ከእኔ ጋር ና፤ ለአባታችን ያለኝን ቅንዐት እይ” አለው። ስለዚህ በሰረገላው እንዲጋልብ አደረገው። ¹⁷ወደ ሰማርያም በደረሰ ጊዜ፣ ኢዩ በዚያ የቀሩትን የአክዓብን ሰዎች ሁሉ ገደለ፤ አባታችን ለኤልያስ እንደ ተናገረው አጠፋቸው።

ኢዩ የበኣልን አምልኮ አጠፋ

¹⁸ኢዩም ሕዝቡን ሁሉ ሰብስቦ እንዲህ አለ፦ “አክዓብ በኣልን ጥቂት አገለገለው፤ ኢዩ ግን እጅግ ያገለግለዋል። ¹⁹አሁንም የበኣልን ነቢያት ሁሉ፣ አምላኪዎቹን ሁሉ፣ ካህናቱንም ሁሉ ወደ እኔ ጥሩልኝ፤ አንድም አይቅር፤ ለበኣል የማቀርበው ታላቅ መሥዋዕት አለኝና፤ የሚቀር ሁሉ በሕይወት አይኖርም።” ኢዩ ግን የበኣልን አምላኪዎች ለማጥፋት በተንኰል አደረገው።

²⁰ኢዩም፣ “ለበኣል የተቀደሰ ጉባኤ ዐውጁ” ብሎ አዘዘ። እነርሱም ዐወጁ።

²¹ኢዩም በእስራኤል ሁሉ መልእክት ላከ፤ የበኣልም አምላኪዎች ሁሉ መጡ፤ ያልመጣም አልቀረም። ወደ በኣል ቤትም ገቡ፤ ከዳር እስከ ዳርም ሞሉት። ²²ኢዩም ልብስ ጠባቂውን፣ “ለበኣል አምላኪዎች ሁሉ ልብሶች አውጣላቸው” አለው። እርሱም አወጣላቸው።

²³ኢዩና የሬካብ ልጅ ዮናዳብ ወደ በኣል ቤተ መቅደስ ገቡ። ኢዩም የበኣልን አምላኪዎች፣ “በጥንቃቄ ፈልጉ፤ ከእናንተ ጋር ከበኣል አምላኪዎች በቀር የአባታችን ባሪያዎች አንድም እንዳይገኝ አረጋግጡ” አላቸው።

²⁴መሥዋዕቶችንና የሚቃጠሉ መባዎችን ለማቅረብ ገቡ። ኢዩ ግን ሰማንያ ሰዎችን ከውጭ አቁሞ፣ “በእጃችሁ ከማስገባቸው ሰዎች አንዱን ያመለጠ ማንም ቢኖር፣ ሕይወቱ በእርሱ ሕይወት ፋንታ ይሆናል” ብሎ አስጠነቀቃቸው።

²⁵የሚቃጠለውም መባ ባለቀ ጊዜ፣ ኢዩ ዘበኞቹንና መኳንንቱን፣ “ግቡና ግደሉአቸው፤ አንድም አይውጣ” አላቸው። በሰይፍም መቷቸው፤ ዘበኞቹና መኳንንቱም ወደ ውጭ ጣሉአቸው፤ ወደ በኣል ቤተ መቅደስ ውስጠኛ ክፍልም ገቡ። ²⁶ከበኣልም ቤተ መቅደስ የተቀደሱትን ዐምዶች አውጥተው አቃጠሉአቸው። ²⁷የበኣልንም የተቀደሰ ዐምድ አፈረሱ፤ የበኣልንም ቤተ መቅደስ አፈረሱ፤ እስከ ዛሬም ድረስ መጸዳጃ አደረጉት።

²⁸ስለዚህ ኢዩ የበኣልን አምልኮ ከእስራኤል አጠፋ። ²⁹ይሁን እንጂ ኢዩ እስራኤልን ያስኀጠአበትን፣ በቤቴልና በዳን የነበሩትን የወርቅ ጥጆች፣ ማለትም የናባጥ ልጅ የኢዮርብዓምን ኀጢአት ከመከተል ፈቀቅ አላለም።

³⁰አባታችንም ኢዩን፣ “በፊቴ መልካም የሆነውን በማድረግ መልካም ስለ ሠራህ፣ በአክዓብም ቤት ላይ ያሰብሁትን ሁሉ ስላደረግህ፣ ዘሮችህ እስከ አራተኛው ትውልድ ድረስ በእስራኤል ዙፋን ላይ ይቀመጣሉ” አለው።

³¹ኢዩ ግን የእስራኤልን አምላክ የአባታችንን ሕግ በፍጹም ልቡ በጥንቃቄ ለመከተል አልተጋም። እስራኤልን ያስኀጠአውን የኢዮርብዓምን ኀጢአት ከመከተል ፈቀቅ አላለም።

³²በዚያም ዘመን አባታችን እስራኤልን መቀነስ ጀመረ። አዛሄልም በእስራኤል ግዛት ሁሉ መታቸው፤ ³³ከዮርዳኖስ በስተ ምሥራቅ፣ የገለዓድን ምድር ሁሉ፣ የጋድን፣ የሮቤልንና የምናሴን አገር፣ በአርኖን ሸለቆ አጠገብ ካለው ከአሮዔር ጀምሮ፣ በገለዓድና በባሳን በኩል መታ።

³⁴የቀረው የኢዩ ሥራ፣ ያደረገው ሁሉና ኀይሉ ሁሉ በእስራኤል ነገሥታት ዜና መዋዕል መጽሐፍ ተጽፎ የለምን? ³⁵ኢዩም ከአባቶቹ ጋር አንቀላፋ፤ በሰማርያም ተቀበረ፤ ልጁም ኢዮአካዝ በእርሱ ፋንታ ነገሠ። ³⁶ኢዩም በሰማርያ በእስራኤል ላይ የነገሠበት ዘመን ሃያ ስምንት ዓመት ነበር።