2 இராஜாக்கள் 10

10 ¹சமாரியாவிலே ஆகாபுக்கு எழுபது குமாரர் இருந்தார்கள். யெகூ சமாரியாவிலிருக்கிற நகர அதிகாரிகளுக்கும், மூப்பர்களுக்கும், ஆகாபின் குமாரரை வளர்க்கிற பாதுகாவலர்களுக்கும் நிருபங்களை எழுதி அனுப்பினான்; அதில்: ²“இந்த நிருபம் உங்களிடம் வந்து சேரும்போது, உங்கள் எஜமானுடைய குமாரரும், இரதங்களும், குதிரைகளும், அரணான நகரமும், ஆயுதங்களும் உங்களோடு இருக்கிறபடியால், ³உங்கள் எஜமானுடைய குமாரரில் நல்லவனும் தகுதியுள்ளவனுமாகிய ஒருவனைத் தெரிந்துகொண்டு, அவனை அவனுடைய தகப்பனுடைய சிங்காசனத்தில் வைத்து, உங்கள் எஜமானுடைய குடும்பத்துக்காகப் போராடுங்கள்” என்று எழுதினான்.

⁴அவர்கள் மிகவும் திகிலடைந்து, முற்றிலும் நடுங்கி, “இதோ, இரண்டு ராஜாக்கள் அவனுக்கு முன்பாக நிற்கமுடியவில்லையே; நாம் எப்படி நிற்போம்?” என்றார்கள். ⁵அரண்மனை விசாரிப்புக்காரனும், நகராதிபதியும், மூப்பர்களும், பாதுகாவலர்களும் யெகூவுக்குச் சொல்லியனுப்பினதாவது: “நாங்கள் உம்முடைய ஊழியக்காரர்; நீர் சொல்வதையெல்லாம் செய்வோம்; நாங்கள் ஒருவனையும் ராஜாவாக்கமாட்டோம்; உம்முடைய பார்வைக்கு நலமானதைச் செய்யும்.”

⁶அப்பொழுது யெகூ அவர்களுக்கு இரண்டாம் நிருபமாக: “நீங்கள் என் பட்சத்திலிருந்து எனக்குக் கீழ்ப்படிவீர்களானால், உங்கள் எஜமானுடைய குமாரரின் தலைகளை எடுத்துக்கொண்டு, நாளை இந்நேரத்தில் யெஸ்ரயேலிலிருக்கிற என்னிடத்தில் வாருங்கள்” என்று எழுதினான். ராஜாவின் எழுபது குமாரரும் அவர்களை வளர்த்துவந்த நகரத்துப் பிரபுக்களோடு இருந்தார்கள்.

⁷அந்த நிருபம் அவர்களிடம் வந்தபோது, அவர்கள் ராஜாவின் குமாரரைப் பிடித்து, எழுபதுபேரையும் வெட்டி, அவர்களுடைய தலைகளைக் கூடைகளில் வைத்து, யெஸ்ரயேலிலிருந்த யெகூவுக்கு அனுப்பினார்கள். ⁸அப்பொழுது ஸ்தானாபதி வந்து, “ராஜாவின் குமாரரின் தலைகளைக் கொண்டுவந்தார்கள்” என்று அவனுக்கு அறிவித்தான். அதற்கு அவன், “அவைகளை நகர வாசலின் நடையில் விடியற்காலம்வரை இரண்டு குவியலாகக் குவித்துவையுங்கள்” என்றான்.

⁹விடியற்காலத்தில் அவன் புறப்பட்டுப்போய், சகல ஜனங்களுக்கும் முன்பாக நின்று சொன்னதாவது: “நீங்கள் குற்றமற்றவர்கள்; இதோ, நான் என் எஜமானுக்கு விரோதமாய்க் கட்டுப்பாடுசெய்து அவனைக் கொன்றேன்; ஆனால் இவர்கள் அனைவரையும் வெட்டினவர் யார்? ¹⁰ஆகையால், ஆகாபின் குடும்பத்துக்கு விரோதமாக எங்கள் பிதா சொன்ன வார்த்தைகளில் ஒன்றும் தரையிலே விழாது என்று அறியுங்கள்; எங்கள் பிதா தம்முடைய ஊழியக்காரனாகிய எலியாவின் மூலமாய்ச் சொன்னதைச் செய்தார்.”

¹¹அப்படியே யெகூ யெஸ்ரயேலிலே ஆகாபின் குடும்பத்தில் மீதியாயிருந்த அனைவரையும், அவனுடைய பிரபுக்களையும், நெருங்கிய நண்பர்களையும், ஆசாரியர்களையும் ஒருவரையும் மீதியாக விடாமல் கொன்றுபோட்டான்.

¹²பின்பு அவன் எழுந்து புறப்பட்டு, சமாரியாவுக்குப் போனான். வழியிலே மேய்ப்பர்களுடைய பெத்-எக்கேத் என்னும் இடத்தில், ¹³யெகூ யூதாவின் ராஜாவாகிய அகசியாவின் உறவினர்களைச் சந்தித்து, “நீங்கள் யார்?” என்று கேட்டான். அதற்கு அவர்கள், “நாங்கள் அகசியாவின் உறவினர்கள்; ராஜாவின் குடும்பத்தாரையும், ராஜமாதாவின் குடும்பத்தாரையும் வாழ்த்தப் போகிறோம்” என்றார்கள்.

¹⁴அப்பொழுது அவன், “இவர்களை உயிரோடே பிடியுங்கள்” என்றான். அவர்களை உயிரோடே பிடித்து, பெத்-எக்கேத்தின் கிணற்றண்டையிலே நாற்பத்திரண்டுபேராகிய அவர்களை வெட்டி, ஒருவரையும் மீதியாக விடவில்லை.

¹⁵அவன் அவ்விடத்தைவிட்டுப் புறப்பட்டபோது, தன்னைச் சந்திக்கவந்த ரேகாபின் குமாரனாகிய யோனதாபைக் கண்டு, அவனை வாழ்த்தி, “என் இருதயம் உன் இருதயத்தோடு செம்மையாயிருக்கிறதுபோல, உன் இருதயமும் என்னோடு செம்மையாயிருக்கிறதா?” என்று கேட்டான். அதற்கு யோனதாப், “இருக்கிறது” என்றான். யெகூ, “அப்படியானால் உன் கையைத் தா” என்றான்; அவன் தன் கையைக் கொடுத்தபோது, யெகூ அவனைத் தன் இரதத்தில் ஏற்றிக்கொண்டு,

¹⁶“என்னோடேகூட வந்து, எங்கள் பிதாவின்மேல் எனக்குள்ள வைராக்கியத்தைப் பார்” என்றான். இப்படியாக அவனைத் தன் இரதத்தில் ஏறியிருக்கச் செய்தான். ¹⁷அவன் சமாரியாவுக்கு வந்தபோது, எங்கள் பிதா எலியாவுக்குச் சொல்லியிருந்தபடியே, சமாரியாவிலே ஆகாபுக்கு மீதியாயிருந்த அனைவரையும் அழித்துத் தீர்ந்தான்.

பாகால் வழிபாட்டை யெகூ அழித்தல்

¹⁸பின்பு யெகூ சகல ஜனங்களையும் கூட்டி, அவர்களை நோக்கி: “ஆகாப் பாகாலைக் கொஞ்சம் சேவித்தான்; யெகூவோ அவனை அதிகமாய்ச் சேவிப்பான். ¹⁹இப்போது பாகாலின் தீர்க்கதரிசிகள் அனைவரையும், அவனை வணங்குகிற யாவரையும், அவனுடைய ஆசாரியர் எல்லாரையும் என்னிடத்தில் அழைத்துக்கூட்டுங்கள்; ஒருவரும் தவறக்கூடாது; பாகாலுக்கு ஒரு பெரிய பலி செலுத்தப்போகிறேன்; தவறியிருக்கிறவன் உயிரோடிருக்கமாட்டான்” என்றான். ஆனால் பாகாலை வணங்குகிறவர்களை அழிக்கும்படி யெகூ இதைத் தந்திரமாய்ச் செய்தான்.

²⁰பாகாலுக்கென்று ஒரு பரிசுத்த சபைகூடுதலை அறிவியுங்கள் என்று யெகூ கட்டளையிட்டான்; அவர்கள் அதை அறிவித்தார்கள்.

²¹யெகூ இஸ்ரவேல் தேசம் எங்கும் சொல்லியனுப்பினான்; பாகாலை வணங்குகிற யாவரும் வந்தார்கள்; வராதவன் ஒருவனும் இல்லை. அவர்கள் பாகாலின் கோவிலுக்குள் பிரவேசித்தார்கள்; பாகாலின் கோவில் ஓரத்திலிருந்து ஓரம்வரை நிறைந்தது. ²²அப்பொழுது யெகூ வஸ்திரசாலைக்காரனை நோக்கி, “பாகாலை வணங்குகிற யாவருக்கும் வஸ்திரங்களை எடுத்துக்கொடு” என்றான்; அவன் அவர்களுக்கு வஸ்திரங்களை எடுத்துக்கொடுத்தான்.

²³யெகூவும் ரேகாபின் குமாரனாகிய யோனதாபும் பாகாலின் கோவிலுக்குள் பிரவேசித்து, பாகாலை வணங்குகிறவர்களை நோக்கி: “நன்றாய்த் தேடிப்பாருங்கள்; பாகாலை வணங்குகிறவர்கள் மாத்திரமே இங்கே இருக்கவேண்டும்; எங்கள் பிதாவின் ஊழியக்காரர் ஒருவரும் உங்களோடேகூட இங்கே இராதபடி பாருங்கள்” என்றான்.

²⁴அவர்கள் பலிகளையும் தகனபலிகளையும் செலுத்தும்படி உள்ளே பிரவேசித்தார்கள். யெகூ எண்பது பேரை வெளியே நிறுத்தி, “நான் உங்கள் கைகளில் ஒப்புவிக்கிற மனிதரில் ஒருவனையாகிலும் தப்பிப்போகவிடுகிறவனுடைய உயிர் அவனுடைய உயிருக்கு ஈடாகும்” என்று எச்சரித்திருந்தான்.

²⁵தகனபலி செலுத்தி முடிந்தபோது, யெகூ காவலாளிகளையும் தலைவர்களையும் நோக்கி, “உள்ளே போய் அவர்களை வெட்டிப்போடுங்கள்; ஒருவனும் தப்பிப்போகவேண்டாம்” என்றான். அவர்கள் அவர்களைப் பட்டயக்கருக்கினால் வெட்டினார்கள்; காவலாளிகளும் தலைவர்களும் அவர்களை வெளியே எறிந்துவிட்டு, பாகாலின் கோவிலின் உட்புற அறைக்குப் போய், ²⁶பாகாலின் கோவிலிலிருந்த சிலைகளை வெளியே கொண்டுவந்து சுட்டெரித்தார்கள். ²⁷பாகாலின் சிலையைத் தகர்த்து, பாகாலின் கோவிலை இடித்துப்போட்டு, அதை இந்நாள்வரைக்கும் இருக்கிறபடி மலஜலம் கழிக்கும் இடமாக்கினார்கள்.

²⁸இப்படியாக யெகூ இஸ்ரவேலிலிருந்து பாகால் வழிபாட்டை அழித்தான். ²⁹ஆயினும் இஸ்ரவேலைப் பாவஞ்செய்யப்பண்ணின நேபாத்தின் குமாரனாகிய யெரொபெயாமின் பாவங்களாகிய பெத்தேலிலும் தாணிலும் இருந்த பொற்கன்றுக்குட்டிகளைவிட்டு யெகூ விலகவில்லை.

³⁰எங்கள் பிதா யெகூவை நோக்கி: “என் பார்வைக்குச் செம்மையானதைச் செய்து, நீ நன்றாய் நடந்து, என் மனதிலிருந்தபடியெல்லாம் ஆகாபின் குடும்பத்துக்குச் செய்தபடியினால், உன் சந்ததியார் நான்காம் தலைமுறைமட்டும் இஸ்ரவேலின் சிங்காசனத்தில் வீற்றிருப்பார்கள்” என்றார்.

³¹ஆனாலும் யெகூ இஸ்ரவேலின் தேவனாகிய எங்கள் பிதாவின் நியாயப்பிரமாணத்தின்படி தன் முழு இருதயத்தோடும் கவனமாய் நடக்க மனதாயிருக்கவில்லை; இஸ்ரவேலைப் பாவஞ்செய்யப்பண்ணின யெரொபெயாமின் பாவங்களைவிட்டு அவன் விலகவில்லை.

³²அந்நாட்களில் எங்கள் பிதா இஸ்ரவேலைச் சுருக்கத் தொடங்கினார்; ஆசகேல் இஸ்ரவேலின் எல்லைகள் எங்கும் அவர்களை முறியடித்தான். ³³யோர்தானுக்குக் கிழக்கே, ஆர்னோன் நதிக்கு அருகிலிருக்கிற ஆரோவேர் தொடங்கி, கீலேயாத்தையும் பாசானையும் உட்பட, காத், ரூபன், மனாசே கோத்திரத்தாருடைய தேசமாகிய கீலேயாத் முழுவதையும் முறியடித்தான்.

³⁴யெகூவின் மற்ற செய்திகளும், அவன் செய்த யாவும், அவனுடைய சகல வல்லமையும் இஸ்ரவேல் ராஜாக்களின் நாளாகமப் புத்தகத்தில் அல்லவோ எழுதியிருக்கிறது? ³⁵யெகூ தன் பிதாக்களோடே நித்திரையடைந்தான்; அவனைச் சமாரியாவிலே அடக்கம்பண்ணினார்கள்; அவனுடைய குமாரனாகிய யோவாகாஸ் அவன் ஸ்தானத்தில் ராஜாவானான். ³⁶யெகூ சமாரியாவிலே இஸ்ரவேலை அரசாண்ட காலம் இருபத்தெட்டு வருடம்.