Jeremiah 4

4 ¹“Bí ìwọ bá padà, Israẹli,” ni Baba wa wí, “nígbà náà kí o padà sọ́dọ̀ mi. Bí ìwọ bá mú àwọn ohun ìríra rẹ kúrò níwájú mi tí o kò sì yẹ̀, ²tí ìwọ bá sì búra pé, ‘Bí Baba wa ti wà láàyè,’ ní òtítọ́, ní ìdájọ́, àti ní òdodo, nígbà náà ni àwọn orílẹ̀-èdè yóò bù kún ara wọn nínú rẹ̀, nínú rẹ̀ ni wọn yóò sì ṣògo.”

³Nítorí báyìí ni Baba wa wí fún àwọn ènìyàn Juda àti fún Jerusalẹmu pé: Ẹ ṣí ilẹ̀ yín tí a kò ro, ẹ má sì gbìn sáàrin ẹ̀gún. ⁴Ẹ kọ ara yín ní ilà fún Baba wa; ẹ sì mú awọ adọ̀dọ̀ ọkàn yín kúrò, ẹ̀yin ènìyàn Juda àti àwọn olùgbé Jerusalẹmu—bí bẹ́ẹ̀ kọ́, ìbínú mi yóò bú jáde bí iná, yóò sì jó láìsí ẹni tí yóò pa á, nítorí ìwà búburú iṣẹ́ yín.

Ìparun Ń Bọ̀ Láti Àríwá

⁵“Ẹ kéde rẹ̀ ní Juda, ẹ pòkìkí rẹ̀ ní Jerusalẹmu, kí ẹ sì wí pé: ‘Ẹ fọn ìpè kárí ilẹ̀ náà!’ Ẹ kígbe sókè kí ẹ sì wí pé: ‘Ẹ péjọpọ̀, kí àwa sì sá àsálà sí àwọn ìlú olódi!’ ⁶Ẹ gbé àsíá sókè sí ọ̀nà Sioni! Ẹ sá àsálà, ẹ má ṣe dúró! Nítorí èmi ń mú ibi wá láti àríwá, ìparun ńlá kan.”

⁷Kìnnìún kan ti gòkè wá láti inú igbó rẹ̀; apanirun àwọn orílẹ̀-èdè ti dìde lọ. Ó ti kúrò ní ibùjókòó rẹ̀ láti sọ ilẹ̀ rẹ di ahoro; àwọn ìlú rẹ yóò parun, láìsí ẹni tí yóò kù láti máa gbé inú wọn. ⁸Nítorí náà ẹ wọ aṣọ ọ̀fọ̀, ẹ pohùnréré ẹkún, kí ẹ sì hu, nítorí ìbínú gbígbóná Baba wa kò tí ì yípadà kúrò lọ́dọ̀ wa.

⁹“Ní ọjọ́ náà,” ni Baba wa wí, “ọkàn ọba àti àwọn ìjòyè rẹ̀ yóò rẹ̀wẹ̀sì; ẹ̀rù yóò ba àwọn àlùfáà, ẹnu yóò sì ya àwọn wòlíì.”

¹⁰Nígbà náà ni mo wí pé, “Á à, Baba Olódùmarè! Ìwọ ti tan àwọn ènìyàn wọ̀nyí àti Jerusalẹmu jẹ pátápátá: ‘Àlàáfíà ni ẹ̀yin yóò ní’—nígbà tí idà fi dé ọ̀fun wa.”

¹¹“Nígbà náà ni a ó sọ fún àwọn ènìyàn wọ̀nyí àti Jerusalẹmu pé: Ẹ̀fúùfù gbígbóná láti orí òkè aṣálẹ̀ tí ó ṣófo ń fẹ́ sí ọ̀dọ̀ ọmọbìnrin àwọn ènìyàn mi—kì í ṣe láti gbọn, kì í ṣe láti ṣẹ́. ¹²Ẹ̀fúùfù tí ó lágbára ju èyí lọ ń bọ̀ nípa àṣẹ mi. Nísinsìnyí èmi yóò sọ ìdájọ́ mi jáde sí wọn.”

¹³Wò ó! Ọ̀tá ń rọ́ wá bí àwọsánmà, àwọn kẹ̀kẹ́ ogun rẹ̀ dàbí ìjì líle; àwọn ẹṣin rẹ̀ yára ju idì lọ. Ègbé ni fún wa—àwa ti parun! ¹⁴Jerusalẹmu, wẹ ibi kúrò nínú ọkàn rẹ, kí a lè gbà ọ́ là. Yóò ti pẹ́ tó tí àwọn èrò búburú rẹ yóò máa gbé inú rẹ? ¹⁵Nítorí ohùn kan ń kéde rẹ̀ láti Dani wá, ó ń pòkìkí ibi láti orí òkè Efraimu wá.

¹⁶Ẹ kìlọ̀ fún àwọn orílẹ̀-èdè, ẹ kéde rẹ̀ fún Jerusalẹmu pé: “Àwọn ológun tó ń dótì ń bọ̀ láti ilẹ̀ jíjìn wá; wọ́n ń pariwo ogun wọn sí àwọn ìlú Juda. ¹⁷Wọ́n yí i ká bí àwọn olùṣọ́ tí ń ṣọ́ oko, nítorí ó ti ṣọ̀tẹ̀ sí mi,” ni Baba wa wí. ¹⁸Ọ̀nà rẹ àti ìṣe rẹ ni ó mú èyí wá sórí rẹ. Èyí ni ègbé rẹ, báwo ni ó ti korò tó, nítorí ó gún dé inú ọkàn rẹ gan-an.

Wòlíì Ń Sunkún Fún Àwọn Ènìyàn Rẹ̀

¹⁹Ìdààmú mi, ìdààmú mi! Mo ń yí nínú ìrora. Á à, ògiri ọkàn mi! Ọkàn mi ń mì tìtì nínú mi; èmi kò lè dákẹ́, nítorí mo ti gbọ́ ìró ìpè, ìdágìrì ogun. ²⁰A ti kéde ibi lórí ibi, nítorí gbogbo ilẹ̀ náà ti di ahoro. Ní ìṣẹ́jú kan, a run àwọn àgọ́ mi, ìbòrí àgọ́ mi ní ìṣẹ́jú-àáyá. ²¹Yóò ti pẹ́ tó tí èmi yóò máa rí àsíá ogun tí n ó sì máa gbọ́ ìró ìpè?

²²“Nítorí àwọn ènìyàn mi jẹ́ òmùgọ̀; wọn kò mọ̀ mí. Wọ́n jẹ́ ọmọ aláìlóye, tí kò ní òye kankan. Wọ́n mọ̀ọ́ṣe ní ṣíṣe ibi, ṣùgbọ́n wọn kò mọ bí a ti ń ṣe rere.”

²³Mo bojú wo ilẹ̀ ayé, ó sì wà ní rúdurùdu, ó sì ṣófo; mo sì bojú wo àwọn ọ̀run, ìmọ́lẹ̀ wọn sì ti lọ. ²⁴Mo bojú wo àwọn òkè ńlá, wọ́n sì ń mì tìtì; gbogbo àwọn òkè kéékèèké sì ń mì síwá-sẹ́yìn. ²⁵Mo wò ó, kò sì sí ẹnìkankan rárá; gbogbo ẹyẹ ojú ọ̀run sì ti sá lọ. ²⁶Mo wò ó, ilẹ̀ eléso náà sì ti di aṣálẹ̀; gbogbo àwọn ìlú rẹ̀ sì wà ní ahoro níwájú Baba wa, níwájú ìbínú gbígbóná rẹ̀.

²⁷Nítorí báyìí ni Baba wa wí: Gbogbo ilẹ̀ náà yóò di ahoro, síbẹ̀ èmi kì yóò parun rẹ̀ pátápátá. ²⁸Nítorí èyí ni ilẹ̀ ayé yóò ṣọ̀fọ̀, àwọn ọ̀run lókè yóò sì ṣú dúdú, nítorí mo ti sọ̀rọ̀, mo ti pinnu; èmi kì yóò yí èrò mi padà, èmi kì yóò sì padà sẹ́yìn kúrò nínú rẹ̀.

²⁹Nítorí ariwo àwọn ẹlẹ́ṣin àti àwọn tafàtafà, gbogbo ìlú ló ń sá. Wọ́n sá lọ sínú igbó, wọ́n sì gòkè lọ sáàrin àwọn àpáta; gbogbo ìlú ni a kọ̀ sílẹ̀, láìsí ẹni tí ń gbé inú wọn. ³⁰Ìwọ, ẹni tí a ti parun, kí ni ìwọ ń ṣe, tí ìwọ fi ń wọ aṣọ òdòdó, tí ìwọ fi ń fi ohun ọ̀ṣọ́ wúrà ṣe ara rẹ lọ́ṣọ̀ọ́, tí ìwọ sì ń kun ojú rẹ? Lásán ni ìwọ ṣe ara rẹ lẹ́wà. Àwọn olólùfẹ́ rẹ kẹ́gàn rẹ; wọ́n ń wá ọ̀nà láti pa ọ́. ³¹Nítorí mo gbọ́ igbe kan bí ti obìnrin tí ń rọbí, ìrora bí ti ẹni tí ń bí àkọ́bí rẹ̀—igbe ọmọbìnrin Sioni, tí ń mí hẹlẹ-hẹlẹ, tí ó sì na ọwọ́ rẹ̀ jáde: “Ègbé ni fún mi! Mo ń kú lójú àwọn apànìyàn.” ^a a v31 'Ọmọbìnrin Sioni' jẹ́ orúkọ ewì fún Jerusalẹmu.