Yeremia 4

4 ¹"Kama utarudi, Israeli," asema Baba yetu, "basi nirudie mimi. Kama utaondoa machukizo yako mbele zangu wala usiyumbayumbe, ²na kama utaapa, 'Kama Baba yetu aishivyo,' katika kweli, katika hukumu ya haki, na katika haki, ndipo mataifa yatajibariki katika yeye, na katika yeye watajitukuza."

³Kwa maana hivi ndivyo asemavyo Baba yetu kwa watu wa Yuda na kwa Yerusalemu: Ilimeni shamba lenu lisilolimwa, wala msipande kati ya miiba. ⁴Jitahirini kwa Baba yetu; ondoeni govi la mioyo yenu, enyi watu wa Yuda na wakaao Yerusalemu—ama sivyo ghadhabu yangu itawaka kama moto na kuunguza pasipo mtu wa kuizima, kwa sababu ya uovu wa matendo yenu.

Maafa Yanakuja Kutoka Kaskazini

⁵"Tangazeni katika Yuda, hubirini katika Yerusalemu, na semeni: 'Pigeni tarumbeta katika nchi yote!' Pazeni sauti mkisema: 'Kusanyikeni pamoja, nasi na tukimbilie miji yenye ngome!' ⁶Inueni bendera kuelekea Sayuni! Kimbilieni usalama, msikawie! Kwa maana ninaleta maafa kutoka kaskazini, uharibifu mkuu."

⁷Simba amepanda kutoka kichakani mwake; mwangamizi wa mataifa yuko njiani. Ameondoka mahali pake ili kuifanya nchi yako ukiwa; miji yako itakuwa magofu, pasipo mtu wa kukaa ndani yake. ⁸Kwa hiyo vaeni nguo za maombolezo, ombolezeni na kulia kwa uchungu, kwa maana hasira kali ya Baba yetu haijaondoka kwetu.

⁹"Katika siku hiyo," asema Baba yetu, "mfalme na maofisa wake watapoteza ujasiri wao; makuhani watashangaa, na manabii watastaajabu."

¹⁰Ndipo nikasema, "Ee, Baba Mwenye Enzi! Umewadanganya kabisa watu hawa na Yerusalemu ukisema: 'Mtakuwa na amani'—wakati upanga umefika kooni mwetu."

¹¹"Wakati huo watu hawa na Yerusalemu wataambiwa: Upepo wa moto kutoka vilele tupu vya jangwani unavuma kuelekea binti ya watu wangu—si kwa kupepeta, wala si kwa kuchambua. ¹²Upepo wenye nguvu kupita huu unakuja kwa amri yangu. Sasa natamka hukumu zangu juu yao."

¹³Tazama! Adui anasonga mbele kama mawingu, magari yake ya vita kama kimbunga; farasi wake ni wepesi kuliko tai. Ole wetu—tumeangamia! ¹⁴Ee Yerusalemu, osha uovu kutoka moyoni mwako, upate kuokolewa. Hata lini mawazo yako maovu yatakaa ndani yako? ¹⁵Kwa maana sauti inatangaza kutoka Dani, ikihubiri maafa kutoka vilima vya Efraimu.

¹⁶Yaonyeni mataifa, litangazeni jambo hili kwa Yerusalemu: "Wenye kuzingira wanakuja kutoka nchi ya mbali; wanapaza sauti zao za vita juu ya miji ya Yuda. ¹⁷Wanamzingira pande zote kama walinzi wanaolinda shamba, kwa sababu ameniasi mimi," asema Baba yetu. ¹⁸Njia zako na matendo yako yamekuletea haya. Hii ni adhabu yako, tena ni chungu kama nini, kwa maana inachoma hata moyoni mwako kabisa.

Nabii Anawalilia Watu Wake

¹⁹Maumivu yangu, maumivu yangu! Nagaagaa kwa uchungu. Ee, kuta za moyo wangu! Moyo wangu unapiga ndani yangu; siwezi kunyamaza, kwa maana nimesikia sauti ya tarumbeta, mngurumo wa vita. ²⁰Maafa juu ya maafa yanatangazwa, kwa maana nchi yote imeharibiwa. Ghafula mahema yangu yameangamizwa, mapazia ya mahema yangu kwa dakika moja. ²¹Hata lini nitaona bendera ya vita na kusikia sauti ya tarumbeta?

²²"Kwa maana watu wangu ni wapumbavu; hawanijui mimi. Ni watoto wasio na akili, wasio na ufahamu. Ni hodari katika kutenda mabaya, lakini hawajui jinsi ya kutenda mema."

²³Niliitazama dunia, nayo ilikuwa ukiwa, tupu; na mbingu, nazo nuru yake ilikuwa imetoweka. ²⁴Niliitazama milima, nayo ilikuwa ikitetemeka; vilima vyote vilikuwa vikiyumbayumba. ²⁵Nilitazama, na tazama hapakuwa na mtu hata mmoja; kila ndege wa angani alikuwa amekimbia. ²⁶Nilitazama, na nchi iliyokuwa na rutuba ilikuwa jangwa; miji yake yote ilikuwa magofu mbele za Baba yetu, mbele ya hasira yake kali.

²⁷Kwa maana hivi ndivyo asemavyo Baba yetu: Nchi yote itakuwa ukiwa, lakini sitaiangamiza kabisa. ²⁸Kwa sababu ya hili nchi itaomboleza na mbingu juu zitakuwa giza, kwa maana nimenena, nimekusudia; sitajuta, wala sitageuka kuiacha.

²⁹Kwa mshindo wa wapanda farasi na wapiga upinde kila mji unakimbia. Wanakimbilia vichakani na kupanda juu ya miamba; kila mji umeachwa, pasipo mtu wa kukaa ndani yake. ³⁰Nawe, uliyeharibiwa, unafanya nini, ukijivika nguo nyekundu, ukijipamba kwa mapambo ya dhahabu, ukijipaka rangi machoni pako? Wajipamba bure. Wapenzi wako wanakudharau; wanataka kukuua. ³¹Kwa maana nilisikia kilio kama cha mwanamke aliye katika utungu wa kuzaa, uchungu kama wa yule azaaye mtoto wake wa kwanza—kilio cha binti Sayuni, akitweta kwa kukosa pumzi, akinyoosha mikono yake: "Ole wangu! Naangamia mbele ya wauaji." ^a a v31 'Binti Sayuni' ni jina la kishairi la Yerusalemu.