Jeremiah 4

4 ¹"Na latungakha, O Israel," da ithumwui Avāna hānga, "chithākha ili mai ngareiunglu. Iwui mangā eina nawui ningkakachai otbing chi khuithuilaga mangayeiakha, ²kala nana, 'ithumwui Avāwui ming singda kahāngna,' da khamashung eina, mashun eina, kala khamashung khangarong eina shākhi sāakha, chithākha miyurbingna achili themlāk somira, kala achili athumna sochikatra."

³Kaja ithumwui Avāna Judahwui mibing kala Jerusalemli hithāda hānga: Nathumwui rampho kahai ngalei chi marākkhuilu, kala ka̱shātbingwui ngachaili athā mayaoalu. ⁴Ithumwui Avāwui vang nathum khalatta ahui rimshoklu; nathumwui wuklungwui ahui chi rimshoklu, O Judahwui mibing kala Jerusalemli kapambing; chithā maningakha nathumwui makaphā otsakwui vang eina iwui malungkhavāt mei thāda chuishokta, khipākhana sāshimitmi khavai maleila chuira.

Atungshongwui Eina Kalākashi Rāra

⁵"Judahli hi phongshoklu, Jerusalemli hi vaosanglu, kala hānglu: 'Ngalei peichaoda talla̱ khonglu!' Vaoda hānglu: 'Kazipkhuingarumlu, kala raipan sākahai keinungbingli yāmsa!' ⁶Zionshong machut chitheilu! Ngayin khavai yāmlu, masāngalu! Kaja ina atungshongwui eina kalākashi, hakkhamahā sākashimān akha khuirāra."

⁷Kazingkha̱ akha awui thichangwui eina kharāhaira; miyurbing sākakathāna china raihaira. Ana nawui ngalei ramcho ngasākhavai awui apam chihohaihaira; nawui keinungbing ngayāngserhaora, chili kapam mi akhala maleimara. ⁸Chiwui vang eina mākham kahai bora ngavailu, sifalaga chapngachālu, kaja ithumwui Avāwui malungvātshun kahai chi ithumwui eina mangareithuimihaira.

⁹"Chithang atamli," da ithumwui Avāna hānga, "awunga kala awui wungnaobingna malung tātungra; pāngmonbingna matakhakhaira, kala marānbingna khakshingakra."

¹⁰Chieina ina hānga, "Iyavo, O Proho Avā! Nana hi mibing kala Jerusalemli katonga minam ngasakhaira: 'Nathumli chingri leira,'—kha raighai china ithumwui kharokli kāshunghaira."

¹¹"Chithang atamli hi mibing kala Jerusalemli hāngmira: Siwukwui kaphungtonbingwui eina kasā masi akha iwui mibingwui sha̱naoshong phanra; chi ham khavai maningla, ngayāng khavaila maningmana. ¹²Hiwui vang reimei masi akhana iwui kahāng eina rāra. Ara ina athumwuitungli iwui bichar hāngmachinra."

¹³Yanglu! Yangkashe china muiyā thāda kharomraihaira, awui charfabing chi sur kathāna; awui siguibing chi khalānglila thākmei. Ithumli kakhanang ngasāranu, kaja ithum sākathānhaira! ¹⁴O Jerusalem, nawui wuklungwui eina makhayā chi pheomilu, chieina na huikhuira. Nawui makaphā ningmāng chi karankha naningli leichingfarakhala? ¹⁵Kaja Danwui eina akhon akha shai, kala Ephraimwui phungrābingwui eina kalākashi hāngshoka.

¹⁶Miyurbingli hāngmathinlu, Jerusalemli hi vaosanglu: "Ram katāva̱wui eina kakuinambing rāra; athumna Judahwui keinungbingtungli raiwui khavao vaora. ¹⁷Lui khamayonabing thāda athumna ali kuinama, kaja ana ili thuingararhaira," da ithumwui Avāna hānga. ¹⁸Nathumwui apong kala nathumwui otsakbingna hi nathumwuitungli raingasakhaira. Hi nathumwui athit china, kala kayākha khaila, kaja hi nawui wuklung pha̱ kāpza̱ra.

Marānna Awui Mibingwui Vang Chapngachā

¹⁹Iwui kakhanang, iwui kakhanang! I kakhanang kachotli chotchira. Iyavo, iwui wuklungwui phākho! Iwui wuklung iwui alungli tātunga; ina kasaikha mapamlengmana, kaja ina talla̱khon, raiwui ningkhangasharkhon shāhaira. ²⁰Kalākashi tungli kalākashi hānghaira, kaja ngalei katonga sākazamhaira. Mikkhayip akhawui alungli iwui kachonshimbing sāshimānhaira, kala hunkhawui alungli iwui kachonshimwui ngavaibing sāshimānhaira. ²¹Khaya̱ thang phona ina raiwui langkhamphan theira, kala talla̱khon shāra?

²²"Kaja iwui mibing mangkhama̱na; athumna ili matheimana. Athum theishingkakhui makhalei mangma̱tot naongarāna. Athum makaphā ot kasāli kathembingna, kha kaphā ot sāli athumna matheimana."

²³Ina ngaleili yanga, kala chi azak maleimana kala khaya̱ maleithuwa; kala kazingramli yanga, kala athumwui kahor maleithuwa. ²⁴Ina kaphungbingli yanga, kala nganuka; phungrā saikora titilihaowa. ²⁵Ina yanga, kala mi khipākha maleithuwa; khamasaiwui vānao saikora yāmserhaowa. ²⁶Ina yanga, kala athei matheiya ngalei siwuk onhaira; awui keinung saikora ithumwui Avāwui mangāli, awui malungvātshun kahaiwui mangāli ja̱ta ngasakhaira.

²⁷Kaja ithumwui Avāna hithāda hānga: Ngalei katonga ngachakyānghaora, kha ina chi shimānser masāmara. ²⁸Hiwui vang eina ngaleina sifara kala atungshongwui kazingram tangmangtinghaora, kaja ina hāngkahaina, ina ngarānkahaina; ining ngachei masāmara, kala ina chiwui eina manganlanmara.

²⁹Sigui raimi kala malā kasingbingwui akhon eina keinung saikora yāma. Athum thichangli yāma kala lungharbingwui ngachaili kāya; keinung saikora horhaira, chili mi khipākha mapammana. ³⁰Kala na, sākazam kahaiva̱, hungshi kahai kachon ngavaikhuida, sināwui ngachān sāri eina nakhalatta shaksākhuida, namikli machu tākhuida, na khi sāda leikhala? Nakhalatta khamathā sākhui china aremana. Nawui leikashebingna nali ningkachaiya; athumna nali shaothatluingaiya. ³¹Kaja naokhara̱ sha̱naowui khavao thāda, khare naokhara̱va̱wui kakhanang kachot thāda, ina Zionwui naongalāva̱wui khavao shāhaira; ana khaksui suikhui khavai chotta, awui pāng chiza̱vāda hānga: "Ili kakhanang ngasaranu! Ina shaothatkashebingwui mangāli thira." ^a a v31 'Zionwui naongalāva̱' hi Jerusalemwui vang laathā aming akhana.