ዘፀኣት 2 FHB Father's Heart Bible™

2 ¹ሓደ ሰብኣይ ካብ ቤት ሌዊ ድማ ኸይዱ ንጓል ሌዊ ኣእተወ። ²እታ ሰበይቲ ኸዓ ፀኒሳ ወዲ ወለደት፤ ፅቡቕ ምዃኑ ምስ ረአየት ድማ ሰለስተ ወርሒ ሓብአቶ። ³ደጊም ክትሓብኦ ስለ ዘይከኣለት፥ ናይ በርዲ መሶብ ወሲዳ፥ ብቕጥራን ለኸየቶ፤ ነቲ ህፃን ኣብኡ ኣእተወቶ፤ ኣብ ገምገም ሩባ፥ ኣብ መንጎ እቲ ሻምብቆ ድማ ኣንበረቶ። ⁴እታ ሓፍቱ ኸዓ፥ እንታይ ከም ዝኾኖ ኽትፈልጥ፥ ኣብ ርሑቕ ኮይና ትጥምት ነበረት። ⁵ጓል ፈርዖን ድማ ኣብ ሩባ ክትሕፀብ ወረደት፤ ኣግልጋልታ ኸዓ ኣብ ወሰን ሩባ ይመላለሳ ነበራ። ነቲ ኣብ መንጎ እቲ ሻምብቆ ዝነበረ መሶብ ድማ ረአየት፤ ነታ ኣገልጋሊት ልኢኻ ኸዓ ኣምፅአቶ። ⁶ከፊታ ድማ ነቲ ህፃን ረአየቶ፤ ሓደ ዝበኪ ወዲ ህፃን ነበረ። ራህርሀትሉ ኸዓ፥ “እዝ ካብ ደቂ ዕብራውያን ሓደ እዩ” በለት።

⁷ሓፍቱ ድማ ንጓል ፈርዖን “ነዝ ህፃን ከተጥቡልኪ፥ ካብ ዕብራውያን ኣንስቲ ሓንቲ ክፅውዓልኪዶ?” በለታ።

⁸ጓል ፈርዖን ድማ “እወ፥ ኪዲ” ኢላ መለሰት። እታ ጓል ከዓ ኸይዳ ኣደ እቲ ህፃን ፀወዐት።

⁹ጓል ፈርዖን ድማ ከምዙይ በለታ፦ “ነዝ ቘልዓ እዙይ ወሲድኪ ኣጥብውለይ፤ ኣነ ድማ ዓስብኺ ክኸፍለኪ እየ።” እታ ሰበይቲ ኸዓ ነቲ ህፃን ወሲዳ ኣጥበወቶ።

¹⁰እቲ ቘልዓ ድማ ዓበየ፤ ናብ ጓል ፈርዖን ኣምፅአቶ፤ ንሳ ኸዓ ወዳ ገበረቶ። “ካብ ማይ ስለ ዝሰሓብክዎ” ኢላ ድማ “ሙሴ” ኢላ ሰመየቶ። ^a a v10 እቲ ስም ሙሴ ነቲ “ናብ ወፃኢ ምስሓብ” ዝብል ቃል ይመስል፤ በታ ኻብ ማይ ዝተልዓለላ ህሞት ኢሉ ዝተሰመየ እዩ።

ሙሴ ኣብ መንጎ ህዝቡ

¹¹በቲ መዓልቲታት እቲ ድማ ሙሴ ዓበየ፤ ናብ ህዝቡ ወፀ፤ ፆሮም ድማ ረአየ፤ ሓደ ግብፃዊ ንሓደ ዕብራዊ፥ ካብ ኣዝማዱ ዝኾነ ሓደ፥ ክወቕዖ ከሎ ረአየ። ¹²ናብዙይን ናብቱይን ጠሚቱ ድማ፥ ዝርእዮ ሰብ ከም ዘየለ ምስ ፈለጠ፥ ነቲ ግብፃዊ ሰብኣይ ቐቲሉ ኣብ ሑፃ ሓብኦ።

¹³ንፅባሒቱ ድማ ወፀ፤ ክልተ ዕብራውያን ክባኣሱ ኸለዉ ረአየ፤ ነቲ በዳሊ ኸዓ “ንብፃይካ ስለ ምንታይ ትወቕዕ ኣለኻ?” በሎ።

¹⁴ንሱ ድማ “ኣብ ልዕሌና ሓለቓን ፈራድን ዝገበረካ መን እዩ? ከምቲ ነቲ ግብፃዊ ዝቐተልካዮ፥ ንኣይ ክትቀትለኒዶ ትሓስብ ኣለኻ?” በለ። ሙሴ ኸዓ ፈርሐ፤ “እዝ ነገር እዙይ ብርግፅ ተፈሊጡ ኣሎ” ኢሉ ድማ ሓሰበ።

¹⁵ፈርዖን ድማ ሰሚዑ ንሙሴ ክቐትሎ ደለየ፤ ሙሴ ኸዓ ካብ ፈርዖን ሃዲሙ ኣብ ምድሪ ምድያም ተቐመጠ፤ ኣብ ጥቓ ዒላ ድማ ኮፍ በለ።

¹⁶ናይ ምድያም ካህን ድማ ሸውዓተ ኣጓላት ነበርኦ፤ ንሳተን ከዓ ማይ ክቐድሓ መፃ፤ መጓሰ ኣቦአን ከስትያ ኸዓ ጋብላታት መልኣ። ¹⁷እቶም ጓሶት ድማ መፂኦም ኣባረርወን፤ ሙሴ ግና ተሲኡ ኣድሓነን፤ መጓሰአን ድማ ኣስተየለን። ¹⁸ናብ ኣቦአን ራጉኤል ምስ ተመለሳ ድማ፥ “ሎሚ ስለ ምንታይ ቀልጢፍክን ተመሊስክን?” በለን።

¹⁹ንሳተን ድማ “ሓደ ግብፃዊ ሰብኣይ ካብ ኢድ እቶም ጓሶት ኣድሓነና፤ ማይ እውን ቐዲሑ መጓሰ ኣስተየልና” በላ።

²⁰ንኣጓላቱ ድማ “ንሱ ኣበይ ኣሎ? ስለ ምንታይ ነቲ ሰብኣይ ሓዲግክናኦ? ክበልዕ ፀውዕኦ” በለን።

²¹ሙሴ ድማ ምስቲ ሰብኣይ ክቕመጥ ፈተወ፤ ንሱ ኸዓ ጓሉ ሲፖራ ንሙሴ ሰበይቲ ኽትከውን ሃቦ። ²²ንሳ ኸዓ ወዲ ወለደት፤ ሙሴ ድማ “ኣብ ጓና ሃገር ስደተኛ ኮይነ ነይረ” ኢሉ ጌርሳም ኢሉ ሰመዮ። ^b b v22 እቲ ስም ጌርሳም ነቲ ብቛንቋ እብራይስጢ “ኣብኡ ስደተኛ” ዝብል ይመስል፤ ሙሴ ንወዱ ካብ ዓዱ ርሒቑ ዝነበረ ጓና ኾይኑ ብምንባሩ ኢሉ ሰመዮ።

²³ድሕሪ ነዊሕ ጊዜ ድማ ንጉስ ግብፂ ሞተ። ደቂ እስራኤል ከዓ ካብ ባርነት ዝተላዕለ ይግዕሩ ነበሩ፤ ጨደሩ ድማ፤ ኣውያቶም ከዓ ካብ ባርነት ናብ ኣቦና ዓረገ። ²⁴ኣቦና ድማ ግዕረኦም ሰምዐ፤ ነቲ ምስ ኣብርሃምን ይስሓቅን ያእቆብን ዝኣተዎ ኺዳን ዘከረ። ²⁵ኣቦና ድማ ንደቂ እስራኤል ጠመቶም፤ ኣስተውዓለ ድማ።