ዘፀኣት 1 FHB Father's Heart Bible™

1 ¹ስም እቶም ምስ ያእቆብ በብቤተ ሰቦም ናብ ግብፂ ዝመፁ ደቂ እስራኤል እዚኣቶም እዮም፦ ²ሮቤል፥ ስምኦን፥ ሌዊ፥ ይሁዳ፥ ³ይሳኮር፥ ዛብሎን፥ ብንያም፥ ⁴ዳን፥ ንፍታሌም፥ ጋድ፥ ኣሴር። ⁵ካብ ሕቘ ያእቆብ ዝወፁ ኵሎም ሰብዓ ሰብ ነበሩ፤ ዮሴፍ ግና ኣቐዲሙ ኣብ ግብፂ ነበረ። ⁶ሽዑ ዮሴፍን ኵሎም ኣሕዋቱን እቲ ዅሉ ወለዶን ሞቱ። ⁷ደቂ እስራኤል ግና ፈረዩ፥ ተባዝሑ፥ በዝሑ፥ ኣዝዮምውን ሓየሉ፤ እታ ምድሪ ድማ ብኣኣቶም መልአት።

⁸ሽዑ ንዮሴፍ ዘይፈልጥ ሓድሽ ንጉስ ኣብ ግብፂ ነገሰ። ⁹ንሱ ድማ ንህዝቡ “እንሆ፥ ደቂ እስራኤል ካባና ዝበዝሑን ዝሓይሉን ህዝቢ እዮም።” በሎም። ¹⁰“ንዑ፥ ብጥበብ ንተሓዘዎም፤ እንተ ዘይኮነ ኺበዝሑ እዮም፤ ውግእ ምስ ዝለዓል ድማ ምስ ፀላእትና ተሓዊሶም ኪዋግኡና፥ ካብዛ ምድሪ ድማ ኪወፁ እዮም።” ¹¹ስለዙይ ብኸቢድ ዕዮ ምእንቲ ኺጭቍንዎም፥ ሓለፍቲ ዕዮ ኣብ ልዕሊኦም ሾሙ፤ ንፈርዖን ድማ ፒቶምን ራምሴን ዝተብሃላ ኸተማታት መኽዘን ሰርሑ። ¹²ግብፃውያን እናጨቈንዎም ብዝኸዱ መጠን ግና፥ ደቂ እስራኤል ይበዝሑ ይዝርግሑ ነበሩ፤ ስለዙይ ግብፃውያን ብደቂ እስራኤል ተሸበሩ። ¹³ስለዙይ ግብፃውያን ንደቂ እስራኤል ብጭካነ ባሮት ገይሮም ኣስርሕዎም። ¹⁴ብጭቃን ብጡብን ኣብ ኵሉ ዓይነት ዕዮ ግራትን፥ ብኸቢድ ዕዮ ህይወቶም መረሩሎም፤ በቲ ዅሉ ኸቢድ ዕዮኦም ድማ ግብፃውያን ብጭካነ ኣስርሕዎም።

¹⁵ሽዑ ንጉስ ግብፂ ነተን ስም እታ ሓንቲ ሺፍራ፥ ስም እታ ኻልአይቲ ኸዓ ፉዓ ዝተብሃላ ዕብራውያት መሕረስቲ ከምዙይ በለን፦ ¹⁶“ነተን ዕብራውያት ኣንስቲ ኣብ ምውላድ ክትሕግዛአን እንተለኽን፥ ኣብቲ መንበር ሕርሲ ጠምታ፤ ወዲ እንተ ኾይኑ ቅተላኦ፤ ጓል እንተ ኾይና ግና ብህይወት ሕደጋ።” ¹⁷እተን መሕረስቲ ግና ንሰማያዊ ኣቦና ፈርሃ፤ ከምቲ ንጉስ ግብፂ ዝኣዘዘን ድማ ኣይገበራን፤ ነቶም ኣወዳት ከዓ ብህይወት ኣትረፋኦም። ¹⁸ስለዙይ ንጉስ ግብፂ ነተን መሕረስቲ ፀዊዑ “ስለ ምንታይ ነዝ ነገርዙይ ጌርክን፥ ነቶም ኣወዳት ብህይወት ኣትሪፍክንኦም?” በለን።

¹⁹እተን መሕረስቲ ድማ ንፈርዖን “ዕብራውያት ኣንስቲ ኸም ግብፃውያት ኣንስቲ ኣይኮናን፤ ብርቱዓት ስለ ዝኾና፥ መሕረሲት ናባኣን ከይበፅሐት ይወልዳ እየን” ኢለን መለሳሉ።

²⁰ስለዙይ ኣቦና ነተን መሕረስቲ ሰናይ ገበረለን፤ እቲ ህዝቢ ድማ በዝሐ፥ የመናውን ሓየሉ። ²¹እተን መሕረስቲ ንኣቦና ስለ ዝፈርሃኦ ድማ፥ ናይ ባዕለን ቤተ ሰብ ሃበን። ²²ሽዑ ፈርዖን ንዅሉ ህዝቡ “ነቲ ንዕብራውያን ዝውለድ ኵሉ ወዲ ናብ ሩባ ደርብይዎም፤ ንኵለን ኣዋልድ ግና ብህይወት ሕደግወን” ኢሉ ኣዘዞም።