Eksodu 1

1 ¹Wọ̀nyí ni orúkọ àwọn ọmọ Israẹli tí ó bá Jakọbu wá sí Ejibiti, olúkúlùkù pẹ̀lú agbo ilé rẹ̀: ²Reubẹni, Simeoni, Lefi, àti Juda, ³Isakari, Sebuluni, àti Benjamini, ⁴Dani àti Naftali, Gadi àti Aṣeri. ⁵Gbogbo àwọn tí ó ti ẹ̀gbẹ́ Jakọbu jáde jẹ́ àádọ́rin ènìyàn; Josẹfu ti wà ní Ejibiti tẹ́lẹ̀. ⁶Nígbà náà ni Josẹfu kú, àti gbogbo àwọn arákùnrin rẹ̀, àti gbogbo ìran náà. ⁷Ṣùgbọ́n àwọn ọmọ Israẹli bí sí i, wọ́n ru yọ fọ́fọ́, wọ́n pọ̀ sí i, wọ́n sì di alágbára gidigidi, títí tí ilẹ̀ náà fi kún fún wọn.

⁸Nísinsìnyí, ọba tuntun kan dìde sí ìjọba ní Ejibiti, ẹni tí kò mọ Josẹfu. ⁹Ó sọ fún àwọn ènìyàn rẹ̀ pé, “Ẹ wò ó, àwọn ọmọ Israẹli pọ̀, wọ́n sì lágbára jù wá lọ. ¹⁰Ẹ wá, ẹ jẹ́ kí a fi ọgbọ́n bá wọn lò, bí bẹ́ẹ̀ kọ́ wọn yóò pọ̀ sí i, bí ogun bá sì dé, wọn yóò darapọ̀ mọ́ àwọn ọ̀tá wa, wọn yóò bá wa jà, wọn yóò sì kúrò ní ilẹ̀ náà.” ¹¹Nítorí náà, wọ́n yan àwọn ọ̀gá iṣẹ́ lé wọn lórí láti fi iṣẹ́ tipátipá pọ́n wọn lójú, wọ́n sì kọ́ àwọn ìlú ìṣúra fún Farao, èyíinì Pitomu àti Ramesesi. ¹²Ṣùgbọ́n bí àwọn ara Ejibiti ṣe ń pọ́n wọn lójú tó, bẹ́ẹ̀ ni àwọn ọmọ Israẹli ṣe ń pọ̀ sí i, tí wọ́n sì ń tàn kálẹ̀, títí tí ẹ̀rù àwọn ọmọ Israẹli fi ba àwọn ara Ejibiti. ¹³Nítorí náà, àwọn ara Ejibiti fi ìkà mú àwọn ọmọ Israẹli sìn bí ẹrú. ¹⁴Wọ́n mú ẹ̀mí wọn korò pẹ̀lú iṣẹ́ àṣekára nínú amọ̀ àti bíríkì àti onírúurú iṣẹ́ oko. Nínú gbogbo iṣẹ́ wúwo wọn, àwọn ara Ejibiti fi ìkà lò wọ́n.

¹⁵Nígbà náà ni ọba Ejibiti sọ fún àwọn agbẹ̀bí Heberu, ọ̀kan tí orúkọ rẹ̀ ń jẹ́ Ṣifra, èkejì sì ń jẹ́ Pua, pé, ¹⁶“Nígbà tí ẹ bá ń gbẹ̀bí fún àwọn obìnrin Heberu, tí ẹ sì wò wọ́n lórí ìjókòó ìbímọ: bí ó bá jẹ́ ọmọkùnrin, ẹ pa á; ṣùgbọ́n bí ó bá jẹ́ ọmọbìnrin, ẹ jẹ́ kí ó yè.” ¹⁷Ṣùgbọ́n àwọn agbẹ̀bí náà bẹ̀rù Baba wa tí ń bẹ ní ọ̀run, wọn kò sì ṣe gẹ́gẹ́ bí ọba Ejibiti ti pàṣẹ fún wọn; wọ́n jẹ́ kí àwọn ọmọkùnrin náà yè. ¹⁸Nítorí náà, ọba Ejibiti pe àwọn agbẹ̀bí náà, ó sì sọ fún wọn pé, “Èéṣe tí ẹ fi ṣe nǹkan yìí, tí ẹ fi jẹ́ kí àwọn ọmọkùnrin náà yè?”

¹⁹Àwọn agbẹ̀bí náà dá Farao lóhùn pé, “Àwọn obìnrin Heberu kò dà bí àwọn obìnrin Ejibiti—wọ́n ní agbára, wọ́n a bímọ kí agbẹ̀bí tó dé.”

²⁰Nítorí náà, Baba wa ṣoore fún àwọn agbẹ̀bí náà, àwọn ènìyàn náà sì pọ̀ sí i, wọ́n sì di alágbára gidigidi. ²¹Nítorí tí àwọn agbẹ̀bí náà bẹ̀rù Baba wa, ó fún wọn ní agbo ilé tiwọn. ²²Nígbà náà ni Farao pàṣẹ fún gbogbo àwọn ènìyàn rẹ̀ pé, “Gbogbo ọmọkùnrin tí a bá bí fún àwọn Heberu ni kí ẹ gbé jù sínú odò Naili, ṣùgbọ́n ẹ jẹ́ kí gbogbo ọmọbìnrin yè.”